ǀGam kēbo-aokha
1 Tsî ta ge ǀnō-ūda-i khami ī haiba māhe tsî ge mîbahe: “ǃGû î Elob di Tempeli tsî altars tsîra sī ǀnō, î ǁnāpa ra ǀgoreǀîna ǃgôa, 2 xawe Tempeli di ai-ommi, ǃauga hâba tā ǀnō, ǁîb ge ǀūbena a māhe xuige. ǁÎn ge ǃAnu ǃĀsa hakadisiǀgamǀa ǁkhâgu di ǁaeba nî dāǀhani. 3 Tsî ta ge tita ti ǀgam ǃkhō-amaokha ǀgaiba nî mā, ǀhaosarana ǂgaeǂgā hâse ǁnā ǀguiǀoadisiǀgamkaidisi tsî ǃnanidisi tsēde kēbosa.”
4 ǁÎkha ge ǁnā ǀkherahaikha tsî ǁkhāti ǀgam ǃamǀaekandelarkha hîa ǃhūbaib di ǃKhūb aiǃâ mâkha. 5 Khoe-i ga ǁîkha ǂkhôa ǂgao, os ge ǀaesa ǁîkha amsa xu ǂoaxa tsî ǁîkha di khākhoena nî hîkākā tsî ǁnāti i ge ǁîkha ga ǂkhôadī ǂgao-i hoa-e nî ǃgamhe. 6 ǁÎkha ge ǀhomma ǂganams di ǀgaiba māhe hâ, ǁîkha kēbosis di tsēdi ǃnâ i ǀapi tidese. ǁKhāti kha ge ǁgamma ǀaob ǃnâ ǀkharaǀkharas ǀgaiba māhe hâ; tsî ǁkhāti ǁkhāsib ǃhūbaiba mâ tsûtsû-ai-i hoa-i ǀkha ǁîkha ra ǂgaos kōse ǂnaus diba.
7 Tsî ǁîkha ga ǃkhō-ams âkha ǀkha toa, ob ge ǀgurub hîa ǃgam āba xu ra ǂoaxaba ǁîkha ǀkha nî torodī, ǁîkha dan tsî nî ǃgamse. 8 ǁÎkha di ǁō hâ sorora ge danaǃganni ǁnā ǂanǂansa ǃās ǁîkha di ǃKhūb ge ǁîs ǃnâ ǃgâuhes dib ǃnâ nî ǁgoe. ǁNā ǃās di gagasi ǀons ge Sodoms tsî Egiptes ti hâ. 9 Tsî khoen, ǃhaodi, gowagu tsî ǁaedi din ge ǁîkha di ǁō hâ sorora ǃnona tsî ǃkhare tsēde mû tsî ǁîkha nî ǁkhōhe ǃkhaisa mā-am tide. 10 ǃHūbaib ai ǁan hâ khoen ge ǁîkha ǁōb ǂama kaise nî ǃgâiaǂgao. ǁÎn ge ǁâudī tsî ǀkhaexūna nî sîbagu, nē kēbo-aokha ge kai tsûba khoesib ǂama hā-ū xui-ao. 11 Tsî ǃnona tsî ǃkhare tsēdi khaoǃgâ i ge ûiba ra mā ǂoa-e Eloba xu hā tsî ǁîkha ǃnâ ge ǂgâ tsî kha ge ge khâimâ; on ge ǁîkha ge mûn hoana kaise ge ǃao. 12 Tsî kha ge nē ǀgam kēbo-aokha dom-i ǀhomma xu “ǃApa hā re!” ti ǃgarise ra ǂgai-e ge ǁnâu. Khākhoen âkha di mûǁae kha ge ǃâus ǃnâ ǀhommi ǃoa ge ǃapa. 13 Tsî i ge ǁnātimîsi kai ǃhūǂgubi-e ge hâ. Disiǁîǃâb ǃās dib ge ge hîkākāhe tsîn ge hûǀoadisi khoena ge ǁō; tsî naun hîa ge ûiǃgaun ge kaise ǃao tsî ǀhommi di Eloba ǃgôasiba ge mā.
14 ǀGamǁî tsūb ge go ǃgôa-ī, mû ǃnonaǁîb ge ǃhaese nî hā!
Hûǁî xâiǁnâs
15 Hûǁî ǀhomǃgāb ge ǁîb di xâiǁnâsa xâi, o gu ge ǃgari domga ǀhommi ǃnâ ge ǁnâuhe, mî raga:
“Gaosib ǃhūbaib dib
ge a nē sada ǃKhūb
tsî ǁîb di Xristub* di
tsîb ge ǁîba
ǀamosib kōse nî gaosîsen!”
16 O gu ge ǀgamdisihakaǀa ǂnomdomgu* hîa trondi âgu ai Elob aiǃâ ge ǂnôa iga aidi ǂama ǀgoreǀî nîse ǁnāǁgoe 17 tsî ge mî:
“Gangan tsî ǃKhū Elo Hoaǀgaixa,
sats hâ ats tsî hâ ge itsa.
Sa kai ǀgaiba sîsenū
tsîts go gaosîsentsoatsoa ǃkhais ǃaroma.
18 ǁAedi ge ǁaib xa ge ǀoa
sa ǁaib di ǁaeb go hā xui-ao,
ǁō hân nî ǀgoraǃgâhese.
ǁAeb ge go hā mādawa-amts nîba,
sa ǃgān, kēbo-aon tsî ǃanun,
tsî ǁnān sa ǀonsa ra ǃaoǃgân, ǂkharin tsî kaina.
Tsî ǁnān hîa ǃhūbaiba ra hîkākān ge nî hîkākāhe!”
19 Tsîb ge Elob di Tempeli ǀhommi ǃnâ hâba ge ǁkhowa-amsen, os ge ǁîb ǃGaeǀhaos ǂGaesa ǁnāpa ge mûhe. Tsî gu ge napagu, ǂkhupigu, ǃgurugu, ǃhūǂgubib tsî kai ǃnareb tsîga ge hā.
© Khoekhoegowab Elobmîs © Bible Society in Namibia, 2020.
