ǀUniga hû tsûtsû-aidi
1 Tempela xu ta ge ǃgari dom-e ge ǁnâu, hû ǀhomǃgāgu ǃoa ra mî-e: “ǃGû î ǁnā hû ǃoredi, Elob di ǁaib xa ǀoa hâde ǃhūbaib ai sī ǁhōǂui!”
2 Ob ge ǂguro ǀhomǃgāba ǃgû tsî ǃores âba ǃhūbaib ai ge ǁhōǂui. Tsîn ge tsûsa ǀhapina ǁnān hîa ǀgurub di saosa ǁîn ai ūhân tsî ǁîb di ība ra ǀgoreǀîn ai ge ǁhai. 3 ǀGamǁî ǀhomǃgāb ge ǁîb di ǃoresa hurib ǃnâ ge ǁhōǂui. ǁGam-i ge ǁō hâ khoe-i di ǀaob ase ge ī tsîn ge hoaraga ûitsama xūn hîa hurib ǃnâ hâna ge ǁō.
4 ǃNonaǁî ǀhomǃgāb ge ǁîb di ǃoresa ǃāgu tsî ǁgamǀaudi ǃnâ ǁhōǂui, o gu ge ǁgamga ǀaob ǃnâ ge ǀkharaǀkharasen. 5 Tsî ta ge ǁgamgu di ǃereamsa ūhâ ǀhomǃgāba nētib ra mîse ge ǁnâu:
“Sa ǀgoraǃgâdi ge a ǂhanu-ai,
sats ǃAnuts, hâ ats tsî hâ ge itsa!
6 ǁÎn ge ǀaob ǃanun diba ge ǂnâxū
tsî ǁkhāti sa kēbo-aogu diba.
Tsîts ge ǁnā-amaga ǁîna ǀaoba ge mā,
ǁîn nî āse,
ǁnāsan ǃoaǂui hâ amaga.”
7 Nēn khaoǃgâ ta ge altarsa xu dom-e ge ǁnâu, nēti ra mî-e:
“Ā, ǃKhū Elo Hoaǀgaixatse,
sa ǀgoraǃgâdi ge ama-ai
tsî a ǂhanu-ai.”
8 Tsîb ge hakaǁî ǀhomǃgāba ǁîb di ǃoresa sores ai ge ǁhōǂui tsîs ge soresa ǀgaiba ge māhe ǀaes ǀkha khoena daosa. 9 Khoen ge nē ǀgaisa ǀgammi xan ge daoheo, Elob nē tsûtsû-aidi ǂama ǀgaiba ūhâb di ǀonsa ge ǃkhāǃkhā. Tsîn ge ǃhobasen tama i tsî ǁîba ǃgôasiba mā tama ge i.
10 Koroǁî ǀhomǃgāb ge ǁîb di ǃoresa ǀgurub di trons ai ge ǁhōǂui. Tsîb ge ǃkhaeba ǀgurub di gaosib ǂama ge hā tsîn ge khoena tsûb xa namdi âna gere nâ. 11 Tsîn ge tsûb hîan ra tsâb ǃaroma ǀhommi di Eloba ǃkhāǃkhā tsî ǁîn di tsū daoga xu ǃhobasen tama ge i.
12 ǃNaniǁî ǀhomǃgāb ge ǁîb di ǃoresa kai Eufratǃāb ai ge ǁhōǂui. Tsîb ge nē ǃāba ge ǂnâ, aiǂoasa xu hâ gao-aogab daoba nî ǂhomibase. 13 O ta ge ǃnona ǃanuoǃnâ gagagu, ǁgūtsiǁgūben khami īgu, draki* di ams, ǀgurub di ams tsî ǂkhaba kēbo-aob di amsa xu ra ǂoaxaga ge mû. 14 Nē ǁgâuagu* di gagagu ge saodi hoaraga ǃhūbaib di gao-aogu kōse ra ǂoade ra dī, ǁîga ǀguipa ǀhaoǀhaos ǀkha, Hoaǀgaixa Elob di kai Tsēb ai nî hâ torob ǃaroma.
15 “Mû, tita ge ǃnari-aob khami ra hā! ǀKhaehe-i ge hâ ǁnā khoe-i hîa ǁî-i di sarana ǂhomisase ūhâ-e, î-i tā ǀōǀkhāse ǃgûma tsî taosib â-e mûhe.”
16 Tsî gu ge gagaga gao-aoga Hebregowab ǃnâ Armagedon ti ra ǂgaihe ǃkhaib tawa ge ǀhaoǀhao.
17 Hûǁî ǀhomǃgāb ge ǃores âba ǂoab ǃnâ ge ǁhōǂui. O i ge ǃgari dom-e ǀhommi di Tempeli tronsa xu ge hā, mî raǃâ: “Dītoahe go!” 18 O gu ge napab tsî ǃgurub tsî kaise ǁkhōǁkhōsa ǃhūǂgubib tsîna ge hâ. Tātsē i ge khoen ge ǂnubihes khaoǃgâ ǁnāti ī ǃhūǂgubiǃnôa-e ge hâ tama hâ i. 19 Kai ǃās ge ǃnona ǃâdi ǃnâ ge ǀgoraǃāhe tsî di ge ǁaedi di ǃādi hoaraga ǃhūgu dide ge hîkākāhe. ǁKhātib ge Eloba Babilons tsîna ǀuru tama ge i, tsîs ge ǁîs tsîna ǁîb di ǁaib tsî ǁaixasib xa hâ ǀgabisa ge ā. 20 Hoaraga ǃnāǃnuidi ge ge kā tsî gu ge ǃhomga ge ǁnā. 21 ǃNaredi, mâs hoas ǁaubexa hakadisikoroǀa kiloxram ǃgomma ūhâdi ge ǀhomma xu khoen ai ge ǁnā. On ge ǁîna Eloba nē tsûtsû-ais ǃnareb dis hîa ge kaise kai is ǃaroma gere ǃkhāǃkhā.
© Khoekhoegowab Elobmîs © Bible Society in Namibia, 2020.
