Ais di danhes tsî hîkākāhes
1 ǃKhūb ge Josuab ǃoa ge mî: “Hoaraga toroǃkhamaoga ūsao, î Aisa ǁnāǂam. Tā ǃao tamas ka io ǂkhabuǂâi. Tita ge Ais di gao-aob ǂama dansa nî mā tsi; ǁîb di khoen, ǃās tsî ǃhūb tsîn hoan ge nî sa. 2 Jerixos tsî ǁîs di gao-aob ǀkhats ge dī khamits ge Ais tsî ǁîs di gao-aob ǀkha nî dī, xawe nē ǃnāsats ge ǁîs di xūn tsî ǂgarib tsîna a ūbasen ǁkhā. ǀNî toroǃkhamaoga ǂganǃgâsase ǃās ǃgâb ai hâ kai, î gu ǃāsa ǃgâbǀkhāba xu ǁnāǂam.”
3 Ob ge Josuaba ge ǂhomisen, ǁîb toroǃkhamaogu hoagu ǀkhab Ais ǃoa nî ǃgûse. ǁÎb ge ǃnonadisiǀoadisi ǁkhoaǂgaoxa aoga ǁhûiǂui tsî ǁîga tsuxuba ge sî, 4 nē mîmās ǀkha: “ǃĀs nauǀkhāb ai sī gau, xawe tā ǃāsa xu ǃnūse hâ; ǃāsa ǁnāǂamsa ǃoa ǂhomisase hâ. 5 Tita tsî ti khoegu tsîge ge ǃās ǁga nî ǀgūǀgūsen. Ais di aogu ga sige ǃoagu a ǂoaxa, o ge ge sige ǂguro ǃnās ǁkhās khami dabasen tsî nî ǁhâ. 6 ǁÎgu ge sige nî ǃgôaǃgon, ǁîga ge ǃāsa xu nî ǂgaeǂguibēs kōse. ǁÎgu ge ǁîga xu ge ǂguro ǃnās ǁkhās khami ra ǁhâ ti nî ǂâi. 7 O go ge sago gau go hâpa xu ǂoaxa tsî ǃāsa nî ǂgâǃnâ. ǃKhūb sago Elob ge ǁîsa nî mā go. 8 ǃĀs ǃnâ go ǂgâ, o go ge ǁîsa nî khauǃkhū, ǃKhūb ge mîmā hâ is ǁkhās khami. Nēdi ge sago ǁguiǂamde.” 9 ǁNātib ge Josuaba ǁîga ge sîǂui tsî gu ge ǁîgu gauǃkhais ǁga ǃgû tsî ǁnāpa sī ge ǃâu, Ais di huriǂoas ǃnâ, Ais tsî Betels tsîra ǁaegu. Josuab ge ǁnā tsuxuba hâǃkhaib ǃnâ ge hâ.
10 Josuab ge ǃnauǁgoaga khâi tsî toroǃkhamaoga ge ǂgaiǀhao, tsî gu ge ǁîb tsî Israeli ǂgaeǂgui-aogu tsîga ǁîga Ais ǁga ge ǂgaeǂgui. 11 ǁÎb ǀkha hâ toroǃkhamaogu ge ǃās di dao-ams kōse sī tsî hâǃkhaiba ǀapasǀkhāb ai ge ǂnaumâi, ǃgoaǃnāb ǁîgu tsî Ais tsîn ǁaegu hâse. 12 Josuab ge ǁaubexa koroǀoadisi nî ī khoega ū tsî ǁîga gaugausen hâse ge hâ kai, ǃās di huriǂoasǀkhāb ai, Ais tsî Betels tsîra ǁaegu. 13 Toroǃkhamaogu ge ǃkhammi ǃoa ge ǀgoraǂgāsa i, dana hâǃkhaiba ǃās di ǀapas ǃnâ tsî nau toroǃkhamaoga huriǂoasǀkhāb ai. Josuab ge ǁnā tsuxuba ǃgoaǃnāb ǃnâ ge hâ. 14 Ais di gao-aob ge Josuab aogab ge mûo kaise ge ǃhae. ǁÎb tsî ǁîb khoegu tsîn ge Jordanǃgoaǃnāb ǁga ge ǂoa, Israelǁîgu ǃoagu gu, ǂguro gu ge ǁîgu ǃoagu ǃkham hâ i ǃkhais ǁkhās ai nî ǃkhamse. ǁÎb ge ǃgâbǀkhāba xu gu nî ǁnāǂamhe ǃkhaisa ge ǀū i. 15 Josuab tsî ǁîb aogu tsîgu ge ǃkhoeni ra khami ǃgaroǃhūbǀkhāb ǁga ge ǁhâ. 16 Hoaraga aogu ǃās ǃnâ hâgu ge ǁîga gu nî ǃgôaǃgonse ge ǂgaiǀhaohe; ǁîgu ge Josuaba ǃgôaǃgons ǀkha o gu ra ǃnūo ǃāsa xu ge ǃnū. 17 Ais di aogu hoagu ge Israelǁîga ge ǃgôaǃgon tsîs ge ǃāsa ǁkhowa-amsase ge mâ, ǁîsa nî ǁkhauba khoe-i xare-i a ǀkhaise.
18 Ob ge ǃKhūba Josuab ǃoa ge mî: “ǁHâigôab âtsa Ais ǃoa ǁgau, tita ge ǁîsa satsa ra mā xuige.” Ob ge Josuaba mîbaheb ge khami ge dī. 19 Tsî Josuab ǃommi âba ra ūkhâi, hîa gu ge gaugausen ge hâ i aoga ǃhaese khâimâ tsî ǃās ǃnâ ǃkhoeǂgâ tsî ǁîsa ge ū. ǁÎgu ge ǁîsa ǁnātimîsi ge ǃkhāǂhubi. 20 Ais aogu ge ǂnan gu geo, ǀanni ǃāsa xu ra khâi ǃkhaisa ge mû. ǁÎgu ge ûiǂoa gu nî ǃkhai-i xare-e ge ūhâ tama hâ i, ǃgaroǃhūb ǃoa ge ǁhâ Israelǁîgu ge dabasen tsî ǁîga ǁnāǂam xui-ao. 21 Josuab tsî ǁîb aogu tsîgu ge nau aogu go ǃāsa ū ǃkhaisa mû, tsî ǃās ra ǂhubisa, o gu ge dabasen tsî Ais aoga ge ǃgamtsoatsoa. 22 Tsî gu ge ǃās ǃnâ hâ Israelǁîgu tsîna ǃkhammi ǃoa ge ǂoaxa. ǁNāti gu ge Ais aoga hoa ǀkhāga xu Israelǁîgu xa xāǂgāhe tsî hoatsama ge ǃgamhe. ǀGuib tsîn ge ûiǂoa tamas ka io ûiǃgau tama ge i, 23 Ais di gao-aob ǀguib, xaweb ge ǁîba ǃkhōhe tsî Josuab tawa ge sī-ūhe.
24 Israelǁîgu ge ǁîga ge sauruǃgon khākhoegu hoaga ǃgaroǃhūb ǃnâ ge ǃgam, tsî gu ge ǁnāpa xu Ais ǁga oa tsî ǁnāpa hoaraga khoena sī ge ǃgam. 25-26 Josuab ge ǁhâigôab âba Ais ai ǁgaumâiǀgara tsî ǁîba ǁgui tama ge i, hoaraga khoen ge ǃgamhes kōse. Hoaraga khoen Ais din ge ǁnātsē ge ǃgamhe, disiǀgamǀaǀoadisi aorekhoegu tsî tarekhoedi tsîna. 27 Israelǁîgu ge ûitsama xūn tsî nau xūn ǃās din tsîna ge ūbasen, ǃKhūb ge Josuaba mîba khami. 28 Josuab ge Aisa khauǃkhū tsî ǁîsa hîkākāsa ǃās ase ge ǁnāxū tsîs ge nētsēs kōse ǁnāti ī. 29 ǁÎb ge Ais gao-aoba hais ai ǂgāmâi tsî ǁîb sorosa ǁnāpa ǃuis kōse ge ǁnāxūmâi. Soresǂgâb ǀkhab ge Josuaba ge mîmā, îs sorosa ūǁnâhe tsîs ge ǁîsa ǃās di dao-ams tawa aoxūhe, tsî kai ǀuiǁkhoposa ǁîs ai ge ǀhaoǀhaohe, nētsēs kōse ǁnāpa ǂnôasa.
ǂHanub di khomaihes, Ebalǃhommi ai
30 Josuab ge ǃKhūb, Israeli di Eloba Ebalǃhommi ai altarsa ge ǂnubiba. 31 ǁÎsab ge Moseb, ǃKhūb di ǃgāb ge Israelǁîna mā hâ i xoaǁguigu ǃoa ge dī, Moseb ǂHanub ǃnâb ge mîsa: “Altars, ǀurin ǀkha ǁhāǂuihe tama ǀuidi ǀkha a ǂnubisas.” ǁÎs ain ge ǃKhūba khauǁguibade ǁguiba tsî ǂkhîbagusǁguibadi tsîna ge hā-ū. 32 ǁNāpab ge Josuaba Israelǁîn hoan mûǁae Moseb ge xoa hâ i ǂHanub di ǁgâiǁnâba ǀuidi ai ge dī. 33 Israelǁîn tsî ǁîn di ǂgaeǂgui-aogu, ǂamkhoegu, ǂhanuǂhanu-aogu tsî ǁîn ǁaegu hâ ǃhaokhoen tsîn ge hoan ge ǃGaeǀhaos ǂGaes ǃKhūb dis di hoa ǀkhākha ai, Leviǁî pristergu ǁîsa ra tanigu ǃoa-ai ge mâ i. ǃKhare ǃâb nē khoen dib ge Gerisimǃhommi ais ai ge mâ i tsî nau ǃkhare ǃâba Ebalǃhommi ais ai. ǃKhūb di ǃgāb, Moseb ge ǁîna ǁnātin nî dīsa ge mîmā, ǀkhaeban nî ǃkhōǃoa ǁaeb ge hāo. 34 Ob ge Josuaba hoaraga ǂhanuba ǃgarise ge khomai, ǀkhaeb tsî ǀâxareb tsîkha ǃkhōǂgā hâse, ǂhanub ǂkhanis ǃnâ i a xoamâisa khami ǀgui. 35 Mâ mîmās Moseb dis hoasab ge Josuaba hoaraga ǂnubisa ge khomaiba. ǁÎn ǃnân ge tarekhoedi, ǀgôan tsî ǃhaokhoen, Israelǁîn ǁaegu ge hâ in tsîna ge hâ i.
© Khoekhoegowab Elobmîs © Bible Society in Namibia, 2020.
