Jesub tsî Johaneb ǁĀǁnâ-aob tsîkha
(Lukab 7:18-35)1 Tsî Jesub ge nē ǁgui-aide ǁîb disiǀgamǀa ǁkhāǁkhāsabega* mîmātoa, ob ge ǁnāpa xu aiǃâb ǃoa ǃgû tsî ǀgūse ǁgoe ǃādi ǃnâ ǁkhāǁkhā tsî gere aoǁnâ.
2 Tsî Johaneb ge ǃkhō-oms ǃnâb ǂnôa hîa Xristub* dīga ǁnâu, ob ge ǀnîgu ǁîb ǁkhāǁkhāsabegu diga ǁîb ǃoa ge sî. 3 O gu ge Jesuba ge dî: “Mîba ge re, Johaneb ra mî hā nîse ī gu di ǀguitsa satsa, tamas ka io ǀnîba da nî ǃâu?”
4 Ob ge Jesuba ge ǃeream gu: “Oa, î go Johaneba sī mîba, ǁnâu tsî go ra mûna: 5 ǂGīn ra mûsa, ǃhoran ra ǃgûsa, ǃomamasiba ūhân ra ǃanuǃanuhesa, ǂganaǂgae hân ra ǁnâusa, ǁō hâna ǂkhaiǂkhaihe tsîn ǀgâsana ǃGâiǂhôasa ra aoǁnâbahesa. 6 Tsî ǀkhaeheb ge hâ ǁnāb tita xa îganǀgē tamaba!”
7 Tsî Johaneb di ǁkhāǁkhāsabegu ra dabasen hîab ge Jesuba ǂnubis khoen ǃoa Johaneb xa ge ǃhoatsoatsoa: “Tare-e du sī nî kōse du ge ǃgaroǃhūb ǃoa ǂoa? ǂĀb hîa ǂoab xa ǃgomhe tsî ra gonna? 8 Tare-e du sī nî mûse du kha ge ǂoa? Khoe-i hîa îsa saran ǀkha anasen hâ-e? Khoen ǁnāti ra anusase anasenn ge gao-aogu omgu ǃnâ ra hâ! 9 O ǁnâi mîba te, tare-e du nî mûse du ge ǂoa ǃkhaisa? Kēbo-aoba? Amase, xawe ta ra mîba du, sadu ge kēbo-aob xa ǃnāsaba ge mû. 10 Johaneb ge ǁnāb, ǁîb xa xoahe hâba:
“ ‘Mû, tita ge ti ǀhomǃgāba
sa aiǃâ ra sî,
daobab sa aiǃâ nî ǂhomiba tsise.’
11 Amase ta ra mîba du, Johaneb ǁĀǁnâ-aob ǃgâ-ai kai-i ge hâ tama, xawe Gaosib ǀHommi dib ǃnâ hoan xa ǂkhari-i ge ǁîb ǃgâ-ai a kai-e. 12 Johaneb ǁĀǁnâ-aob gere aoǁnâ tsēde xu nēsis kōseb ge Gaosib ǀHommi diba ǁkhōǁkhōsa mâǃoadi tsî ǃkhamdi ǃnâ ge tsâ. 13 Kēbo-aogu di ǂkhanidi tsî Moseb ǂhanub* ge Johaneb di hās kōse Gaosib ǀHommi dib xa gere kēbo. 14 Tsî ǃkhōǃoa ǂgao du ka ǁîgu di haisi-amsa, o Johaneb ge a Elia nē hā nîraba. 15 ǂGaera ūhâ-e, a-i ǁnâu!
16 “Tare-i ǀkha ta kha nē suriba nî ǀgopeǀnō? ǁÎn ge ǀgôaron hîa ǁamaxūǃkhais tawa ǂnû tsî naun ǃoa ra ǂgain khami ī:
17 “ ‘Sado da go ǂnuniba,
xawe du ǂnā tama.
ǃOaǃoaxase ta go ǁnae,
xawe du ā tama.’
18 Tsî Johaneb ge hā, ob ge ǂûtama* hâ tsî ǂauxûi-i tsîna ge ā tama hâ i, xawe i ge mâ-i hoa-e gere mî: ‘ǁÎb ge ǁgâuab* xa hâǃnâhe.’ 19 Khoen Ôab ge hā tsî ǂû tsî ra ā, on ge ra mî: ‘Nē khoeba kō re! ǁÎb ge ō-ao tsî a ǀhorosema tsî ǁgui-aimariǃkhōǃoa-aon* tsî ǁore-aon di horesa.’ Xaweb ge gā-aisiba ǁîb di sîsengu xa ge ǂhanu-ai kaihe.”
ǂGomoǃnâ ǃādi
(Lukab 10:13-15)20 ǃNāsa buruxa dīnab gere dī ǃādi ǃnâ ge hâ i khoen ge ǃhobasen ǂgao tama ge i. Tsîb ge Jesuba nē khoen ǀkha ǁaixa tsî ǁîn ǃoa ge mî: 21 “Tarekōse i nî tsūba si, Xorasinse! Tsî sas tsîna, Betsaidase! Saro ǃnâ ge dīhe buruxa dīn ga Tirus tsî Sidons tsîra ǃnâ dīhe hâ, on ge ǁîra khoena hūga ǀhaosarana ana tsî tsaob ǀkha tsorosen tsî ǃhobasensa ga ǁgauǂui hâ. 22 Amase ta ra mîba du, ǀGoraǃgâtsēs aib ge Eloba ǃnāsa ǀkhomma Tirus tsî Sidons khoena saro khoen ǂamai nî mā. 23 Tsî sadu Kapernaums dido, ǂâi du ra ǀhommi ǃnâ du nî ǃgôahe ti? Sadu ge ǁŌhân Hâǃkhaib ǃnâ nî ǂhāǂgāhe! Sodoms ǃnân ga sadu tawa ge dīhe buruxa dīna dīhe hâ, os ge Sodomsa nētsēs kōse ga hâ hâ. 24 Xawe ta ra mîba du, Sodoms ge ǃnāsa ǀkhomma ǀgoraǃgâtsēs ai Elob xa nî ǁgauhe.”
Tita ǃoa hā, î sâba hō
(Lukab 10:21-22)25 ǁNā ǁaeb aib ge Jesuba nēti ge ǀgore: “Gangan tsi ta ra, ǀhommi tsî ǃhūbaib tsîkha di ǃKhūtse, nēnats ge gā-ain tsî ǁnâuǃāxana ǂganǃgâsa kaiba tsî ǁnâuǃāoǃnâna ǂhaiǂhaiba ǃkhaisa. 26 Ā, ǃKhūtse, ǁnās ge satsa go ǃgâiba i.
27 “Hoa xūn ge ti Îb xa tita ai ge ǂgomǃgâhe. Khoe-i xare-i ge ǀGôaba a ǀū, ǁGûb ǀguib a ǂan tsî khoe-i xare-i ge ǁGûba a ǀū, ǀGôab ǀguib a ǂan tsî ǁnān ǀGôab ra ǂhaiǂhaiba ǂgaon ǀguin. 28 Tita ǃoa hā re tsau hâ tsî ǃnao-aihe hâdu hoado, o ta ge tita nî khoakhoa du. 29 Ti ǃnaoba sadu ai ūkhâi, î tita xu ǁkhāǁkhāsen tsamtsiǃnâ tsî ta ǂgaob ǃnâ ǃgamǃgamsensa ūhâ amaga, o du ge sado sadu ǀomde sâǃkhaiba nî hōba. 30 Ti ǃnaob ge a ǃgâi tsî ti ǃgommi a supu xui-ao.”
© Khoekhoegowab Elobmîs © Bible Society in Namibia, 2020.
