1 Judab, Jesub Xristub* di ǃgāb, Jakobub di ǃgâsaba xu:
ǁNān hîa Elob xa ǂgaihe, Elob ǁGûb xa ǀnamhe tsî Jesub Xristub xa sâuhe hân ǃoa:
2 ǀKhomxaǂgaosib, ǂkhîb tsî ǀnammi sadu ǃnâ hâba ab ǀarosen.
ǂHumi ǁgauǃnâ-aon
3 ǀNamsabedo, kaise ta ge ǃnāsase go tura hâ i, sado ǁîb ǃnâ da ra amǃnâxa ǃgâiǃōsib xa xoabasa. O ta ge go ǂhâbasabahe xoa tsî sado ǀkhomasa, Elob di khoen ǃoa ge māǁnâhe ǂgomsa da nî ǃkhamba ǃkhaisa. 4 ǀNî khoen ǂganǃgâsase ǂgâxa hâ xui-ao, ǁîn xas nē ǀgoraǃgâsa aimûǀgaruhe hân, eloxoresan Elob ǀkhomma ǁgauoǃnâ ûib ǃnâ daba tsî sada di ǀguise hâ Gao-ao tsî ǃKhūb, Jesub Xristuba ra ǀūxūna.
5 Xawe ta ge ra ǂâiǂâiǃnâ du ǂgao, nē xūn hoana du a ǂan xawe, ǃKhūb hîa ge ǁaesa Egipteba xu oreb ge ega ǁnān hîa ge ǂgom tama ina hîkākā ǃkhaisa. 6 Tsî ǀhomǃgān hîa ge ǁîn di ǂhunuma ǀgaiba ǃkhōǀgara tama i tsî ǁîn di hâǃkhaisa xu bēnab ge ǀamo khedegu ǀkha ǃgae hâse ǃkhaenab ǃnâ kai ǀGoraǃgâtsēsa ge sâuba. 7 Sodoms tsî Gomoras tsî ǁîra ǂnamipe hâ ǃārodi hîa ǁîra ǁkhāra khami ǀaib ǃnâ māǁnâsen tsî Elob mā-am tama hâ ǁgoe-ūgude ge saodi ge ǀamoǀaeb di ǁkharaba aiǁgaus ase hoan nî mûse ra tani.
8 ǁNās ǁkhās xasen ge ǁkhāti ǁhapo rana sorodi âna ǀuriǀuri, ǃKhūb ǁkhāsiba ǂhara tsî ǀhomsina ra ǃkhāǃkhā. 9 Xaweb ge Mixaeli, ǂamǀhomǃgāba Moseb soros xab ge ǁgâuab* ǀkha ǂnoaguo ǁîba ǃkhāǃkhā ra mîdi ǀkha ǀgoraǃgâsa dītsâ tama ge i, xawe “Ab ǃKhūba ǂgōǀau tsi!” ti ge mî. 10 Xawe nēn hîa ǀūn a xūna ra ǃkhāǃkhān xawen ge ǂūsi a tin ra ǂâi i ǃnâ ǁnâuǃāoǃnâ ǀgurun khami a ǀhôagao. 11 Tsūba re ǁîna, Kainni di daob ǃnân ge ǃgû tsî mari-i amǃnâs ai Bileammi di dīsās ǃnâ ǁhao tsî Koraxi di mâǃoas ǃnâ ǁîb ǁkhāb khami ge hîkākāhe. 12 ǁÎn ge ǀurisa ǂnaon hîa sadu di ǀnamǂûǀhaodi tawa sauaǃnâ tamase ra ǁâudīǀhaon, ǁî-aitsama ǀgui ra kōǃgâsenna. ǁÎn ge ǂoab xa ra ǃgommahen ǃâun, ǁgam-e ūhâ taman khami ī. ǂÛo tsî hoaragase ǁō hâ, ǃnoma-o hain haiǃkharub ǁaeb din khamin ge ī. 13 ǁAixa ǃgabigu hurib digu, ǁîn di taosiba ra ǁgauǂuigu; ǀgamiron ǁîna xub ǃkhaenab di ǃkhaeba ǀamose sâuhe hân khamin ī.
14 Tsîb ge ǁkhāti Henoxi, Adamma xu hûǁî hâba ǁîn xa kēbo tsî ge mî: “Mû, ǃKhūb ge ǁîb di disiǀoadisi ǃanun ǀkha ǃgoaxa, 15 hoana ǀgoraǃgâ tsî mâ ǀoms hoasa nî ǁkharase, ǁîn di eloxoresa sîsengu hîan gere dīgu tsî ǃkhāǃkhāmîn hîan eloxoresa ǁore-aona ǁîb ǃoagu gere ǃhoan ǃaroma.”
16 Nēn ge ǃgae-aon, ǂkhîoǃnâ tsî ǁîn di turagu ǃoa ra ûina. ǁÎn ge ǀgapise tsî îsa xūna khoen xa ra ǃhoa, ǁîn di ǃgâiba ǃoa.
ǃKhâikhomdi tsî ǁguiǂamdi
17 Xawe sadu ǀnamsabedo, ǂâis ǃnâ ūhâ re, sada ǃKhūb, Jesub Xristub xa ge ǀnai apostelgu* xa mîhena. 18 ǁÎgu ge sado ge mîba: “ǀUniga tsēdi ain ge ǃhō-aon hîa ǁîn di turagu eloxoresa xūn digu ǃnâ ra ûina nî hâ.” 19 ǁÎn ge ǀgorasa ra ǃaromana, ǂūsi khoen a tsîn Gagaba ūhâ tama amaga. 20 Xawe ǀnamsabedo, sadu di ǃanu ǂgoms ǃnâ ǂnubikhâisen re, ǃAnu Gagab ǃnâ ra ǀgorese. 21 ǃKhōbasen Elob di ǀnammi ai, sada ǃKhūb Jesub Xristub di ǀkhomxasib ǀamo ûib diba ǃâu hâse.
22 ǁNān îganǀgē rana ǀkhomxa, 23 î nauna ǀaesa xu tsubuǂuis ǀkha sâu, nauna ǃaoǃgâb ǀkha ǀkhomxa tsî ǁkhāti sarab hîa sorosi ǁoreb ǀkha ǂnaoǂnaohe hâba ǁkhan.
Kares di ǀgores
24 Nēsi ǁnāb hîa a ǁkhāb, sado ǃnôa du nî ǃkhaisa xu sâu tsî sado ǁîb di trons aiǃâ ūose ǂkhaisib ǃnâ mâi ǁkhāb, 25 ǀguise hâ Elob, sada ǃGâiǃōdī-aob, Jesub Xristub sada ǃKhūba ab, ǂkhaisib, kaisib, gaosib tsî ǁkhāsiba ūhâ, ī ge ǁaegu hoaga xu, nēsi tsî ǀamos kōse! Amen.*
© Khoekhoegowab Elobmîs © Bible Society in Namibia, 2020.
