Danieli ge ai-i ǃnâ khoeba ra mûmâ
1 ǂGuro ǂgaeǂguis kurib Persiab gao-aob Koresi dib ǃnâb ge Danieli, Belsasar ti ge ǀonǂgaiheba ǂhaiǂhaisa ge ǃkhōǃoa. Nēs ge ama ǂhaiǂhai ge isa, xawes ge ǁîsa ǁnâuǃāsa kaise ge ǃgom i. Danieli ge ǁîsa ai-i ǃnâ ǁguiǃābahe tsî ge ǁnâuǃā.
2 ǁNā ǁaeb ǃnâ ta ge tita Danielta ǃnona wekhegu ǃoaǁaeba ge ūhâ i. 3 Tsî ta ge ǁkhoaxa ǂû-i kas, ǁgan-i kas hoasa ǂû tama i, ǂauxûi-e ā tama i tsî ǃgâihamǁnui-i tsîn ǀkha ge soposen tama hâ i, ǁnā ǃnona wekhegu ge ǃkharus kōse.
4 ǀGamdisihakaǀaǁî tsēs ǂguro ǁkhâb dis ai ta ge kai ǃāb, Tigrisi amǃgâ ge mâ i. 5 Tsî kōkhâi ta geo, o ta ge linesaraba ana tsî ǃhuniǀuri ǃgaesenna kamanab ai ǃgae hâ khoeba ge mûmâ. 6 ǁÎb soros ge ǃgomǀgausa ǀui-i khami gere ǂkhai. ǁÎb di ais ge napab khami gere ǃnâ tsî mûra âba ǀaeǁhabub khami. ǁÎb di ǁôakha tsî ǀnūkha ge ǂkhanuǂkhanuhe hâ brons-i khami gere ǂkhai tsî dommi âb ge kai ǂnubis di ǂkhupib khami gere ǁnâusen.
7 Tita ǀguita ge nē aisa ge mû. Tita ǀkha ge hâ i khoen ge ǁîsa ge mû tama hâ i, xawen ge ǃaob xa ǃkhōhe tsî ǃkhoeni tsî ge gau 8 tsî ta ge tita ǀguri ge ǃgau. Nē buruburuxa aisa ta ge mû, o ta ge ge ǀgaio, ti īsib ge ǃaob xa ge ǀkhara tsî ta ge ǁkhāsi-i xare-e ge ūhâ tama hâ i. 9 ǁÎb di domma ta ge ǁnâu, o ta ge ǃgam ǂoms xa hāǂamhe tsî ais ai ǃhūb ai ge ǁnāǁgoe. 10 Xaweb ge ǁîba ǃkhō te tsî ǀkhū ta ra hîa, ti ǃomra tsî ǁgoara ai mâi te 11 tsî ge mî: “Danieltse, Elob ge a ǀnam tsi. ǂGōse mâ, îts mîba tsi ta rana ǃgaoǃgâ. Satsa ǃoa ta ge go sîhe.” Nētib ge mî, o ta ge ǀkhū rase ge khâimâ.
12 Ob ge ge mî: “Danieltse tā ǃao re. Sa ǀgores ge ǂguro tsēs, sa Elob aiǃâts ge ǁnâuǃāts nîse ǃgamǃgamsens ai ge ǁnâu-amhe. Tita ge sa ǀgores di ǃereamsa go hā-ūba tsi. 13 Persiab gaosib di ǀhomǃgāb ge ǀgamdisiǀguiǀa tsēdi kōse ge mâǃoa te, xaweb ge Mixaeli, ǂamǀhomǃgāgu di ǀguiba hā ge hui te, ǀguri ta ge Persiab ǃnâ ǁnāxūhe hâ i xui-ao. 14 Tita ge ǃgoaxaǁae sa ǁaes ǀkha nî īna ta nî ǂanǂan tsise go hā, nē ais ǃgoaxaǁaeb xa ra ǂâibasen xui-ao.”
15 Nēnab gere mîba te, o ta ge ǃgamǃgâ tsî ǃhoa ǁoase ge mâ. 16 Ob ge ǁnāb khoe-i khami ge ī iba, ti amǁgaukha ge tsâǀkhā tsî ta ge ǁkhawa ge ǃhoa ǁkhā. O ta ge ti ais ai mâb ǃoa ge mî: “ǃGôahesatse, mû ta go ai-i ge kaise go ǃaoǃao te tsî ta ge ra ǀkhū. 17 Mâti ta kha tita sa ǃgāta, ǃgôahesatse, sats ǀkha a ǃhoa ǁkhā? ǀGai-i xare-e ta ge ūhâ tama hâ, ǀom ǁoas tsîna ta ge i.”
18 Ob ge ǁnāb khoe-i khami ība ǁkhawa ge tsâǀkhā te tsî ge ǀgaiǀgai te. 19 ǁÎb ge ge mî: “Elob ge a ǀnam tsi, xuige tā ǃao. Hoa xūn ge sa ǃgâib ǃoa nî ī.” Nēsab ge mî, o ta ge ǃaruǀîǀgui ge ǀgai tsî ta ge “ǃGôahesatse ǃhoa re, ǀgaiǀgai tets go xuige” ti ge mî. 20-21 Ob ge ǁîba ge mî: “Tare-i ǃaroma ta go satsa ǃoa a hāsa ǂants a? Amab di ǂkhanis ǃnâ xoamâisana ta nî ǂanǂan tsise ta ge go hā. Nēsi ta ge oa tsî ǃûi-ao ǀhomǃgāb Persiab dib ǃoagu nî ǃkham. ǁNās khaoǃgâb ge ǃûi-ao ǀhomǃgāb Grikeǃhūb diba nî hā. Tita nî hui khoe-i xare-i ge a ǀkhai, Israeli di ǃûi-ao ǀhomǃgāb Mixaeli ǀguib.
© Khoekhoegowab Elobmîs © Bible Society in Namibia, 2020.
