Danaoseb Jesuba Jerusalems ǃnâ ra ǂgâ
(Mateub 21:1-11Lukab 19:28-40Johaneb 12:12-19)
1 Tsî Jerusalemsa gu ge ǀgū, Betfages tsî Betanis tsîra hîa ǀKheraǃhommi tawa ǁgoera tawa, ob ge ǀgam ǁkhāǁkhāsabekha âba sî 2 tsî ge mî: “ǁNā nauǃani ǁgoe ǃāros ǃnâ ǂgâ re. ǂGâ kho ka, o kho ge noxopa ǃgapihe tama ǂkham dâuki-e nî hōmâ. O ǁî-e xore, î nēpa hā-ū re. 3 Tsî-i ga khoe-e dî kho tare-i ǃaroma kho ǁnāsa ra dī ǃkhaisa, o kho ge ‘ǃKhūb ge ǁî-e ǂhâba hâ tsî ǃhaese nî oaǀkhī-ū’ ti nî mî.”
4 O kha ge ǃgû tsî dâukiro-e ǃganni ǃnâ, daos amǃgâ ǃgaemâisase ge hōmâ. Tsî nē dâuki-e kha ra xore hîan 5 ge ǀnî khoena ge dî kha tare-i ǃaroma kha nē dâuki-e ra xore ǃkhaisa. 6 O kha ge Jesub ge mîba kha khami ǁîna ge mîba tsîn ge ge mā-am kha.
7 Tsî kha ge ǁkhāǁkhāsabekha dâuki-e Jesub tawa ge sī-ū. ǁÎkha di anaǂamsarana kha ge ǁîb di ǁâb ai ge ǁgui tsîb ge Jesuba ǁîn ai ge ǂnû. 8 ǂGuin ân ge ǁkhāti ǁîn di sarana daob ai ge khoraǁgui tsîn ge ǀnîna haidi ǁnâuga ǃhanaga xu ǃgaoǁnâ tsî daob ai ge ǁgui. 9 On ge Jesub aisǀkhāb tsî khaosǀkhāb ai ge garu i ǂnubis khoena ge ǂgaiǂui:
“Hosiana!
ǀKhaeheb ge hâ,
ǁnāb ǃKhūb di ǀons ǃnâ ǃgoaxaba!
10 ǀKhaeheb ge hâ gaosib
sada ǁgûb, Davidi diba.
Hosiana
ǀgapiseb ǃnâ!”
11 Tsî Jesub ge Jerusalems tawab ge sī, o Tempeli ǃnâ ge ǂgâ. Hoaraga xūnab ge kōtoas khaoǃgâb ge ǃui i geo, disiǀgamǀagu ǀkha Betanis ǁga ge ǃgû.
Jesub ge ǀnomahaisa ra ǀâxare
(Mateub 21:18-19)
12 Tsî sao ra tsē gu Betanisa xu oagaru hîab ge Jesuba ge ǃâ. 13 ǃNūseba xu ǀnomahaisa ǀoasa ǂnaregu ǀkha mû tsîb ge ge ǃgûsī, iseb ǂûna ǁîs ai hō tide ǃkhaisa nî kōse. Xawe gu ge ǂnaregu ǀguiga ge hâ i, ǁîs di ǂûtaniǁae tamab a xui-ao. 14 Ob ge Jesuba ǀnomahais ǃoa ge mî: “Tātsēs tsînas ge ǁkhawa ǂû-e tani tide.” Tsî gu ge ǁkhāǁkhāsabega mîb gona ge ǁnâu.
Tempeli di ǃanuǃanuhes
(Mateub 21:12-17Lukab 19:45-48Johaneb 2:13-22)
15 Tsî Jerusalems tawa gu ge oasī, ob ge Jesuba Tempeli ǃnâ ǂgâ tsî ǁnāpa gere ǁamaǂharugu khoen hoana ge ǃhaeǂuitsoatsoa. ǁKhātib ge mariǂharugu-aon di tāgu tsî ǂnabuǁamaxū-aon di ǂnû-aiǃnaodi tsîna ge ǂhāǁgui. …ob ge Jesuba Tempeli ǃnâ ǂgâ tsî ǁnāpa gere ǁamaǂharugu khoen hoana ge ǃhaeǂuitsoatsoa. 16 Tsîb ge mā-am tama ge i, khoe-i xare-i Tempeli ǃnâ-u xū-e nî taniǃkharu ǃkhaisa. 17 Tsîb ge ǁîna ge ǁkhāǁkhā: “Xoas ge ra mî: ‘Ti Tempeli ge hoaraga ǁaedi ǃaroma ǀgore-ommi ti nî ǂgaihe’ xawe du ge sado ǁîba ǃnari-aon di ǁhāb ase ge dī.”
18 Tsî danapristergu tsî Moseb ǂhanub* di ǁkhāǁkhā-aogu tsîgu ge Jesub tsî ǁîb di sîsengu xa ǁnâu, o gu ge mâti gu nî ǃgam bi ǃkhaisa ge ǀapetsoatsoa. Xawe gu ge ǁîba gere ǃao, khoen gere kaise ǁîb tsî ǁîb di ǁkhāǁkhādi xa ǃgâise ǃhoa xui-ao. 19 Tsî ǁnāǃoe gu ge Jesub tsî ǁîb di ǁkhāǁkhāsabega Jerusalemsa xu ge ǂoa.
ǀNomahaisa xu hâ ǁkhāǁkhās
(Mateub 21:20-22)
20 Tsî nautsēkamǁgoaga gu ge ǃkharu, o gu ge ǁnā ǀnomahais hîab ge Jesuba ǀâxaresa ǃnomaga xus ǂnâ hâse ge mû. 21 Ob ge Petruba Jesub ge nē ǀnomahais ǁga mî ǀgausa ǂâihō tsî ge mî: “ǁKhāǁkhā-aotse! Sats go ǁari ǀâxare ǀnomahais ge go ǂnâ.”
22 Ob ge Jesuba ǁkhāǁkhāsabegu ǁga ge mî: “Elob ǃnâ ǂgom re. 23 Amase ta ra mîba go, nē ǃhomma go ga ‘Khâima î hurib ǃnâ uriǂgâ’ ti mîba, os ge sago di mîmāsa nî ǁnâuǀnamhe. Hūs di ǂgaoǀkhās ge sago nî ǂgaogu âgo ǃnâ îganǀgē tamase ǂgomsa. 24 Xuige ǃgâise ǃgâ te re. Tare-i ǀgui-i ka xawes tsînats ga ǀgores ǃnâ-u ǂgan ǁkhā tsî ǃkhōǃoats nî ǃkhaisa ǂgom, ots ge ǂgants go xū-e nî ǃkhōǃoa. 25 Xawe ǀgorets kao, aibe ǁî-i ǃoaguts ǀkhaoǂgaoxasiba ūhâ khoe-e ǀûba re, ob kom sa Îb ǀhommi ǃnâ hâb tsîna nî ǀûba tsio.” [26 Tsîts ga ǀûba tama i, ob ge sa Îb ǀhommi ǃnâ hâb tsîna satsa ǀûba tide.]
Jesub ǁkhāsib xa hâ dîs
(Mateub 21:23-27Lukab 20:1-8)
27 O gu ge Jesub tsî ǁîb di ǁkhāǁkhāsabegu tsîna Jerusalems ǁga ge oa. Tsî Tempeli ǃnâb Jesuba ra ǃgûma hîa gu ge danapristergu, ǂnomdomgu* tsî Moseb ǂhanub di ǁkhāǁkhā-aogu* tsîna ǁîb ǃoa ge hā. 28 Tsî gu ge “Mâpa xuts go hō ǁkhāsib ǀkhats kha nē xūna ra dī? Tari-e satsa ǁnā ǁkhāsiba go mā?” ti ge dî bi.
29 Ob ge Jesuba ǁîgu ǃoa ge mî: “Nēsi ta ga dî go dîsa go ga ǂhanuse ǃeream, o ta ge nî mîba go mâ ǁkhāsiba xu ta nēn hoana ra dī ǃkhaisa. 30 Johaneb di ǁāǁnâsa ǀhomma xus ge hâ i, tamas ka io khoena xu? ǃEream te re!”
31 O gu ge ǁîǃnābe ge mîǀîgutsoatsoa: “Mâti ge kha nî ǃeream? Nēsi ge ga ‘ǀhomma xu’ ti mî, ob kom tarexa ge ge ǁnâi ǁîba ǂgom tama hâ i ǃkhaisa nî dî geo. 32 Tsî ge ga ‘khoena xus’ ti ǃeream, o ge kom ǁaesa ra ǃao-o.” ǁÎgu ge khoena gere ǃao, hoan ge Johaneb a kēbo-ao ti ǂâi hâ i xui-ao. 33 O gu ge ǀûsen tsî ǀams ai “ǀŪ ge a” ti ge ǃeream bi.
Ob ge Jesuba “O ta tita tsîna mîba go tide mâ ǁkhāsiba xu ta nē xūna ra dīsa” ti ge ǃeream gu.