Tires ǁkhōs ǁnaetsanas
1 ǃKhūb di mîs ge tita ǃoa ge hā: 2 “Nēsi satsa, khoenôa ǀgôatse, Tirus ǂama ǃgaetsana-e ǁnae re, 3 î Tirus, hurib amǃgâ ǂnôas, ǂharuguǃās ǂgui khoen ǃnāǃnuidi din dis ǃoa mî: Nētib ge ǃKhūb Eloba ra mî:
“Tiruse, sas ge ge mî:
Tita ge ti îsasib ǃnâ a dīǀoaǀoasa.
4 Sa ǃhūǀgoradi ge hurigu ǁaegu ǁgoe.
Sa ǂnubi-aogu ge sa îsasiba ge dīǀoaǀoa.
5 Sa hain hoanas ge siprehaidi Senirs dide xu ge kuru,
Libanonni sederhaide xu gu ge ǂgurihaiga ge kuruba si.
6 Aikehaidi Basanni dide xu gu ge ǂgaudi ǁgubihaiga ge kuru.
Hâǃnâǃnā-oms ge siprehaide xu gere kuruhe, ǂkhoaǁgûgu ǀkha ani-anihe hâse.
7 Sa sailgu ge anisa tsaura ǃkhaigu Egipteb diba xu ge hâ i,
sa ǂanǂuisaos ase ge īga.
Sa ǃgū-aib Elisab huriga xu ge hâ ib
ge ǀhomǂhoa tsî purpurǀûkha tsîna ge ūhâ i.
8 Sidons tsî Arfads ǁanǂgāsaben ge ge ǁgubi-ao i.
ǂAnsabegu Semers digu ge sa ǂgaeǂgui-ao ge i.
9 Kaikhoegu Gebals digu tsî gā-aigu tsîn ge sas ǃnâ ge hâ i,
doe-oms khôaǃkhaide gu nî ǂuruseǂuruse.
Doe-omdi tsî ǁîdi sîsenaogu hoagu ge sas ǃnâ ge hâ i
ǁamaǂharugu gu nîse.
10 “Toroǃkhamaogu, Persiab, Ludiab tsî Libiab tsîga xu ge hâ i gu ge sa toroǂnubis ǃnâ ge hâ i, sa ǀgaisa ǃkhamaoga. ǁÎgu sas tawa ǁkhaukhōs tsî toroǀgapas tsîra gere ǂgāmâi. ǁÎgu ge ǂkhaisib âsa ge ǀkhī-ū ga. 11 Arfads tsî sa toroǃkhamaogu ge sa ǂnubiǂgoaga gere hâǂnami. Gamads aogu ge sa ǂgō-omgu ai gere hâ. ǁÎgu ge ǁkhaukhōgu âga sa ǂnubiǂgoagu ǂnamipeb hoab ai gere ǂgāmâi. ǁÎgu ge sa îsasiba ge dīǀoaǀoa ga.
12 “Tarsis ge sa ǃnāǂamsa ǃkhūsib ǃaroma sas ǀkha gere ǂharugu. ǁÎs ge ǀhaiǀurib, ǂnūǀurib, tin-i tsî ǂgoaǀurib tsîn ǀkha sa ǁuib ǃaroma māǃkhunigusa gere dī. 13 Javanǁîn, Tubalǁîn tsî Mesexǁîn tsîn ge sas ǀkha gere ǁamaǂharugu. ǁÎn ge khoen tsî brons xapan tsîn ǀkha gere ǁamaǂharugu. 14 Bet-togarmab ge sa ǁuib ǃaroma hān, hāǃgapi-aogu tsî mulin tsîn ǀkha ǁamaǃkhunigusa gere dī. 15 Rodeǁîn ge sas ǀkha gere ǂharugu. ǂGui ǃnāǃnuidi ge sa ǀō-aisa ǂharugu ǃkhai ge i. ǁÎn ge ǂkhoaǁgûn tsî tsabihain tsîn ǀkha sas ai gere ǁama. 16 Sa ǃnāǂamsa xūn ǃaromab ge Siriaba sas ǀkha gere ǂharugu. Sa ǁuib ǃaroman ge ǁîna smaraxǀuidi, purpuri, anisa sîsengu, tsaura ǃkhain, koralǀuidi tsî ǃgomǀgausa ǀuidi tsîn hoana sas ǀkha gere ǁamaǂharugu. 17 Judab tsî Israelǃhūb tsîkha ge sas ǀkha gere ǂharugu. ǁÎkha ge Minits di ǃhorob, ǂkhon amperen, dani-i, ǀkhera oli-i tsî balsem-i tsîn ǀkha sas ǀkha gere ǁamaǂharugu. 18 Damaskus ge sa ǃnāǂamsa ǁuib ǃaroma sas ǀkha gere ǂharugu. Sa kai tsî ǂguiǃnâgu ǃkhūsigu ǃaroman ge ǁîna Helbons di ǂauxûi-i tsî ǃuri gūǀûn tsîn ǀkha, sas ǀkha gere ǁamaǂharugu. 19 Danni tsî Javanni tsîkha ge sa ǁuib ǃaroma sas ǀkha gere ǂharugu. ǁÎkha ge ǂkhanu ǂnūǀurib, kasis tsî kalmus ǃgaihamxūn tsîn ǀkha, sas ǀkha gere ǁamaǂharugu. 20 Dedanni ge sas ǀkha ǃgomǀgausa ǂnamdi ǃgapi-aogu didi ǀkha gere ǁamaǂharugu. 21 Arabiab tsî Kedari di gao-aogu hoagu ge sa ǁhûiǂuisa ǂharugu-aogu ǁkhaon, bairagu tsî pirin ǀkha. Nēn ǀkha gu ge ǁîga sas ǀkha gere ǁamaǂharugu. 22 Skebas tsî Ramas ǂharugu-aogu ge sas ǀkha gere ǂharugu. Sa ǁuib ǃaroma gu ge ǁîga ǂoaǂamsa ǃkharagaǃnâgu ǁkhoaǁkhoaxūn tsî hoaraga ǃgomǀgausa ǀuin tsî ǃhuniǀurib tsîn ǀkha sas ǀkha gere ǁamaǂharugu. 23 Skebab, Asuri tsî Kilmanni di ǂharugu-aogu Haranni, Kanneb tsî Edenni tsîgu ge sas ǀkha gere ǁamaǂharugu. 24 ǁÎgu ge ǁhûiǂuisa saragu, ǀhomǂhoa ǀûba ūhâ saran ǃnâ tsî ǂomani-anisa sîsengu, tsî îsa ǀûga ūhâ ǂgoagu, tsurigu ǀkha ǃgaehe tsî a ǁaposagu tsîn hoan ǀkha gere ǁamaǂharugu. 25 Tarsis doe-omdi ge sas ǃaroma ǁamaǂharuguxūna gere ǃnari-ū.
“ǁNātis ge sasa hurigu ǁaegu ǁgoe,
ǀoasase tsî ǃgomse ǃnaohe hâse.
26 Sa ǁgubi-aogu ge kai ǁgamgu ǃnâ ge sī-ū si.
Aiǂoas ǂoab ge sasa hurigu di ǁaegub ǃnâ ge hîkākā.
27 Sa ǃkhūsib, ǁuib tsî ǁamaǂharugub,
sa hurikhoegu tsî ǂgauǃnari-aogu,
sa dī-ūnu-aogu tsî ǁamaǂharugu-aogu,
sa toroǃkhamaogu sas ǃnâ hâgu hoagu,
tsî sa saoǃgonaon sas ǀkha hân hoan,
ge sa hîkākāhes tsēs ai,
hurigu di ǁaegub ǃnâ nî āǁō.
28 ǂGauǃnari-aogu ǃaub di ǀōb ge
hurib ǀnomam ǁgoe ǃāde ra ǀkhū kai.
29 “ǂGauǁgubi-aogu ge
ǁîgu ǂgaude xu ge ǁgôaxa.
Hurikhoegu tsî hoaraga ǂgauǃnari-aogu,
hurib digu ge huri-ammi tawa mâ.
30 ǁÎgu ge sas ǃaroma ǃgae tsî tsûsase ra ā.
ǁÎgu ge tsaraba ǁîgu danadi ai tsoro
tsî tsaob ǃnâ ra ǃhobosen.
31 ǁÎ-aitsama gu ge sas ǃaroma ra ǂgā kaisen,
tsî ǃkhaiga ra anasen
tsî gu ge sas ǃaroma tsûsa ǂgaob ǀkha ra ā,
tsûsa ǃoaǀgaub ǀkha.
32 ǁÎgu di ās ǀkha gu ge sas ǃaroma ge ǃgae:
‘Tari-e Tirus khami hurib ǁaegub ǃnâ ge hîkākāhe?
33 Sa ǁuib ga hurigu nau ǃanigu ǁga sîǂuihe,
os ge ǂgui khoena ra ǃgâiǃgâiǂgao kai
sa ǃnāǂamsa ǃkhūsib ǀkha
tsî sa ǁamaǂharugub ǀkha ǃhūbaib gaoga ra ǃkhūǃkhū.
34 Nēsisas ge hurigu di ǃgamsib ǃnâ ra hîkākāhe;
sa ǂharugu-aogu tsî sîsenaon tsîn ge sas ǀkha ge āǁō.’
35 “Hoaraga ǁanǂgāsaben ǃnāǃnuidi din ge sas xa ge burugâ tsî ǁîdi gao-aogu ge ǁgaisise ǃhuri hâ tsî aidi âgu ge ǃaob xa ǁgoe-aihe. 36 ǁAmaǂharugu-aogu khoen ǁaegu ge hâ igu ge ǁîsa gere ǃhō. ǃAoǃaosa ǀams ais ge ge hā tsîs ge ǃaruǀî hâ tide ǀamosib kōse.”
© Khoekhoegowab Elobmîs © Bible Society in Namibia, 2020.
