Egipteǁîn di ǀgoan ra ǁō
1 Ob ge ǃKhūba Moseb ǃoa ge mî: “Faraob tawa sī, î ǁîba nētib ge ǃKhūb, Hebreǁîn di Eloba ra mî ti mîba: ‘Ti khoena ǃnoraǃnora, titan nî ǀgoreǀî ǁkhāse. 2 Xawets ga ǁîna ǃnoraǃnorasa ǂkhā, tsî ǁîna khobosis ǃnâ ūhâs ǀkha aiǃgû, 3 o ta ge ǁkhōǁkhōsa ǀaesenaina sadu ǀgoan, hān, dâukin, ǃnain, goman, gūn tsî pirin tsîn hoan ai nî sī-ū. 4 Xawe ta ge Israelǁîn tsî Egipteǁîn di ǀgoan tsîn ǃnâ ǀgorasa nî dī, Israelǁîn di ǀgoa-i xare-i nēs xa tsâǀkhāhe tidese.’ ” 5 Tsî ǃKhūb ge ǀō-aisa tsēs nēs nî īs xa ge mî: “ǁAri ta ge Egipteb ǃnâ nēsa nî dī.”
6 Sao ra tsēs aib ge ǃKhūba mîb ge khami ge dī. Egipteǁîn di ǀgoan hoan ge ge ǁō, xawe-i ge Israelǁîn di ǀgoa-i xare-e ǁō tama ge i. 7 Faraob ge ge mîbahe Israelǁîn di ǀgoa-i xare-i tsîn ǁō tama ǃkhaisa. Xaweb ge Faraoba ǁkhawa ǂgaob âba karokaro tsî Israelǁîna ǃnoraǃnora ǂgao tama ge i.
Egipteǁîn ge tsuidi xa ra ǁhai-aihe
8 Ob ge ǃKhūba Moseb tsî Aron hâkha ǃoa ge mî: “Sakho ǃomgu ǀoa tsaoba ǁganom-e xu ū, îb Moseba ǁî-e Faraob ra mûse ǂoab ǃnâ aokhâi. 9 Nē tsaob ge tsarab khami hoaraga Egipteb ǃnâ ǃgom tsî ǁkhowa-amsa tsuidi ǃnâ ǀkharaǀkharasen tsî hoaraga Egipteǁîn, ǁîn di ǀgoan, ǀgurun tsî xamarin hoana nî ǁhai-ai.” 10 Moseb tsî Aron hâkha ge tsaoba ǁganom-e xu ū tsî Faraob tawa ge sī. Moseb ge Faraob ra mûse ǁî-e ǂoab ǃnâ ge aokhâi, tsî-i ge ǁkhowa-amsa tsuidi ase khoen, ǀgoan, ǀgurun tsî xamarin hoan ai ge ǁhai. 11 ǃGaidī-aogu tsîn ge nau Egipteǁîn hoan khami tsuidi xa ǁhai-aihe tsî Moseb ǃoagu ge mâ ǁoa i. 12 Xaweb ge ǃKhūba Faraob di ǂgaoba ge karokaro tsîb ge ǃKhūb ge ǀnai mî hâ i khami Moseb tsî Aron hâkha ǃgâ ǂgao tama ge i.
Kai ǃnareb ge Egipteǁîn ai ra ǁnā
13 Ob ge ǃKhūba Moseb ǃoa ge mî: “ǁArikam ǃnauǁgoaga Faraob tawa sī, î nētib ge ǃKhūb, Hebreǁîn di Eloba ra mî ti ǁîba mîba: ‘Ti khoena ǃnoraǃnora, titan nî ǀgoreǀî ǁkhāse. 14 Nē ǃnāsa ta ge sa ǂammâisagu tsî sa khoen ǀguin ǁga tama i tsî sats ǂûts ǁga ti ǁkhara-ain hoana nî sî, îts tita khami ī elo-i nē ǃhūbaib hoaragab ai ǀkhai ǃkhaisa ǂan. 15 ǀNai ta ge ti ǀgaisa ǃommi ǀkha sats tsî sa khoen tsîna ǁkhōǁkhōsa ǀaesenain ǀkha ǃhūbaiba xu hoaragase ga ǃgamǂui hâ. 16 Xawe ta ge sa ûiba ti ǀgaiba ta nî ǁgau tsi tsîs ti ǀonsa hoaraga ǃhūbaib ai nî ǂanhese ge sâu. 17 Xawets ge noxopa ti khoena khobodīs ǀkha ra aiǃgû tsî ǁîna ǃnoraǃnora ǂgao tama hâ. 18 ǁAri, nē ǁaeb ai ta ge hoaraga Egipteba noxopa Egipteb di ǃnaeǃkhais ǃnâ ǂanhe tama ǀgaisa ǃnareb ǀkha nî ǁnāǂam. 19 ǁNā-amaga nēsi sa ǃgāna mîmā, în sa ǀgoan tsî hoaraga xūn ǃauga tsî ǃgarob ǃnâ hâna omgu ǃnâ ǂgâ-ū. ǃNareb ga ǃauga tsî ǃgarob ǃnân hâ hîa ǁnā-ai ǀgoan tsî khoen hoan ge nî ǁō.’ ” 20 ǀNî ǂammâisagu Faraob digu hîa ǃKhūb ge mî xūna gere ǃaogu ge ǁîgu di ǃgān tsî ǂgarib tsîna omgu ǃnâ ǁkhaebahes ǃaroma ge ǂgâ-ū. 21 Xawe ǀnîgu, ǃKhūb ge mî xūn ǀkha ge ǁae tama hâ igu ge ǁîgu di ǃgān tsî ǀgoana ǃauga tsî ǃgarob ǃnâ ge ǁnāxū.
22 Ob ge ǃKhūba Moseb ǃoa ge mî: “Sa ǃomma ǀhommi ǃoa ǃnareb nî Egipteb hoab, khoen, ǀgoan, ǀgurun, xamarin tsî ǃgarob di haiǃnôan hoan ai ǁnāse ǀhōǂui.” 23 Moseb ge ǀkharub âba ǀhommi ǃoa ǀhōǂui, ob ge ǃKhūba ǀhomma ǃguru kai tsî ǃnareba ge sîǁnâ tsîb ge napaba ǀaeb khami ǃhūb ai ge ǁgôaxa. ǁNātib ge ǃKhūba ǃnareb ǀkha Egipteb hoaba ge ǂnau. 24 Napab ge kai ǃnareb ra ǁnā hîa kaise ǁaixa hâse ǀgapikaba xu ǃnakab kōse gere ǂnau. Nēti ī kai ǃnareb ge noxopa Egipteb di ǃnaeǃkhais ǃnâ ge ī tama hâ i. 25 Hoaraga Egipteb ǃnâb ge ǃnareba ǃauga ge hâ i khoen tsî ǀgoan tsîna ǂnauǃan tsî ǃgarob ǃnâ ge hâ i ǁhaon tsî hain tsîn hoana ge ǂkhôa. 26 Israelǁîn ge ǁanǃnâ hâ i ǀkharib, Gosenni ǀguib ge nē kai ǃnareb xa ge tsâǀkhāhe tama hâ i.
27 Ob ge Faraoba Moseb tsî Aron hâkha ǂgai kai tsî ǁîkha ǃoa ge mî: “Nē ǃnāsa ta ge ra ǂanǃgâ ǁore ta go ǃkhaisa. ǃKhūb ge a ǂhanu tsî tita tsî ti khoen tsîn ge tsūse ge dī. 28 ǃAruǀî da ge nē ǃgurub tsî ǃnareba a tani ǁoa, xuige toxopa ǃKhūb ǃoa ǀgore re. Tita ge nî ǃnoraǃnora du tsî ǃaruǀî du ge Egipteb ǃnâ hâ tide.”
29 Ob ge Moseba ǁîb ǃoa ge mî: “ǃĀsa xu ta ra ǂoa khami ta ge ti ǃomkha ǀgore rase ǃKhūb ǃoa nî ǀhōǂui. ǃGurub tsî ǃnareb tsîkha ge nî ǀû tsîts ge nēs ǃnâ ǃhūbaib a ǃKhūb di ǃkhaisa nî mûǂan. 30 Xawe ta ge sats tsî sa ǂammâisagu tsîgo noxopa ǃKhūb Eloba ǃaoǃgâ tama ǃkhaisa a ǂan.”
31 ǃApihain tsî ǃhorob tsîn ge ǃgaoǁaeb aiǃâ ge ǂkhôahe. 32 Xawe nau ǃhorob ǃgaoǁaeb âb ge ǃnū ib ge ǂkhôahe tama ge i.
33 Moseb ge Faraoba xu ǃgû tsî ǃāsa xub ra ǂoa hîa ǃomkha âba ǀgore rase ǃKhūb ǃoa ge ǀhōǂui. O gu ge ǃgurub, ǃnareb tsî ǀnanub tsîgu hoaga ge ǀû. 34 Xawe Faraob ge ǃaruǀî i ǃguru tama, ǃnareba ǁnā tama i tsî ǀapi tama ǃkhaisa a mû, o ǁkhawa ge ǁore. ǁÎb tsî ǂammâisagu âb tsîgu ge ǂgaogu âga ge karokaro. 35 Nēs khaoǃgâs tsînab ge Faraoba ǂgaob âba ǃaruǀîǀgui karokaro tsî ǀnaib ge ǃKhūba Moseb ǃnâ-u mî hâ i khami, ǁkhawa Israelǁîna ǃnoraǃnora ǂgao tama ge i.
© Khoekhoegowab Elobmîs © Bible Society in Namibia, 2020.
