ǂKhîbagus tsēs
1 Aronni ǀgam ǀgôakha hîa anu tamase kha ge ǃKhūb Tentomma ǀgū ǃkhais ǃaroma ge ǃgamhekha di ǁōb khaoǃgâb ge ǃKhūba Moseba ge mîmā: 2 “Sa ǃgâsab Aronna mîba, îb tā hoaǁae ǂgāmâisab ǃgâb ai, Hoan xa ǃAnu ǃKhaib tita ra ǃâus ǃnâ ǃGaeǀhaos ǂGaes di ǂganais ai ǁgôaxab tawa ǂgâ. Nēsab ga ǁnâuǀnam tama i, ob ge nî ǃgamhe. 3 Hoan xa ǃAnu ǃKhaib ǃnâb ge ǁîba ūo ǂkham ǁgōbab ga ǁoreǁguibas ǃaroma tsî ūo ǁkhaoba khauǁguibas ǃaroma ǀkhī-ūs khaoǃgâ ǀgui a ǂgâ ǁkhā.”
4 Aronni ge Hoan xa ǃAnu ǃKhaib tawab nî ǂgâs aiǃâ ǁāsen tsî sao ra ǀgaub ai nî anasen: Tsaura lapin ǀkha kurusa anaǂamsarab tsî ǃnubu purukhoes, kamanaǃgaesenni tsî ǃkhaiǀgapas tsîna.
5 Israelǁaes ge Aronna ǀgam pirikha ǁoreǁguibas ǃaroma tsî ǁkhaoba khauǁguibas ǃaroma nî mā. 6 ǁÎb ge ǂkham gomaba ǁîb ǂûb tsî omaris âb di ǁoren ǀûbas tsî ǂkhîbagus ǃaroma nî ǁguiba. 7 ǁNās khaoǃgâb ge ǁîba ǀgam pirikha ǃKhūb di Tentommi ǂgâ-ams tawa nî ǀkhī-ū. 8 ǁNāpab ge Aronna ǀgam ǀuira ǂnōgus ǃaroma nî sîsenū, ǀguisa “ǃKhūb ǃaroma” ti saos ase tsî nausa “Asaseli ǃaroma” ti saos ase. 9 ǁÎb ge ǂnōgus ga ǁgauǂui piriba ǁoreǁguibas ǃaroma ǃKhūb di ǃgôasib ǃoa nî ǁguiba. 10 Asaseli ǃaroma ra ǂnōgus xa ǁgauǂuihe pirib ge ûitsamase ǃKhūb aiǃâ nî ǀkhī-ūhe tsî ǁnās khaoǃgâ Asaseli ǃoa ǃgaroǃhūb ǃnâ, khoen ǂkhîbagus ǃaroma nî ǁnāxūhe.
11 Aronni ga ǂkham gomaba ǁîb ǂûb tsî omaris âb di ǁoren ǀûbas tsî ǂkhîbagus ǃaroma ǁguiba, 12 ob ge ǁîba altarsa xu ǀgamsa ǂnomdi xa ǀoa hâ ǀaepanni tsî ǃomra ǀoa ǃgâihamxūn tsîna ū tsî ǁîna Hoan xa ǃAnu ǃKhaib tawa nî sī-ū. 13 ǃKhūb di ais aiǃâb ge ǃgâihamxūna ǀaes ai nî tsoro, tsî ǀaes di ǀanni ge ǃâus khami ǃGaeǀhaos ǂGaes di ǂganaisa nî ǃgū-ai, ǁîb ǁîsa mû tsî ǃgamhe tidega.ǃGâihamxūn ra ǀgapipristeri xa ǂhubi-aihe altars 14 Gomab di ǀaoba xub ge ǁîba ǀnî ǀao-e ū tsî ǁîb di ǀkhunub ǀkha ǂganais aiǃâ ǀgapi tsî ǀnî ǀaoba ǃGaeǀhaos ǂGaes aiǃâ hû ǃnāde nî ǀgapi.
15 Nēs khaoǃgâb ge khoen di ǁoren ǃaroma ǁoren ǀûbas di piriba ǂā, ǁîb di ǀaoba Hoan xa ǃAnu ǃKhaib ǃnâ sī-ū tsî ǀaoba ǂganais ai tsî ǃGaeǀhaos ǂGaes aiǃâ nî ǀgapi, gomab di ǀaob ǀkhab ge dīs ǁkhās xase. 16 Nē ǀgaub aib ge Aronna Israelǁîn di ǃanuoǃnâsib tsî ǁîn di ǂkhîbagus ǃaroma Hoan xa ǃAnu ǃKhaiba nîra ǃanuǃanu. ǃGau ra ǃâb ǃKhūb di Tentommi dib ge ǁore-aon hâǃkhaib ǁaegub mâ xui-ao nî ǃanuǃanuhe. 17 Aronni ǃanuǃanus di sîsennab nî dīse Hoan xa ǃAnu ǃKhaib ǃnâ ǂgâ tsî ǂoaxa tamas kōse i ge khoe-i xare-e ǃKhūb di Tentommi ǃnâ ǂkhîbagusa dīs ǃaroma ǂgâsa mā-amhe tama hâ. ǁÎb, ǁîb omaris tsî hoaraga Israelǁaes ǃaromab ga ǂkhîbagus sîsenna dī, 18 ob ge khauǁguibas ǃaroma altars ǁga ǂoa tsî ǁîs ǃaroma ǂkhîbagus ǁguibasa nî dī. ǁÎb ge ǀnî ǀaob gomab dib tsî pirib dib tsîna ū tsî hoa haka ǁnâgu altars digu ai nî ǂkhau. 19 ǁÎb di ǀkhunub ǀkhab ge ǀaoba hû ǃnāde altars ai nî ǀgapi. Nēs ǀkhab ge altarsa Israelǁîn ǁorena xu ǃanuǃanu tsî nî khai.
ǁOren ǀûbas pirib
20 Aronni ga Hoan xa ǃAnu ǃKhaib, ǃgau ra ǃâb ǃKhūb di Tentommi dib tsî altars tsîn di ǃanuǃanus sîsenni ǀkha toao, ob ge ǁîba Asaseli ǃaroma ge ǁgauǂuihe ûitsama piriba ǃKhūba nî hā-ūba. 21 ǁÎb ge ǃomkha âba pirib di danas ai ǁgui tsî Israelǁîn di ǂkhaban hoan, dīsādi tsî ǁoren hoana ǁguiǁnâ tsî pirib ǃnâ nî sîǂgā. ǁNās khaoǃgâb ge nē piriba ǁgaumâisa khoeb xa ǃgaroǃhūb ǃnâ nî sauruǂgāhe. 22 Tsîb ge nē piriba ǁîn di ǁoren hoana tani hâse ǃgaroǃhūb ǃoa nî sauruǂuihe.
23 ǁNās khaoǃgâb ge Aronna ǃKhūb di Tentommi ǃnâ ǂgâ, pristersi saran hîab ge Hoan xa ǃAnu ǃKhaib ǃnâb nî ǂgâs aiǃâ ana hâ ina ǂgaeǂui tsî ǁîna ǁnāpa nî ǁnāxū. 24 ǁÎb ge ǃAnu ǃKhaib tawa ǁāsen tsî saran âba nî ǂgaeǂgā. ǁNās khaoǃgâb ge ǂoa tsî ǁîb tsî ǁîb di khoen di ǂkhîbagus ǃaroma khauǁguibasa nî dī. 25 ǁÎb ge ǁaes ǁoren ǃaroma ǀgoan di kauba nî ǂhubi. 26 ǁNā khoeb hîa piriba Asaseli ǃoa ǃgaroǃhūb ǃnâ ge sauruǂuib ge hâǃkhaib tawab nî oahās aiǃâ ǁāsen tsî saran âb tsîna nî ǁā. 27 Gomab tsî pirib tsîkha ǁoren ǀûbas ǃaroma gere sîsenūhekha, ǀaob âkha ge Hoan xa ǃAnu ǃKhaib ǃnâ ǂgâ-ūhekha di khōkha, ǁgan-i tsî ǃnāxūn tsîn hoan ge hâǃkhaiba xu taniǂuihe tsî nî ǂhubiǂuihe. 28 ǁNā khoe-i hîa ǁîna ra ǂhubiǂui-i ge hâǃkhaib ǁga i nî oahās aiǃâ ǁî-i sarana ǁā tsî nî ǁāsen.
ǂKhîbagus tsēs di ǂâiǂâisens
29 Hoaǁae gu ge sao ra ǁgaraga nî sîsenūhe: Disiǁî tsēs, hûǁî ǁkhâb dis ain ge Israelǁîn tsî Israelǁî taman, ǁîn ǁaegu ǁan hân tsîna ǂûtama* hâ tsî sîsen-i xare-e dī tide. 30 ǁNā tsēs ais ge ǂkhîbagusa sadu ǃaroma nî dīhe, tsî sadu hoadu di ǁorena xu du ge ǃKhūb mûǁae nî ǃanuǃanuhe. 31 ǁNā tsēs ge ǃanus ase nî ǃgapaǀîhe, ǁîs ain ǁîna ǂûtama hâ tsî sîsen-i xare-e dī tidesa. Hoaǁae gu ge nē ǁgaraga nî ǁnâuǀnamhe. 32 ǀGapipristeri ǁgûb di amǃnâs ai ǀnauhe tsî nî mâiǂgāheb ge ǂkhîbagus di sîsenna nî dī. ǁÎb ge pristersi sarana ǂgaeǂgā 33 tsî Hoan xa ǃAnu ǃKhaib, ǃgau ra ǃâb ǃKhūb di Tentommi dib, altars, pristergu tsî hoaraga Israelǁîna ǂkhîbagus di sîsenna nî dība. 34 Hoaǁae gu ge nē ǁgaraga nî ǁnâuǀnamhe. Israelǁîna ǁîn di ǁoren hoana xu ǃanuǃanus ǃaromab ge ǂkhîbagus di sîsenna kurikorobe nî dīhe.
Moseb ge ǃKhūb ge mîmā bi khami ǀgui ge dī.
© Khoekhoegowab Elobmîs © Bible Society in Namibia, 2020.
