Mateub 17 - Khoekhoegowab New Translation 2020 (KKG20)

Jesub di ǀkharaǀkharahes

1 ǃNani tsēdi khaoǃgâb ge Jesuba Petrub tsî khoeǃgâgukha, Jakobub tsî Johaneb tsîkha ū tsî ǀguri gu nî hâse ǃhommi ai ge ǃapa. 2 ǁÎgu ra kō bi hîab ge Jesub ai-īsiba ge ǀkharaǀkharasen. ǁÎb ais ge sores khami gere ǂkhai tsî sarab âb ge ǃnâb khami ge ǃuri i. 3 ǁNātimîsi kha ge Moseb tsî Eliab tsîkha ǂhai tsî Jesub ǀkha ge ǃhoatsoatsoa. 4 Ob ge Petruba Jesub ǃoa ge mî: “ǃKhūtse, mâtikōse i kha nî ǃgâi, sage nēpa hâsa! Mā-am tets kao ta ge ǃnona tentomrode a kuru ǁkhā, ǀguisa sats ǃaroma, ǀguisa Moseb ǃaroma tsî nausa Eliab ǃaroma.”

5 Nēsab Petruba ra mî hîas ge kōheǁoasase ra ǂkhai ǃâusa ǁîgu ǂamai ge hā tsî gu ge dom-e ǁîsa xu ge ǁnâu, nēti ra mî-e: “Nēb ge ti ǀnamǀnamsa ǀGôab, ǃgâiǃgâibasensa ta ūǃnâ hâba. ǁÎba ǃgâ re!”

6 Tsî ǁkhāǁkhāsabegu* ge nē dom-e gu ge ǁnâu, o kaise ǃao tsî aidi âgu ǂama ǃhūb ai ge ǁnāǁgoe. 7 Ob ge Jesuba ǁîgu ǃoa hā, tsâǀkhā gu tsî ge mî: “Tā ǃao, î khâimâ!” 8 Tsî kōkhâi gu ge, o gu ge Jesub ǀguiba ǁîgu ǀkha hâse ge mû.

9 Tsî ǃhomma xu gu ǁgôaxaǃgoaxa hîab ge Jesuba ǁîga ge mîmā: “Tita, Khoen Ôata ǁōba xu khâimâ tamas kōse go ge khoe-i xare-e mû go gona mîba tide.”

10 O gu ge ǁkhāǁkhāsabega Jesuba “Tare-i ǃaroma gu Moseb ǂhanub* di ǁkhāǁkhā-aoga Eliab nî Xristub aiǃâ hā ti ra ǁkhāǁkhā?” ti ge dî.

11 Ob ge Jesuba ge ǃeream: “Ā, Eliab ge amabes ǃnâ aibe hā tsî hoa xūna nî aiǂhomi. 12 Amase ta ge ra mîba go ǀnaib ge Eliaba ǀkhī, xawen ǁîna mûǂan bi tama i tsî ǂgaon ra khami ǁîba ge ûi-ū ǃkhaisa. ǁNās ǁkhās khamib ge Khoen Ôaba ǁkhā ǀgaub ai ǁîgu ǃomǁae nî tsâ.” 13 ǁNā ǁaeb ai gu ge ǁkhāǁkhāsabega ge ǁnâuǃā Johaneb ǁĀǁnâ-aob xab ra ǁîgu ǀkha ǃhoasa.

Jesub ge ǁgâuab xa hâǃnâhe axaba ra ǂuruǂuru

(Markub 9:14-29Lukab 9:37-43a)

14 Tsî ǃhomma xu gu ge ǂnubis khoen tawa ǀkhī, o i ge ao-e Jesub ǃoa hā tsî ǁîb aiǃâ ǃhon 15 tsî ge mî: “ǃKhūtse, ti ôaba ǀkhomxa re, ǁîb ge ǁnāǁōba ūhâ tsî ǁkhōǁkhōsase mâǁaeb hoab ai nēsa xu ra tsâ. Hoaǁaeb ge ǀaes tamas ka io ǁgam-i ǃnâ ra ǁnā. 16 Tsî ta ge sa ǁkhāǁkhāsabegu ǃoa go ǀkhī-ū bi, xawe gu ge go ǂuruǂuru bi ǁoa.”

17 Ob ge Jesuba ge ǃeream: “Sa ǂgomoǃnâ tsî ǃnâudanaxa khoedo, mâǁaeb kōse ta kha sadu ǀkha nî hâ, ǂgom du nîse? Mâtikōse ta kha sado nî tani? Axaba tita ǁga hā-ū re.” 18 Ob ge Jesuba axab ǃnâ hâ ǁgâuaba* ge ǃgabe tsîb ge ge ǂoaxū bi. ǁNā ǁaeba xub ge axaba ge ǂuru.

19 ǁNās khaoǃgâ gu ge ǁkhāǁkhāsabega Jesuba ǀguri ge dî: “Tare xū-i ǃaroma ge kha sige ǁnā ǁgâuaba go ǃhaeǂui ǁoa i?”

20 Ob ge Jesuba ge ǃeream: “ǂGoms âgo a ǂkhari xui-aos ge. Amase ta ra mîba go, mostardǃkhomro-i* khami ǂkhari ǂgomsa go ga ūhâ tsî nē ǃhommi ǃoa ‘Nēpa xu nauǀî gon’ ti mî ob nî gonbēsa. Elob ǃnâts ga ǂgom, ots ge xū-i hoa-e a dī ǁkhā.” [21 Xawe ǀgores tsî ǂûtama* hâs ǀguis ge nēsa ra īǁkhā kai; ǀnî xū-i ose.]

Jesub ge ǁkhawa ǁîb ǁōb xa ra ǃhoa

(Markub 9:30-32Lukab 9:43b-45)

22 Galileab ǃnâ gu ge ǁkhāǁkhāsabega ǀhao, ob ge Jesuba ǁîgu ǃoa ge mî: “Khoen Ôab ge ǀapexūhe tsî khoen ǃomǁae nî māǁnâhe. 23 Tsîn ge ǁîna nî ǃgam bi, xawe ǃnonaǁî tsēs aib ge ǁōba xu nî ǂkhaiǂkhaihe.” ǁKhāǁkhāsabegu ge nēs xa ǃgamse ge ǃoa.

Tempeli ǁgui-aimaris* di matares

24 ǁNās khaoǃgâ gu ge Jesub tsî ǁîb ǁkhāǁkhāsabegu tsîga Kapernaums ǃnâ a sī, o gu ge Tempeli ǁgui-aimariǃkhōǃoa-aoga* Petrub ǃoa hā tsî ge dî bi: “Sa ǁkhāǁkhā-aoba kha Tempeli ǁgui-aimarisa māb ra?”

25 Ob ge Petruba ge ǃeream “Ā, mā ra ǁgui-aide” ti.

Petrub ge oms ǃnâ ǂgâ, ob ge Jesuba ǃhaedā bi tsî ge dî bi: “Simontse, mâtits satsa ra ǂâi? Tarina nē ǃhūbaib di gao-aoga ǁgui-aimarin tsî ǁgui-aidi tsîna ra māna? ǃHūǁîna tamas ka io ǃhaokhoena?”

26 Ob ge Petruba ge ǃeream “ǃHaokhoen” ti.

Ob ge Jesuba ge mî: “Ā, o i kom ra ǂâibaseno ǃhūǁîn a ǃnorasa ǃkhaisa xū-e māsa xu. 27 Xawe tā ge nēsa mâǃoa, hurirob ǃoa ǃgû, î ǁauǃkhō-ūdaba aoǂgā. ǂGuro ǁaub hîats ga ǃkhōb di amsats ga khowa, ots ge marisa nî hō, o ǁîs ǀkha hoakhom di ǁgui-aimarisa sī matare.”