Dans di ganganǀgores
1 Koa re ǃKhūba ǁîb a ǃgâi xuige
ǁîb di hâhâ ra ǀnammi ge ǀamos kōse ra hâ.
2 Ab Israela mî re:
“ǁÎb di hâhâ ra ǀnammi ge ǀamos kōse ra hâ.”
3 Aronni ommi dina an ǃkhō-am:
“ǁÎb di hâhâ ra ǀnammi ge ǀamos kōse ra hâ.”
4 An ǁnān ǃKhūba ra ǃaoǃgâna mî:
“ǁÎb di hâhâ ra ǀnammi ge ǀamos kōse ra hâ.”
5 Ti ǂōǂōsib ǃnâ ta ge ǃKhūba ge ǂgaiǀî,
ob ge ǁnâu-am tsî ge ǃnoraǃnora te.
6 ǃKhūb ge tita ǀkha hâ tsî ta ge ǃao tama hâ.
Khoe-e tare-e tita nî dī?
7 ǃKhūb ge ǁnāb tita ra huiba
tsî ta ge ti khākhoen ai nî kōǁnâ.
8 ǃGâi i ge a ǃKhūb ǃoa ǁhaiǁhâsa
khoen ai ǂgomaiǂnûis xa.
9 ǃGâi i ge a ǃKhūb ǃoa ǁhaiǁhâsa,
gaosan ai ǂgomaiǂnûis xa.
10 Hoaraga ǁaedi ge tita ge xāǂgā;
ǃKhūb ǀons ǃnâ ta ge ǁîna ge ǁhāǃā.
11 ǁÎn ge tita ge xāǂgā;
hoa ǀkhāga xun ge ge xāǂgā te,
xawe ta ge ǁîna ge ǁhāǃā.
12 ǃHabun khamin ge tita ge xāǂgā;
ǁkhūxa ǀaes khamin ge gere ǁhabu.
ǃKhūb ǀons ǃnâ ta ge ǁîna ge ǁhāǃā.
13 ǀGaisase ta ge ge ǂhāhe, ǁnā ta nîse
xaweb ge ǃKhūba tita ge hui.
14 ǃKhūb ge ti ǀgai tsî a ǁkhāsi
ti ǃgâiǃōsib aseb ge ge ī.
15 ǂHanu-ain di tentomdi ǃnâb ge dâb tsî ores di ǀōba hâ.
“Amǀkhāb ǁôab ǃKhūb dib ge ǀgaisa dīga ra dī.
16 Amǀkhāb ǁôab ǃKhūb dib ge ǀgapiǀgapihe hâ.
Amǀkhāb ǁôab ǃKhūb dib ge ǀgaisa dīga ra dī.”
17 Tita ge ǁō tide xawe nî ûi;
ǃKhūb di dīgu xa nî aoǁnâse.
18 ǃKhūb ge ǁaposase ge ǁkhara te
xaweb ge ǁōb ǃoa māǁnâ te tama ge i.
19 ǂHanu-aisib di dao-amde ǁkhowa-amba te,
ǁnāpa ǂgâ tsî ta ge ǃKhūba ra kare ǂgao.
20 Nēs ge ǃKhūb di dao-amsa;
ǂhanu-ain ge ǁîs ǃnâ nî ǂgâ.
21 Satsa ta ge ra koa ti ǀgoresa ǁnâu-am
tsîts ge ore te ǃkhais ǃaroma.
22 ǂNubi-aogu xa ge ǂharahe ǀuis
ge ge ǁhôaǀui kai.
23 Nēs ge ǃKhūba xu ge hā,
tsî sada mûǁae a buruburuxa.
24 Nēs ge tsēs ǃKhūb ge dība dasa
a da ǁîs ǃnâ dâ tsî ǃgâiaǂgao re.
25 ǃKhūtse ore da re.
ǃKhūtse ǃgâiǃgâ kai da re.
26 ǀKhaehen ge hâ ǁnān ǃKhūb ǀons ǃnâ ra hāna.
ǃKhūb omma xu da ge sado ra ǀkhae.
27 ǃKhūb ge a Elo, ǃnâba sada ra māba.
ǁÂus ǁguibas di ǀnobasa ǂgapusa ǁnâugu ǀkha dī re
altars di ǁnâgu kōse.
28 Sats ge a ti Elo tsî ta ge ra kare tsi
Ti Elotse, satsa ta ge ra kaikai ǂgao.
29 Koa re ǃKhūba ǁîb a ǃgâi xuige
ǁîb di hâhâ ra ǀnammi ge ǀamos kōse ra hâ.
© Khoekhoegowab Elobmîs © Bible Society in Namibia, 2020.
