Disi mîmādi
(Deuteronomium 5:1-21)1 Ob ge Eloba sao ra mîdi hoade ge ǃhoa: 2 “Tita ge ǃKhūta sa Elota, Egipteb di khobosisa xu ge ǂgaeǂguiǂui tsi ta.
3 “ǀKhara elogats ge ti aiǃâ ǀgoreǀî tide.
4 “ǃGaoǂuihe hâ ī-ets ge dībasen tide, ǀhommi ǀgapise i ga hâs, ǃhūbaib ai i ga hâs, ǃhūbaib ǃnaka hâ ǁgamgu ǃnâ i ga hâ xawes tsîna. 5 ǁÎn aiǃâts ge ǃhonǁgoa tsî ǁîna ǀgoreǀî tide; tita ǃKhūta sa Elota ge tauxa Elota, ǁgûn di ǁorena ǀgôan tawa, ǃnonaǁî tsî hakaǁî ôananôagub ǁkhan te hân dib kōse ra ôaǃnâ ta. 6 Xawe ta ge ǀkhomxaǂgaosiba tita ǀnam tsî ti mîmāde ra ǁnâuǀnamhâhâ ǀoadisin ǃoagu nî ǁgauǂui.
7 “ǃKhūb sa Elob ǀonsats ge ǁause ǂgaiǀhuru tide, ǃKhūb ǁkhara tamase hâ kai tide ǁnā-i ǁîb ǀonsa ra ǂgaiǀhuru-e xui-ao.
8 “Sâtsēsa khai î ǁîsa ǃanuse ūhâ. 9 ǃNani tsēde sîsen tsî du ge sadu sîsenni hoaba nî dītoa, 10 xawe hûǁî tsēs ge ti ǃgôasib ǃaroma sâhe tsî nî khaihe. ǁNā tsēs ai i ge khoe-i xare-e sîsen tide: Sats, sa ôan, sa ǃgā-i, sa ǀgoan tamas ka io sa ǃhūb ǃnâ ǁan hâ ǃhaokhoe-i kas hoasa. 11 ǃNani tsēdi ǃnâb ge ǃKhūba ǀhommi tsî ǃhūbaib, hurib tsî ǁîgu ǃnâ hâ xūn hoana kuru tsî hûǁî tsēs ai ge sâ. ǁNā-amagab ge ǃKhūba hûǁî tsēsa ǀkhae tsî ǁîsa ge khai.
12 “Sa îb tsî sa îs tsîrats ge nî ǃgôa, tita ǃKhūta sa Elota ra mā tsi ǃhūb ǃnâts ǂomxa ǁaeba nî ûise.
13 “ǃGamts ge tide.
14 “ǃGamekhôats ge tide.
15 “ǃNarits ge tide.
16 “Khoe-i xare-ets ge ǂkhabase ǂgā-am tide.
17 “Tā sa ǀgūkhoeb omsa tura; tā sa ǀgūkhoeb taras, ǃgān, goman, dâukin tamas ka io ǁîb di-i hoa-e tura.”
Israelǁîn ge ǃaob xa ra ǃkhōhe
(Deuteronomium 5:22-33)18 Hoan ge ǃgurub tsî napab tsîkha di ǀōba ge ǁnâu. ǁÎn ge baib di ǁnâb ra ǀō ǀgausa ǁnâu tsî mâtib Sinaiǃhomma ǀanni xa ge ǃgū-aihe ǀgausa ge mû. ǁNā-amagan ge kaise ǃaob xa ǃkhōhe tsî ǃnūse ge mâ. 19 ǁÎn ge Moseb ǃoa ge mî: “Satsa sida ǀkha ǃhoa re, o da ge nî ǃgâ tsi; xawe tāb Eloba sida ǀkha ǃhoa, ǁō da nî xuige.”
20 Ob ge Moseba ǁîn ǃoa ge mî: “Tā ǃao, Elob ge ǁîba ǁnâuǀnam tsî du ǁore tidega ra ǃâitsâ du.” 21 Moseb ge ǃkhae ǃâus, Elob ge hâǃnâ isa ǀgū on ge ǁîna ǃnūse ge mâ i.
Hoaǃnā-aixa ǁgaragu altarǃoabas digu
22 Ob ge ǃKhūba Moseba ge mîmā îb Israelǁîna nēti mîba: “Aitsama du ge ǀhomma xu ta sadu ǀkha gere ǃhoa ǃkhaisa ge mû. 23 Tātsēs tsîna tā ǀhaiǀuri tamas ka io ǃhuniǀuri-eloga kurubasen tsî ǁîga ǀgoreǀî. 24 ǃHūb ǀkha tita ǀgoreǀîs ǃaroma altarsa kuru. Sadu gūn, pirin tsî goman tsîna ǁîs ai khauǁguibas tsî ǂkhîbagus ǁguibase ǁguiba. Ti ǀons ra ǀgoreǀîhe ǃkhais hoas tawa ta ge sī tsî nî ǀkhae du. 25 Tsî titats ga ǀui-altarsa dība, o tā ǁhāǂuisa ǀuidi ǀkha ǂnubi. ǀUiǃgao-ūdasats ga sîsenū, ots ge tita ǀgoreǀîs ǃaroma ra ǃanuoǃnâ kai. 26 Tsî tā dā-aiǃharode ūhâ altarsa om, sa ǀōǀkhāsib ǀguibas nî ǂhaiǂhai xuige.”
© Khoekhoegowab Elobmîs © Bible Society in Namibia, 2020.
