Jesub ge ǃgameb ǀgoras xa ra ǁkhāǁkhā
(Markub 10:1-12)1 ǁKhāǁkhās ǀkhab ge toa, ob ge Jesuba Galileaba xu Judeaǀkharib nau ǀkhāb, aiǂoas Jordanǃāb dis ǃoa ge ǃgû. 2 Kai ǂnubis khoen ge ge sao bi tsîb ge hoana ge ǂuruǂuru.
3 ǀNî Farisegu* ge hā tsî sao ra dîs ǀkha Jesuba gere ǃâitsâ ǂgao: “ǂHanu-i a, aob nî ǁîb tarasa xu ǀgorasa, mâ ǃaromas ǀguis ka xawe?”
4 Ob ge Jesuba ǁîga ge ǃeream: “Xoasa go ǁnâi khomai tama hâ, nēti ra mîsa: ‘Elob ge tsoatsoasa xu ǁîra aob tsî taras tsîra ase ge kuru?’ 5 Tsîb ge Eloba ge mî ‘ǁNā-amagab ge khoeba ǁgûb tsî ǁgûs tsîra ǁnāxū tsî taras ǀkha nî ǃgaeǁarehe, o ra ge nî ǀgui soro.’ 6 Tsî ra ge ǁîra ǃaruǀî ǀgam tama, xawe ra ge a ǀgui, Elob ǃgaeǁare hâ-i, khoe-i xare-i xa ǀgorahe tide xui-ao.”
7 O gu ge Farisega Jesuba ge dî: “Tare xū-i ǃaromab Moseba ra mîmā aob nî tarasa ǀgoraǂkhanisa xoabasa, ǁîsa ǃgû kais ǃaroma?”
8 Ob ge Jesuba ge ǃeream: “Sago di ǃgariǂgaoxasib ǃaromas ge Moseb ge ǀgorasa a mā-amsa, xawe nēs ge Elob ge tsoatsoas ǃnâ ǂâibasen tama hâ i ǃkhaisa. 9 Tsî mîba go ta ra, mâ khoeb ǁîb tarasa xu ǀgora tsî ga ǀnîs ǀkha a ǃgameb hoab ge ra ǃgamekhôa, hana i ga ǀaiba xu hâ tama io.”
10 O gu ge Jesub ǁkhāǁkhāsabega* ǁîb ǃoa ge mî: “Nēti i nî īs ka, o-i kom a ǃgâio ǃgame tamase hâsa.”
11 Ob ge Jesuba ǁîgu ǃoa ge mî: “Mâ-i hoa-i ge ǃgamesa māsa tama hâ, xawe ǁnān Elob xa ǂâibahe hân ǀguin. 12 ǀNîn ge ǁnāti ge ǃnae tsî ǀnîn, khoen xa ǃaromahe hâse ǁnāti īn tsî naun Gaosib ǀHommi dib ǃaroma aitsama ǃgame tama hâsa ge ǁhûin tsîna. Nē ǁkhāǁkhāsa ǃkhōǃoasa ga a ǁkhā-i hoa-e a-i ǁnāti dī.”
Jesub ge ǀgôarona ra ǀkhae
(Markub 10:13-16Lukab 18:15-17)13 Tsîn ge ǀnî khoena ǀgôarona Jesub ǃoa ge ǀkhī-ū, îb ǃomkha ǁgui-ai tsî ǁîna ǀgoreba, xawe gu ge ǁkhāǁkhāsabega ǁîrona ge ǀkhī-ūna ge ǃgabe. 14 Xaweb ge Jesuba ge mî: “An ǀgôarona tita ǃoa hā, î ǁîna tā ǂhani! Nēti īn dib kom Gaosib ǀHommi dibao.” 15 Tsîb ge ǃomkha âbab ge ǁîna ǁgui-ais khaoǃgâ ǁnāpa xu ge ǃgû.
ǃKhū hâ ǂkham khoeb
(Markub 10:17-31Lukab 18:18-30)16 Tsîb ge khoeba Jesub ǃoa hā tsî ge dî: “ǁKhāǁkhā-aotse, mâ ǃgâi xū-e ta kha nî dī ǀamo ûiba ta nî hōse?”
17 Ob ge Jesuba ge ǃeream bi: “Tare-i ǃaromats tita, tare-i a ǃgâi ǃkhaisa ra dî? Elob ǀguib ge a ǃgâi. Tsî ǀamo ûibats ga hō ǂgao, o ǁîb di mîmāde ǁnâuǀnam î ǃkhōǀgaipe.” 18 Ob ge nē khoeba ge dî “O, mâ mîmāde?” ti.
Ob ge Jesuba ge ǃeream: “ǃGamts ge tide; ǃgamekhôats ge tide; ǃnarits ge tide; khoe-ets ge ǂkhabase ǂgā-am tide; 19 sa îb tsî sa îs tsîrats ge nî ǃgôa; tsî sa ǀgūkhoe-e sats ǁkhāts khami nî ǀnam.”
20 Ob ge nē ǂkham khoeba ge ǃeream: “Nē mîmādi hoade ta ge ge ǁnâuǀnam. O tare-e ta ǃaruǀî tôasi hâ?” 21 Tsîb ge Jesuba ǁîb ǃoa ge mî: “Dīǀoaǀoasa ǂgaots kao, ǃgû îts ūts hân hoana sī ǁamaxū tsî marisa ǀgâsana mā, ots ge ǁuiba ǀhommi ǃnâ nî ūhâ. Tsî ǁnās khaoǃgâ hā, îts tita sao.”
22 Tsî nē ǂkham khoeb ge nēsa ǁnâu, ob ge kaise tsâǀkhāhe hâse ge ǃgûbē, kaiseb ge ǃkhū hâ i amaga.
23 Ob ge Jesuba ǁîb ǁkhāǁkhāsabegu ǃoa ge mî: “Amase ta ra mîba go, kaise i ge ǃkhū hâ khoeba nî ǃgomba Gaosib ǀHommi dib ǃnâ ǂgâsa. 24 Tsî ta ǁkhawa ra mî, kaise i ge ǃnaiba nî supuba nali ās ǃnā-u ǃkharusa, ǃkhū hâ khoe-e Elob Gaosib ǃnâ ǂgâs xa.”
25 O gu ge ǁkhāǁkhāsabega kaise nēs xa burugâ tsî ge dî: “Tari-e ǁnâi nî orehe?”
26 Ob ge Jesuba ǁîga kō tsî ge mî: “Nēs ge khoena a īǁoasaba, xawen ge hoa xūna Elob tawa a īǁkhā.”
27 Tsîb ge Petruba ge dî bi: “Sige kom ū ge hâ xūn hoana ǁnāxū tsî satsa ge sao-o, o mâ mādawa-amsa ge ūhâ?”
28 Ob ge Jesuba ge ǃeream: “Amase ta ra mîba go, Khoen Ôab ga ǂkhaisib trons ai sī a ǂnû, o go ge sago ǁîb saoǃgonaogo tsîna disiǀgamǀa trondi ai sī nî ǂnû, disiǀgamǀa ǁaedi Israeli dide ǀgoraǃgâs ǃaroma. 29 Tsî mâb hoab hîa ti ǀons ǃaroma ǁîb oms, ǃgâsan, ǁgûra, ǀgôan tamas ka io ǃkhūsiba ga ǁnāxūb ge ǀguikaidisiǃnâguse ǃnāsase ǃkhōǃoa tsî ǀamo ûiba nî ǀumi. 30 Xawe ǂguin hîa nētsē ǂguron ge nî ǀuni tsî ǁnān hîa a ǀunin ge nî ǂguro.
© Khoekhoegowab Elobmîs © Bible Society in Namibia, 2020.
