Aronni ôagu
1 ǃKhūb ge Moseb ǀkha Sinaiǃhommi ai gere ǃhoa ǁaeb ai kha ge Aronni tsî Moseb hâkha ǀnai suriba ge ūhâ i. 2 Aronni ge haka ǀgôaga ge ūhâ i: ǂGuro ǀgôab Nadab tsî Abihub, Eleasari tsî Itamari tsîga. 3 ǁÎgu ge ǀnauhe tsî pristerse ge mâiǂgāhe, 4 xawe kha ge Nadab tsî Abihub tsîkha ǃanuoǃnâ ǀaesa kha ge ǃKhūb di ǃgôasib ǃaroma Sinaiǃgaroǃhūb ǃnâ ǁguiba, o ge ǃgamhe. ǁÎkha ge ge ǀgôao i, ǁnā-amaga kha ge Eleasari tsî Itamari tsîkha Aronni ûiǁaeb hoaba pristerse gere ǃoaba.
Leviǁîgu ge pristerga gu nî ǃoabase ra ǁgaumâihe
5 ǃKhūb ge ǃaruǀî Moseb ǃoa ge mî: 6 “Levib ǃhaosa aisǀkhāb ǁga ǂoaxa-ū, î ǁîna prister Aronnan nî ǃoabase ǁgaumâi. 7 ǁÎn ge ǃKhūb di Tentommi ǃaroma ǂhâbasa ǃoabade dī, pristergu di ǁgui-aide dī tsî ǁkhāti hoaraga ǀhûhâsib ǃaroma ǁguiǂamde nî dī. 8 Hoaraga sîsenūxūn ǃKhūb di Tentommi ǃnâ ra sîsenūhen di ǃereamsa ū tsîn ge hoaraga Israelǁîn ǃaroma ǁgui-aide nî dī. 9 Leviǁîn ǁîs ǀguisa ūhâ ǃereams ge Aronni tsî ǁîb di ôagu tsîga ǃoabasa. 10 Aronni tsî ǁîb di ôagu tsîga pristersi sîsenna gu nî dīse ǁgaumâi; xawe ǀnî khoe-i, ǁnāsa ga dītsâ-i hoa-i ge nî ǃgamhe.”
11 ǃKhūb ge ǁkhawa Moseb ǃoa ge mî: 12-13 “Leviǁîn ge nēsisa xu a ti. Hoaraga ǂguroǃnaesan Egipteb dina ta ge ǃgam, o ta ge mâ ǂguroǃnaesab Israelǁîn omaris tsî ǀgoan diba tise ge ūbasen. Xawe nēsi Israelǁîn di ǂguroǃnaesaba ūbasens xa ta ge Leviǁîna tise ūhâ; ǁîn ge a ti. Tita ge ǃKhūta.”
Leviǁîn di ǃgôakhâihes
14 ǃKhūb ge Moseba Sinaiǃgaroǃhūb ǃnâ ge mîmā, 15 îb Leviǁîn ǃhaoǃnās tsî ǀaokhoena xu, ǀgui ǁkhâxasa xu tsî ǁnās xa kai aore ǀgôarob hoaba xoamâi. 16 Ob ge Moseba ǁnāti ge dī. 17-20 Levib ge ǃnona ǀgôaga ge ūhâ i: Gersonni, Kohati tsî Merarib tsîga. ǁÎgu ge Levib ǃhaos di ǃhaoǃnādi, ǁîgu ǀondi ǃoa ge ǂgaihedi di aboxaga. Gersonni ge ǀgam ǀgôakha ge ūhâ i: Libnib tsî Simeib hâkha; Kohati ge haka ǀgôaga ge ūhâ i: Amrammi, Isari, Hebronni tsî Usieli tsîga; tsî Merarib ge ǀgam ǀgôakha ge ūhâ i: Malib tsî Musib hâkha. ǁÎgu ǀondi ǃoa ge ǂgaihe ǀaokhoen di aboxagu ge ǁîga.
21 Gersonni ǃhaoǃnās ge Libnib tsî Simeib hâkha di ǀaokhoena xu ge hâ i. 22 ǀGui ǁkhâxasa xu tsî ǁnās xa kai aore ǀgôarogu xoamâihe ge gu ge ǀhaob ai ge hûǀoadisi tsî korokaidisi i. 23 Nē ǃhaoǃnās ge huriǂoasǀkhāb ai, Tentommi ǃgâb ai nî ǂnaumâi, 24 Laeli ôab Eliasafaba Gersonǁîn ǃhaoǃnās di danakhoese. 25 ǁÎgu ge ǃKhūb di Tentommi ǂnamipe sao ra xūn di ǃereamsa ge ūhâ i: ǂGanagab tsî ǃaugab di ǃgū-aikha, ǂgâ-ams di ǂgāmâisab, 26 ǃKhūb di Tentommi tsî altars tsîra di omǂnamib di ǂgāmâisagu, tsî omǂnamib ǂgâ-ams di ǂgāmâisab tsîna. Nē xūn hoan ǂama gu ge ǃereamsa ge ūhâ i.
27 Kohati di ǃhaoǃnās ge Amrammi, Isari, Hebronni tsî Usieli tsîgu di ǀaokhoena xu ge hâ i. 28 ǀGui ǁkhâxasa xu tsî ǁnās xa kai aore axarogu hîa ge xoamâihe gu ge ǁkhaisaǀoadisi tsî ǃnanikaidisi ge i. 29 Nē ǃhaoǃnās ge ǃkhawagasǀkhāb Tentommi dib tawa hâǃkhaiba nî ǂnaumâi, 30 Usieli di ôab, Elisafanna ǃhaoǃnās di danakhoese ūhâse. 31 ǁÎgu ge ǃGaeǀhaos ǂGaes, tāb, ǃamǀaekandelari, altars, pristeri ra ǃAnu ǃKhaib ǃnâ sîsenū xūn tsî Hoan xa ǃAnu ǃKhaib ǂgâ-ams di ǂgāmâisab tsîn di ǃereamsa ge ūhâ i. Nē xūn hoan ǂama gu ge ǃereamsa ge ūhâ i.
32 Prister Aronni di ôab Eleasari ge ge Leviǁîn di danakhoe i. ǁÎb ge ǁnā khoegu ǁîgu ǃereamsa ǃAnu ǃKhaib ǃnâ gere dīga gere mûǂam.
33 Merarib di ǃhaoǃnās ge Malib tsî Musib hâkha di ǀaokhoena xu ge hâ i. 34 ǀGui ǁkhâxasa xu tsî ǁnās xa kai aore axarogu hîa ge xoamâihe gu ge ge ǃnaniǀoadisi tsî ǀgamkaidisi i. 35 Nē ǃhaoǃnās ge ǀapasǀkhāb Tentommi dib tawa nî ǂnaumâi, Surieli ôab, Abihaila ǁîn ǃhaoǃnās di danakhoese ūhâse. 36 ǁÎgu ge ǃereamsa Tentommi di ramdi, ǃnâǃkhâ ǁgoe haigu, ǃgaeǁare-ūdadi, ǂaidi tsî hoaraga sîsenūxūn hoan disa ge māhe. Nē xūn hoan ǂama gu ge ǃereamsa ge ūhâ i. 37 ǁÎgu ge ǁkhāti ǃaugab di omǂnamib ǃgaeǁare-ūdadi, ǂaidi, ankerǀurigu tsî tsurigu tsîn di ǃereamsa ge ūhâ i.
38 Moseb, Aronni tsî Aronni ôagu tsîgu ge aiǂoasǀkhāb, ǃKhūb Tentommi di aisǀkhāb ai ǁîgu hâǃkhaiba ge ǂnaumâi. ǁÎgu ge ǃAnu ǃKhaib ǃnâ Israelǁîn ǃaroma gere dīhe ǃoabadi di ǃereamsa ge ūhâ i. Xawe ǀnî khoe-i ǁnāsa ga dī-i hoa-i ge gere ǃgamhe. 39 Hoaraga Leviǁîn di ǀgôarogu, ǀgui ǁkhâxasa xu tsî ǁnās xa kaigu, Moseb ge ǃhaoǃnādi ǃoa ǃKhūb di mîmās ai a xoamâigu di ǃgôab ge ǀhaob ai ge ǀgamdisiǀgamǀaǀoadisi i.
Leviǁîn ge ǂguroǃnaesagu di ǃkhaisa ra ūǃkhuni
40-41 ǃKhūb ge Moseb ǃoa nēti ge mî: “Hoaraga ǂguroǃnaesagu Israelǁîn digu ge a ti. ǁNā-amaga mâ Israelǁî ǀgôarob ǀgui ǁkhâxasa xu tsî ǁnās xa kaib hoab di ǀonsa xoamâi. Xawe ta ge ǁîgu di soas ai hoaraga Leviǁîna tin ase ra mîǁgui! Tita ge ǃKhūta! Tsî ta ge ǁkhāti Leviǁîn di ǀgoan ǂguroǃnaesaga nau ga hâ ǀgoan di ǂguroǃnaesagu soas ai ra mîǁgui.” 42 Moseb ge nē ǁguiǂamsa ǁnâuǀnam tsî hoaraga ǂguroǃnaesagu, 43 ǀgui ǁkhâxasa xu tsî ǁnās xa kaiga ge xoamâi; ǁîgu ǃgôab ge ǀhaob ai ǀgamdisiǀgamǀaǀoadisi tsî ǀgamkaidisihûdisi ǃnonaǀa ge i.
44 ǃKhūb ge ǃaruǀî Moseb ǃoa ge mî: 45 “Nēsi Leviǁîn di ǂguroǃnaesagu hoaga Israelǁîn di ǂguroǃnaesagu soas ai tsî Leviǁîn ǀgoan di ǂguroǃnaesaga Israelǁîn ǀgoan di ǂguroǃnaesagu soas ai tita khaiba. 46 Israelǁîn ǂguroǃnaesagu ǀgamkaidisi hûdisiǃnonaǀa ǃgôab ǀkha Leviǁîgu xa a ǃnāsa, xui-ao gu ge ǃnā ra ǃgôab diga nî ǁama-oahe. 47 Mâb hoab ǃaroma koro ǀhaiǀuride matare, mîǁguisa ǁgarab ǃoa, 48 î nē marisa Aronni tsî ǁîb ôagu tsîga mā.” 49 Moseb ge ǁnāsa ǁnâuǀnam 50 tsî ǀguiǀoadisi ǃnonakaidisi tsî ǃnanidisikoroǀa ǀhaiǀuride ū 51 tsî Aronni tsî ǁîb ôagu tsîga ge mā.
© Khoekhoegowab Elobmîs © Bible Society in Namibia, 2020.
