Deuteronomium 19 - Khoekhoegowab New Translation 2020 (KKG20)

ǁHaiǁhâǀî ǃādi

1 Moseb ge ǃaruǀî Israelǁîn ǃoa ge mî: “ǃKhūb sadu Elob ga ǃhaode hîkākā tsî ǁîdi ǃhūba sado mās khaoǃgâ, tsî sado ǁîdi ǃādi tsî omde ūbasen tsî ǁanǃnâs khaoǃgâ, 2-3 ǀkhariba ǃnona ǃâdi ǃnâ ǀgoraǂgā, î mâ ǀkharib hoab ǃnâ ǁhaiǁhâǀîǃāsa ǂnubi tsî ǁîdi ǁga garu daoga kuru; î-i nau khoe-e ra ǃgam khoe-e supuse ǁnā ǃādi di ǀguis ǁga ǁhaiǁhâ ǁkhā. 4 Khoe-i ga ǂâibasen tama-i hâse khākhoegu-ū tama-i hâ khoe-e ǃgam, o-i ge ǁî-e ǁhaiǁhâǀîǃādi di ǀguis ǁga, ǁî-i ǃnorasasib ǃaroma a ǁhaiǁhâ ǁkhā. 5 Aiǁgause i ga khoe-e ǀnî khoe-i ǀkha ǀaereǃgû, tsî ǀae-e i ra ǁhā hîa ǃōsa ǁî-i ǃomma xu ǂkhiri tsî hâ-ū-i a khoe-e hō tsî ǃgam, o-i ge ǁî-e ǁnā ǃādi ǀguis ǁga ǁhaiǁhâ ǁkhā. 6 ǀGui ǁhaiǁhâǀîǃās ǀguis ga hâ tsî daoba kaise ǃnū, o-i ge a īǁkhā ǁgapaǃanhe ge khoe-i ǀaokhoen ǀkhaoǂgaosiba xu ǁnā khoe-e ǁhaiǁhâ-i garu hîa sīǃnâ tsî a ǃgam ǁkhāsa; xawe i ge khākhoesi-e ǀkhai i hîa. 7 ǁNā-amaga ta ge ǃnona ǁhaiǁhâǀîǃādi nî ǁgaumâihe ǃkhaisa ge mîmā.

8 “ǃKhūb sadu Elob ga sadu aboxagab ge mîmâiba khami sadu ǃhūba kaikai, tsî mîmâib ge ǃhūb hoaba mā du, 9 o du ge noxopa ǃnona ǁhaiǁhâǀîǃāde nî ǀaro. (ǁÎb ge nē ǃhūba tita go nētsē mîmā du xūn hoana du ga dī, tsî ǃKhūb sadu Eloba du ga ǀnam tsî ǁîb di daogu ǃnâ hoaǁae ǃgû, o nî mā du.) 10 Nēsa du ga dī, on ge khoena ǀhapiose ǁō tide, î du tā ǃKhūb sadu Elob nî mā du ǃhūb ǃnâ ǁîn di ǁōb ǃaroma ǀhapixa.

11 “Xawe i ga khoe-e ǁî-i ǀgūkhoe-e ǁkhan tsî ǁî-e ǃâuǁgoe tsî ǁnāǂam tsî ǃgam, tsî ǁnā ǁhaiǁhâǀîǃādi ǀguis ǁga ǁî-i ǃnorasasib ǃaroma ǁhaiǁhâ, 12 o gu ge ǂgaeǂgui-aoga ǁî-e ǁnāpa xu sī ū kai tsî ǃgamhe ge khoe-i ǀaob ǃaroma ra ǀkhao ǂgao ǀaokhoe-i di ǃomǁae ǃnâ nî māǁnâ, î-i ǃgamhe. 13 Tā ǁî-e ǀkhom. ǀHapio ǀaoba ra ǂnâxū khoe-i hoa-e Israela xu ǃgamǂui, o-i ge sadu ǀkha ǃgâise nî ǃgû.

ǀOro ǃhūǀgoradi

14 “ǃKhūb sadu Elob nî mā du ǃhūb ǃnâ ge ǀnai mîǁguihe ǃhūǀgoraǁgauǁgaude tā ūbē.

ǀHûǀgui-aon

15 “Khoe-i ga tare-i ǀgui-e dīsā tsî a ǂkhaba, xawe i ge ǁnāti ī khoe-i ǃoagu ǀgui khoe-i ǀgui-e ǀhûǀguitimî tide. ǀGam tamas ka io ǃnāsa khoen di ǀhûǀguitimîs ǀguis ge a mā-amsa. 16 Khoe-i ga nau khoe-e ǂhumiǂgā-ams ǀkha tsûtsû, 17 o-i ge ǂgā-am-ao-i tsî ǀhapiǂgā-amhe ra khoe-i tsîna ǀō-aisa ǃkhais ǀgoreǀîs dis tawa pristergu tsî ǀgoraǃgâ-aogu ǁnā ǁaeb ǃnâ sîsenni tawa hâgu tawa sī tsî nî ǀgoraǃgâhe. 18 ǀGoraǃgâ-aogu ge ǁhōba ǂōrisase nî ôaǃgao; tsî i ga khoe-e ǃgâsa Israelǁî-e ǂhumiǂgā-am, 19 o-i ge ǁnāti ī khoe-e, ǂhumiǂgā-am i gere khoe-i ga ǁkharahe hâ ǁkharaba nî ǃkhōǃoa. ǁNā ǀgaus ai ǀgui du ge nēti ī ui-uisa ǁoreba a ūbē ǁkhā. 20 On ge hoaraga khoena ǁnâu tsî nî ǃao, tsî i khoe-i xare-e ǁnāti ī ǂkhababa ǁkhawa sadu ǁaegu dītsâ tide. 21 Tā ǁnāti ī khoe-e ǀkhom; ûib ǃaroma ûib, mûs ǃaroma mûs, ǁgûb ǃaroma ǁgûb, ǃommi ǃaroma ǃommi tsî ǂais ǃaroma ǂais.