ǁÂudīb ǁnaetsanas
ǁNaeǃnans ǂgaeǂgui-aob ǃoa
Gitits ǁnaedaob ai, Asafa xu
1 Dâxase Elob sada ǀgaiba ǁnaeba re
dâba re Jakob di Eloba.
2 ǁNaetsana-e ǁnae î ǃkhomǃkharurude ǀō kai re,
ǃgâise ra ǀō harps tsî siters ǀkha.
3 Xâiǁnâsa ǂkhamǁkhâb ǃnâ xâi re
ǀoasa ǁkhâb ǃnâ, sada ǁâudītsēs ai.
4 Nē-i ge Israeli ǂnûiǂgā-i,
Jakob Elob di ǂhanu-e.
5 ǁÎb ge Josefi ǃnâ ǃkhō-amsa ge mîmā
Egipteba xūb ge ǃgûǂoao.
ǀŪ ta a gowa-i ǃnâ ta gege ǁnâu:
6 “ǁÎb ǃhōsa xu ta ge ǃgomma ge ūǁnâ
ǃomkha âb ge taniǀharusa xu go ǃnora.
7 ǃGommi ǃnâts ge ǂgaiǂui
o ta ge ge huiǂui tsi.
Ti sâuǃkhaisa xu ta ge ǃgurub ǃnâ ge ǁnâu-am tsi,
satsa ta ge Meribas di ǁgamgu tawa ge ǃâitsâ.
8 Ti khoedo, ǁnâu re, a ta ǃkhâikhom du re!
Israeltse, îts ga koma ǃgâ te.
9 ǀKhara elo-i ge sa ǃnâ hâ tide;
ǃhao elon aiǃâts ge ǃhonǁgoa tide.
10 Tita ge ǃKhūta, sa Elota,
satsa Egipteba xu ge ǂgaeǂguiǂui ta.
Ams âtsa harase ǁkhowa-am, î ta ǁîsa ǀoaǀoa.
11 “Xawen ge ti khoena ti domma ǃgâ tama ge i
tsî Israeli ge tita ǃnâ māǁnâsen tama ge i.
12 O ta ge tita ǁîna ǂgaob ân di ǃnâudanaxasib ǃnâ ge māǁnâ,
în ǁîn di ǂhunuma ǀapedi ǃoa ǃgû.
13 Ti khoen ga ǃgâ te hâ,
os ge Israelsa ti daob ǃnâ ga ǃgû hâ.
14 O ta ge ǃhaese khākhoen âna ga ǃgamǃgam hâ;
tsî ǁîn mâǃoasaben ai ti ǃomma ga daba hâ.
15 On ge ǁnān ǃKhūba ǁkhan hâna ǁîb aiǃâ nî ǂhana
ǁnāb ge ǁîn ǁkharaba ǀamos kōse.
16 ǁÎb ge ǁîna ǂoaǂamsa ǃhorob ǀkha nî ǂûmā
tsî ǀuisa xu danib ǀkha ra ǁâǁâ.”
© Khoekhoegowab Elobmîs © Bible Society in Namibia, 2020.
