Markub 8 - Khoekhoegowab New Translation 2020 (KKG20)

Jesub ge hakaǀoadisi khoena ra ǂûmā

1 ǁNās khaoǃgâs ge ǁkhawa ǀnî kai ǂnubis, ǂûxū-i tsîna ge ūhâ tama hâ isa Jesub ǂnamipe ge ǀhao. Ob ge Jesuba ǁkhāǁkhāsabegu* âba ǂgaiǀgū tsî ǁîgu ǃoa ge mî: 2 “Nē khoen ge ǃnona tsēde ǂûn nî xū-i tsîna ūhâ tamase tita ǀkha go hâ, tsî ta ge kaise ǁîna ra tsâba. 3 ǀNîn ân kom nēpa xu kaise ǃnūse ra hâo tsî ta ge ǀkhaiǃnâ ǃnāgu ǀkha ǁîna ǁaru kai ǂgao tama hâ, în oas daob ai tā ǂkhabu tsî ǁnā.”

4 O gu ge ǁkhāǁkhāsabega ǃeream bi tsî ge mî: “O ge kha nē ǃgarob ǃnâ mâpa nētikō ǂnubis di khoena ǂâu hâ ǂû-e nî hōba?”

5 Ob ge “Mâtikō perena go ǁnâi ūhâ?” ti ǁîga ge dî. O gu ge “Hû perega ge ge ūhâ” ti ge ǃeream bi.

6 Ob ge Jesuba ǂnubisa ǃhūb ai ǂnûsa mîmā tsî perega ū, Eloba gangan, ǁîga ǃârodi ǃnâ khôa tsî ǁkhāǁkhāsabega ge mā tsî gu ge khoena ge ǀgoraǂuiba. 7 ǁÎgu ge ǁkhāti ǀoro, ǁauroga ge ūhâ i. ǀKhae-aitoab ges khaoǃgâb ge Jesuba ǁkhāǁkhāsabega ge mîmā khoena gu nî ǀgoraǂuiba ǃkhaisa.

8 ǁÎn ge ǂû tsî ǁâ, tsî gu ge ǁkhāǁkhāsabega ǃgau ge ǃâna hû ǀharudi ǃnâ ge ǀhaoǀhao. 9 ǁAubexa hakaǀoadisi khoen ge ǁnāpa ge hâ i tsîb ge Jesuba ǁîna ǂûtoas khaoǃgâ ge ǁaru kai. 10 ǁKhāǁkhāsabegu ǀkhab ge ǂgaus ai ge ǂoa tsî gu ge Dalmanutas di ǀkharib ǁga ge ǃgâu.

ǀHomma xu hâ ǁgauǁgau-e ǂgaoǀkhās

(Mateub 12:38-42Mateub 16:1-4)

11 O gu ge Farisega ǂoaxa tsî Jesub ǀkha ge ǂnoagutsoatsoa. ǁÎgu ge ǁîba ǀhomma xu hâ sao-e gere ǂgaoǀkhā, ǁîba ǃâitsâs di ǂâibasens ǀkha. 12 Ob ge Jesuba gagas âb ǃnâ ǀhâi tsî ge mî: “Tare-i ǃaromab nē suriba sao-e ra ǂhâba? Amase ta ge ra mîba du nē surib sao-e māhe tide ǃkhaisa.” 13 Tsîb ge ǁîna xu ǂgaus ai ǂoa tsî hurirob nauǃanib ǁga ge ǃgâu.

Farisegu* tsî Herodeb tsîgu di khūkhū-i

(Mateub 16:5-12)

14 Tsî gu ge ǁkhāǁkhāsabega ǂâu hâ pere-e ūsaosa ǀuru tsî ǀgui pereb ǀguiba ǂgaus ǃnâ ge ūhâ i. 15 Ob ge Jesuba ǁîga ǃkhâikhom tsî ge mîmā: “ǂAnbasen! ǃÛisen re Farisegu* tsî Herodeb tsîgu khūkhū-i khami īgu xa.”

16 O gu ge ǁkhāǁkhāsabega ǁîǃnābe ǃhoa tsî ge mîǀîgu: “Pere-e ge ūhâ tama hâ xui-aob ge nēna ra mî.”

17 Xaweb ge Jesuba ǁîgu ra tarena ǂâi ǃkhaisab ge ǂan i xui-ao ge dî: “Tare-i ǃaroma go pere-i di ǀkhais xa ra ǃhoa? Sago kha ǁnâi ǁnâuǃā tama hâ? Tsî go kha hana ǁnātikōse a ǃgariǂgaoxa? 18 Mûde go kha ūhâ tama hâ, mûs ǃaroma tsî ǂgaede, ǁnâus ǃaroma? Tsî go kha ǀnai ǀuru hâ 19 mâtikō ǀharudi di ǂûna go ge ǃgau ge ǃâna xu a ǀhaoǀhao ǃkhaisa? ǁNātsē ta ge koro peregu tsî ǀgam ǁaurokha tsîn ǀkha koroǀoadisi khoena ǂûmāo.”

O gu ge “Disiǀgamǀa” ti ge ǃeream. 20 Ob ge Jesuba ǁkhawa ge dî: “Tsî hakaǀoadisi khoena ta ge ǂûmā tsēs ai mâtikō ǀharudi di ǂûn ǃgau gena go ge ǀhaoǀhao, ǁnā hû pereroga xu?”

O gu ge “Hû” ti ge ǃeream bi. 21 “Tsî go kha noxopa tare-e ta ra ǂâibasen ǃkhaisa ǁnâuǃā tama hâ?” tib ge Jesuba ǃaruǀî ǁîga ge dî.

Jesub ge Betsaidas tawa ǂgī khoeba ra ǂuruǂuru

22 Jesub tsî ǁîb di ǁkhāǁkhāsabegu ge Betsaidas ǃnâ sī, on ge ǀnî khoena ǂgī khoeba Jesub tawa ǀkhī-ū tsî ǁîbab nî tsâǀkhā ǃkhaisa ge ǀkhoma bi. 23 Ob ge Jesuba nē ǂgī khoeba ǃkhōǁôa tsî ǃārosa xu ge ǂgaeǂguiǂui, ǁnāpab ge khoeb di mûra âb ǃnâ ge ǂara. ǃOmkha ǁgui-ai bi tsîb ge iseb ra xū-e mû ǃkhaisa ge dî bi. 24 Kōǂnami tsîb ge “Khoena ta ge ra mû, xawen ge ǃgûma ra hain ase ī” ti ge ǃeream.

25 ǁKhawab ge Jesuba ǁîb di mûra ai ǃomkha ge ǁgui. ǁÎb ge ǂâibasens ǀkha ge kō tsîb ge ǂgau tsî ǃgāsase hoaraga xūna ge mûtsoatsoa. 26 Ob ge Jesuba ǁîba ǁîb ǁgâus ǁga ǁaru kai tsî ge mîmā bi, îb tā Betsaidas ǃnâ ǂgâ.

Petrub ge Jesub xa ra ǁguiǁnâ

(Mateub 16:13-20Lukab 9:18-21)

27 O gu ge Jesub tsî ǁîb di ǁkhāǁkhāsabega Kaesarea Filipiǀkharib ǂnamipe ǁgoe ǃārodi ǁga ge ǃgû. Ob ge Jesuba daob ai ǁîb di ǁkhāǁkhāsabega ge dî: “Tita a tari ti ra mî khoena?”

28 O gu ge ǁkhāǁkhāsabega “ǀNîn ge Johaneb ǁĀǁnâ-aots tamas ka io Eliats ti ra mî, xawen ge ǀnîna kēbo-aogu di ǀguits ti ra mî” ti ge ǃeream bi.

29 Ob ge Jesuba ǁkhawa ǁîga ge dî: “O sago, tita tari ti go ra mî?”

“Sats kom Xristutsao!” tib ge Petruba ge ǃeream bi. 30 Ob ge Jesuba ǁkhāǁkhāsabegu âba ge ǃkhâikhom, î gu tā ǁîb xa xū-i xare-e mî.

Jesub ge ǁîb di tsâb tsî ǁōb xa ra ǃhoa

(Mateub 16:21-28Lukab 9:22-27)

31 Tsîb ge Jesuba ǁkhāǁkhāsabega ge ǁkhāǁkhātsoatsoa ǁîb ǀkha nî ī xūn xa: “Khoen Ôab ge kaise ǁaes ǂnomdomgu,* Moseb ǂhanub* di ǁkhāǁkhā-aogu tsî danapristerga xu nî tsâ. ǂHarahe tsîb nî ǃgamhes kōse, xaweb ge ǃnonaǁî tsēs ai ǁōba xu nî khâimâ.” 32 Tsîb ge Jesuba ǁnās khaoǃgâ ǁîga ǃgāsase tare-eb ǁnās ǀkha ra ǂâibasen ǃkhaisa ge mîba.

Ob ge Petruba Jesuba ǀgui ǀkhāb ǁga ǂgai tsî ge ǃgabe, îb tā ǁnāti ǃhoa. 33 Ob ge Jesuba ǁîb di ǁkhāǁkhāsabega kō tsî Petruba ǀgaisase ge ǃgabe. Tsîb ge “Bēxū te, Satantse!* Sats ge khoesi ǂâiǀgauba xu ra ǃhoa, xawe Eloba xu tama” ti ge mî.

34 Ob ge Jesuba ǁkhāǁkhāsabegu tsî ǂnubis tsîna ǂgaiǀgū tsî ge mî: “Mâ-i sadu di-i hîa ga tita a sao ǂgao-i hoa-i ge ǁî-aitsama nî ǀurusen. Tsî ǃgâuhaiba* ūkhâi tsî tita nî sao. 35 ǁÎ-i di ûiba ga a sâu ǂgao-i ge nî ǂoaǃnâ bi. Xawe ga ǁî-i di ûiba tita tsî ǃGâiǂhôas tsîn ǃaroma ǂoaǃnâ-i ge ama ûiba nî hō. 36 Xawe tare xū-e i kha khoe-e harebeba hâ, ǃhūbaib hoaba i ga hō, xawe-i ga ǁî-i ûiba hîkākāo? 37 Tare-ets mā ǁkhā sa ûiba hō-oas ǃaroma? 38 Mâ-i hoa-i tita tsî ti mîde ga tao-i, nē ǁoreǁgai hâ tsî ǃgamekhôaxa surib ǃnâ, ǁî-eb ge Khoen Ôab tsîna nî tao, ǁîb Îb di ǂkhaisib ǃnâb ga ǃanu ǀhomǃgān ǀkha ǂgâo.”