Nehemia 10 - Khoekhoegowab New Translation 2020 (KKG20)

1 ǂGurose ge ǂganamǀgaiǀgaikha ge gowonia Nehemiab, Hakaljab ôab tsî Sedekiab tsîkha. ǁNās khaoǃgâ ra saogu ge:

2-8 Pristergu:

Serajab, Asariab, Jeremiab,

Pashuri, Amariab, Malkiab,

Hatusi, Sebanjab, Maluki,

Harimmi, Meremoti, Obadjab,

Danieli, Ginetonni, Baruki,

Mesulammi, Abiab, Mijaminni,

Maasjab, Bilgaib tsî Semajab tsîga.

9-13 Leviǁîgu:

Asanjab ôab Jesuab,

Binuib, Henadadi ǃhaoǃnās dib,

Kadmieli, Sebanjab, Hodiab,

Kelitab, Pelajab, Hananni,

Mikab, Rehob, Hasabjab,

Sakuri, Serebjab, Sebanjab,

Hodiab, Banib tsî Beninub tsîga.

14-27 ǁAes di ǂgaeǂgui-aogu:

Parosi, Pahat-Moab,

Elammi, Satub, Banib,

Bunib, Asgadi, Bebaib,

Adoniab, Bigvaib, Adinni,

Ateri, Hiskiab, Asuri,

Hodiab, Hasummi, Besaib,

Harifi, Anatoti, Nebaib,

Magpiasi, Mesulammi, Hesiri,

Mesesabeli, Sadoki, Jaduab,

Pelatjab, Hananni, Anajab,

Hoseab, Hananjab, Hasub,

Halohesi, Pilhab, Sobeki,

Rehummi, Hasabnab, Maasejab,

Ahiab, Hananni, Ananni,

Maluki, Harimmi tsî Baanab tsîga.

ǁAes di mîǀguib

28 ǃGau ge ǁaes, pristergu, Leviǁîgu, Tempelǃûi-aogu, ǁnae-aogu, Tempelǃgāgu tsî nau khoen hoan, Elob ǂhanub ǃaroma ge ǃhūb ǃnâ hâ ǃhaokhoena xu a ǀgorasenn, ǁîgu taradi, ǀgôagu tsî ǀgôadi, kaiǂâu hâ tsî ǁnâuǃā ǁkhān 29 ge ǁîn ǂgaeǂgui-aogu ǀkha ǀhûpe ge nū, ǁîsan ga khôa, ob ǀâxareba ǁîn ǂama nî hāse, Elob ge ǁîb di ǃgāb Moseb ǃnâ-u mā ǂhanub, Elob dib ǃoan nî ûisa; ǃKhūb, sida ǃKhūb di mîmāde ǁnâuǀnam tsî ǁîb ǂhanugu tsî ǂnûiǂgāde nî ǃkhōǀgaipesa.

30 Sida ge sida ǃhūb ǃnâ ǁan hâ ǃhaokhoen ǀkha ǃgameǃnâgu tide.

31 ǃHaokhoen ga ǃhoro-i tamas ka io ǀnî hâ xū-e ǁamaxū nîse Sabbattsēs ais kas, ǀnî sâtsēs ais kas hoasa hā-ū, o da ge ǁîna xu ǁama tide.

Mâ hûǁî kurib hoaba da ge ǃhanaǃhūb ai ǃhanaǂgā tide tsî hoaraga surudena nî ǀariǂui.

32 Mâ kurib hoaba da ge koro kiloxramgu ǃhuniǀuriba Tempeli tawa ra dīhe ǃoabas ǃaroma nî mā.

33 Tempelǃoabas ǃaroma da ge sao ra xūna gere mā: ǁGuibaperegu, tsēkorobe ǃhoroǁguibas, tsēkorobe khauǁguibas ǂāxūn, Sabbattsēdi, ǀAsa ǁKhâb Kaitsēdi tsî nau kaitsēdi di khauǁguibadi, ǂkhîbagus ǁguibadi Israeli ǁoren ǃaroma ra dīhedi tsî Tempeli ǃaroma a ǂhâbasa xū-i hoa-i tsîna.

34 Sida tsî pristergu tsî Leviǁîgu tsîda ge ǀkhūsa nî ao, î da mîǀgui, mâ ǃhaoǃnās ǁguibas ǀaena, kurikorobe mîmâisa ǁaeb ai, ǃKhūb, sada Elob ra dībahe khauǁguibas ǃaroma nî hā-ūsa, ǂhanub di ǂgaoǀkhāde ǃoa.

35 Sida ge mâ kurib hoaba ǂguro ǃhoro-i sida ǃgaos di-i tsî ǂguro ǂûn sida ǂûhaidi din tsîna Tempela ǃoa nî hā-ū.

36 Sida ǂguroǃnaesaga da ge pristerga Tempeli ǃnâ nî sī-ūba, ǂhanub ǃnâ i xoahe hâ khami. ǁNās ǁkhās xase da ge sida goman, gūn tsî pirin di ǂguroǃnaesagu tsîn ǀkha nî dī.

37 Pristerga da ge Tempeli ǃnâ ǂguro ǃhoro-e xu ga dīhe ǀâpere-e nî sī-ūba tsî nau ǁguibadi ǂauxûi-i, ǀkhera-oli-i tsî ǃkharagaǃnâgu haiǂûn tsîna.

Disiǁîǃâsa sida ǃgaroǃādi tawa ra ǀhaoǀhao Leviǁîga da ge disiǁîǃâs sida ǃhanagu ǃgaos disa nî sī-ūba. 38 Aronni surib di pristergu ge disiǁîǃâs ga ǀhaoǀhaohe ǁaeb ai Leviǁîgu ǀkha nî hâ. Leviǁîgu ge ǀhaoǀhaohe ga disiǁîǃâs di disiǁîǃâsa Tempeli di sâuǃnâ-omde ǃoa nî ǃgû-ū. 39 Israelǁîn tsî Leviǁîgu tsîn ge ǃhoro-i, ǂauxûi-i tsî ǀkhera-oli-i tsîn di māde, Tempeli di xapan hâǃnâ sâuǃnâ-omdi tawa nî sī-ū. ǁNāpa gu ge ǁkhāti ǃoaba ra pristergu, Tempelǃûi-aogu tsî ǁnae-aogu tsîga ra hâ.

Sida ge sida Elob omma ǁnāxū tide.