ǀGamǁî ǃgôakhâis khoen dis
1 ǁNā ǂhīǁōb khaoǃgâb ge ǃKhūba Moseb tsî Aronni ôab, Eleasar hâkha ǃoa ge mî: 2 “Hoaraga ǀaokhoen Israelǁaes din, hoaraga aorekhoegu ǀgamdisis xa ǃnāsa kurina ūhâgu, toroǃkhams ǃaroma ǃgâiǂâu hâga ǃgôakhâi.” 3-4 Moseb tsî prister Eleasar hâkha ge nēsa ǁnâuǀnam tsî hoaraga aorekhoegu ǀgamdisis xa ǃnāsa kurina ūhâga Moabǂgāgu, Jordanǃāb ǀgūse Jerixos ǃoagu ǁgoegu tawa ge ǂgaiǀhao.
Nēn ge Israelǁîn Egipteba xu ge hāna:
5 Rubenni ǃhaos ge (Rubenni ge Jakob di ǂguro ǀgôa ge iba) Hanoxi, Palub, 6 Hesronni, tsî Karmib hâgu ǃhaoǃnāde xu hâ. 7 Nē ǃhaoǃnādi aorekhoegu ge ǀhaob ai hakadisiǃnonaǀaǀoadisi tsî hûkaidisiǃnonadisi ge i. 8 Palub di surib ge Eliab 9 tsî ǁîb ôagu Nemueli, Datanni tsî Abirammi tsîga ge i. (Datanni tsî Abiram hâkha ge ǀhûhâsib xa ge ǁhûihe hâ i. ǁÎkha ge Moseb tsî Aron hâkha ǃoagu khâikhâisen tsî Koraxi saoǃgonaona ǁhao tsî ǃKhūb ǃoagu ge khâikhâisen. 10 ǃHūb ge ǁkhowa-amsen tsî ǁîkha ge haraǂgā, tsî kha ge Koraxi tsî ǁîb saoǃgonaon ǀaeb ǃnâ gere ǂhubiǁō ǀgamkaidisi tsî korodisi khoegu hoagu tsîn ǀkha ǀguipa ge ǁō. ǁÎn di ǁōb ge nau khoen ǃaroma ǃkhâikhoms ase ge i i. 11 Xawe Koraxi di ôagu ge ǃgamhe tama ge i.)
12 Simeonni ǃhaos ge Nemueli, Jaminni, Jaxinni, 13 Serab tsî Saul hâgu ǃhaoǃnāde xu ge hâ i. 14 Nē ǃhaoǃnādi aorekhoegu ge ǀhaob ai ǀgamdisiǀgamǀaǀoadisi tsî ǀgamkaidisi ge i.
15 Gadi ǃhaos ge Sefonni, Hagib, Sunib, 16 Osnib, Erib, 17 Arodi tsî Arelib hâgu ǃhaoǃnāde xu ge hâ i. 18 Nē ǃhaoǃnādi aorekhoegu ge ǀhaob ai hakadisiǀoadisi tsî korokaidisi ge i.
19-21 Judab di ǃhaos ge Selab, Peresi, Serab, Hesronni tsî Hamul hâgu ǃhaoǃnāde xu ge hâ i. (Judab di ôakha, Eri tsî Onan hâkha ge Kanaanǃhūb ǃnâ ge ǁō.) 22 Nē ǃhaoǃnādi aorekhoegu ge ǀhaob ai hûdisiǃnaniǀaǀoadisi tsî korokaidisi ge i.
23 Isaskari ǃhaos ge Tolab, Puvab, 24 Jasub tsî Simron hâgu ǃhaoǃnāde xu ge hâ i. 25 Nē ǃhaoǃnādi aorekhoegu ge ǀhaob ai ǃnanidisihakaǀaǀoadisi tsî ǃnonakaidisi ge i.
26 Sebulonni ǃhaos ge Seredi, Elonni tsî Jaleel hâga ge i. 27 Nē ǃhaoǃnādi aorekhoegu ge ǀhaob ai ǃnanidisiǀoadisi tsî korokaidisi ge i.
28 Josefi ǃhaos ge ǁîb di ǀgam ǀgôakha Manaseb tsî Efraim hâkha xu ge hâ i.
29 Manaseb ǃhaos: Manaseb ôab, Makiri di ôab ge ge Gilead i, tsî sao ra ǃhaoǃnādi ge Gileadi suriba xu ge hâ i: 30 Ieseri, Heleki, 31 Asrieli, Sexemmi, 32 Semidab tsî Hefer hâga. 33 Heferi ôab, Selofehadi ge aoreǀgôa-e ge ūhâ tama hâ i, xawe sao ra ǀgôadi ǀguide ge ūhâ i: Maxlas, Noas, Hoglas, Milkas tsî Tirsas hâde. 34 Nē ǃhaoǃnādi di aorekhoegu ge ǀhaob ai ge korodisiǀgamǀaǀoadisi tsî hûkaidisi i.
35 Efraimmi ǃhaos ge Sutelab, Bekeri tsî Tahan hâgu ǃhaoǃnāde xu ge hâ i. 36 Eranni ǃhaoǃnādi ge Sutelab suriba xu ge hâ i. 37 Nē ǃhaoǃnādi aorekhoegu ge ǀhaob ai ge ǃnonadisiǀgamǀaǀoadisi tsî korokaidisi i.
Nēdi ge ǃhaoǃnādi Josefi suriba xu ge hâ ide.
38 Benjaminni ǃhaos ge Belab, Asbeli, Ahirammi, 39 Sefufammi tsî Hufam hâgu ǃhaoǃnāde xu ge hâ i. 40 Ardi tsî Naamanni ǃhaoǃnādi ge Belab di suriba xu ge hâ i. 41 Nē ǃhaoǃnādi aorekhoegu ge ǀhaob ai ge hakadisikoroǀaǀoadisi tsî ǃnanikaidisi i.
42 Danni ǃhaosa xus ge Suhammi ǃhaoǃnāsa ge hâ i. 43 Nē ǃhaoǃnās aorekhoegu ge ǀhaob ai ge ǃnanidisihakaǀaǀoadisi tsî hakakaidisi i.
44 Aseri ǃhaos ge Imnab, Isvib tsî Beriab hâgu ǃhaoǃnāde xu ge hâ i. 45 Heberi tsî Malxiel hâkha ǃhaoǃnāra ge Beriab di suriba xu ge hâ i. 46 Aseri ge Sera ti ǀon hâ ǀgôasa ge ūhâ i. 47 Nē ǃhaoǃnādi aorekhoegu ge ǀhaob ai ge korodisiǃnonaǀaǀoadisi tsî hakakaidisi i.
48 Naftalib ǃhaos ge Jaseeli, Gunib, 49 Jeseri tsî Silem hâgu ǃhaoǃnāde xu ge hâ i. 50 Nē ǃhaoǃnādi aorekhoegu ge ǀhaob ai ge hakadisikoroǀaǀoadisi tsî hakakaidisi i.
51 ǀHao hâ ǃgôab hoaraga Israelǁî aorekhoegu dib ge ǃnanikaidisi tsî ǀguiǀoadisi tsî hûkaidisiǃnonadisi ge i.
52 ǃKhūb ge Moseb ǃoa ge mî: 53 “ǃHaodi di ǂguisib ǃoa, ǃhūba ǁîdi ǃnâ ǀgoraǂgā. 54-56 ǃHūba ǂnōgusa sîsenūs ǀkha ǀgoraǂgā, kai ǃâsa, kai ǃhaosa mā, î ǂkhari ǃâsa, ǂkhari ǃhaosa.”
57 Levib di ǃhaos ge Gersonni, Kohati tsî Merarib hâgu ǃhaoǃnāde xu ge hâ i. 58 ǁÎgu di surib ge Libnib, Hebronni, Malib, Musib, tsî Korax hâgu ǀaokhoena xu ge hâ i. Kohati ge Amrammi di ôa ge iba. 59 ǁÎb ge Levib ôas Joxebeds, Egipteb ǃnâ ge ǃnaes, ǀkha ge ǃgame hâ i. ǁÎs ge Aronni tsî Moseb hâkha tsî ǁîkha ǃgâsas Miriams tsîna Amramma ge ǁoraba. 60 Aronni ge haka ǀgôagu Nadab, Abihub, Eleasari tsî Itamari tsîga ge ūhâ i. 61 Nadab tsî Abihub hâkha ge ǃanuoǃnâ ǁguibasa kha ge ǃKhūb di ǃgôasib ǃaroma ǁguiba hâ i amaga ge ǁō. 62 Aore Leviǁîgu, ǀgui ǁkhâxasa xu ǀgapise ge hâ igu ge ǀhaob ai ge ǀgamdisiǃnonaǀaǀoadisi i. ǁÎgu ge Israelǁîgu ǀkha ǀguipa ǃgôakhâihe tama i tsî ǀguri ge ǃgôakhâisa i, Israeli ǃnâ gu ge ūhâxūna māhe tama hâ i xui-ao.
63 Moseb tsî Eleasar hâkha ge nē ǃhaoǃnādi hoade Israelǁîn di ǃgôakhâisa kha gere dīo, Moabǂgāgu, Jordanǃāb ǀgūse Jerixos ǃoagu ǁgoegu tawa gere dī. 64 Moseb tsî Aron hâkha ge Sinaiǃgaroǃhūb ǃnâ ǃgôakhâi hâ i khoegu di ǀguib tsîn ge ǃkharuǀkhāhe tama ge hâ i. 65 ǃKhūb ge ge mî hâ i, hoaraga aorekhoegu nî ǃgaroǃhūb ǃnâ ǁōsa, xawe kha ge Jefuneb ôab, Kaleb tsî Nunni ôab, Josuab tsîkha ge sâuhe.
© Khoekhoegowab Elobmîs © Bible Society in Namibia, 2020.
