Elob ǂhanugu ge ǀuigu ai xoahe
1 Moseb tsî Israelǁîn di ǂgaeǂgui-aogu tsîgu ge khoen ǃoa ge mî: “Nētsē ta nî mîmā du ǁgui-aidi hoade ǁnâuǀnam. 2 ǁNā tsēs hîa du ga Jordanǃāba ǃgâu tsî ǃKhūb sadu Elob ge sadob nî māse mîmâi ǃhūb ǃnâ ǂgâ, o du ge kaiǃgâ ǀuiga mâi tsî ǃurise nî ǂkhau. 3 ǃKhūb sadu aboxagu di Elob ge mā dub nîse mîmâiba du ǂûtanixa ǃhūb ǃnâ du ga ǂgâ, o ǀuigu ai nē hoaraga ǂhanugu tsî ǁkhāǁkhādi tsîna xoa. 4 Jordanǃāba du ga ǃgâu, o Ebalǃhommi tawa tita nētsē ra ǁgui-ai du khami nē ǀuiga khaomâi, î ǃurise ǂkhau. 5 ǁNāpa du ge ǃKhūb sadu Elob ǃaroma ǀui-altarsa nî ǂnubi, xawe tā ǁîs ai ǀuri-e sîsenū tamas ka io ǀuiba ǁhā. 6 ǃKhūb sadu Eloba du ge noxopa sîsenūhe tama ǀuin ǀkha ǀgui altarsa nî ǂnubiba. ǁNāpa du ge khauǁguibade ǃKhūb sadu Elob di ǃgôasib ǃaroma nî ǁguiba. 7 ǁNāpa du ge ǁkhāti ǁguiba tsî sadu ǂkhîbagus ǁguibade ǂû tsî ǃKhūb sadu Elob di mûǁae nî ǃgâiaǂgao. 8 ǃUrise ǂkhauǀkhāsa ǀuigu ai ǃKhūb di mîmāde khomaihe ǁkhāse ǃgāsase xoa.”
9 ǁNās khaoǃgâb ge Moseba Leviǁî pristergu ǀkha ǀhao hâse Israelǁîn ǃoa ge mî: “Israelǁîdo, ǃnō î ǃgâ te re. Nētsē du ge go ǃKhūb sadu Elob di ǁae kai go; 10 ǁnā-amaga, tita ra mā du mîmādi tsî ǂnûiǂgādi ǁîb didi hoade ǁnâuǀnam, î ǃkhōǀgaipe.”
ǁNâuǀnamoǃnâsib ǀâxaregu
11 ǁNāpa xub ge Moseba Israelǁîn ǃoa ge mî: 12 “Jordanǃāba du ga ǃgâutoas khaoǃgâ di ge sao ra ǁaede ǀkhaeb ga ǁîn ai gowaǂuihe, o Gerisimǃhommi ai nî sī mâ: Simeonni, Levib, Judab, Isaskari, Josefi tsî Benjaminni ǃhaodi tsîde. 13 ǀÂxareb ga gowaǂuihe, o di ge sao ra ǃhaode Ebalǃhommi ai nî sī mâ: Rubenni, Gadi, Aseri, Sebulonni, Danni tsî Naftalib ǃhaode. 14 Leviǁîgu ge sao ra mîde ǃgari dommi ǀkha hoaraga Israelǁîn ǃoa nî mî:
15 “ ‘Elob di ǀâxareb ge mâ khoe-i hoa-i hîa ǀui-i, hai-i, tamas ka io ǀuri-elo-ī-e ra kuru tamas ka io ǀhôagaose ǀgoreǀî-i hoa-i ai hâ. ǃKhūb mûǁaes ge ǀkhara elona ǀgoreǀîsa a ui-uisa.’
“Tsîs ge hoaraga ǁaesa ‘Amen!’ ti nî ǃeream.
16 “ ‘Elob ǀâxareb ge ǁî-i îra ra ǃharaxū khoe-i hoa-i ai nî hâ.’
“Tsîs ge hoaraga ǁaesa ‘Amen!’ ti nî ǃeream.
17 “ ‘Elob di ǀâxareb ge ǀgūkhoe-i di ǃhūǀgoras ǁgauǁgausa ga ūbe khoe-i hoa-i ai nî hâ.’
“Tsîs ge hoaraga ǁaesa ‘Amen!’ ti nî ǃeream.
18 “ ‘Elob di ǀâxareb ge ǂgī khoe-e tsū daob ai ra ǂgaeǂgui khoe-i hoa-i ai nî hâ.’
“Tsîs ge hoaraga ǁaesa ‘Amen!’ ti nî ǃeream.
19 “ ‘Elob di ǀâxareb ge ǃhaokhoen, ǃguniǀgôan tsî ǃoataradi tsîna ǂhanugu âna ra ǀhana khoe-i hoa-i ai nî hâ.’
“Tsîs ge hoaraga ǁaesa ‘Amen!’ ti nî ǃeream.
20 “ ‘Elob di ǀâxareb ge ǁîb îb di taradi ǀguis ǀkha ra sorosise ǁgoe ǀgôab hoab ai nî hâ.’
“Tsîs ge hoaraga ǁaesa ‘Amen!’ ti nî ǃeream.
21 “ ‘Elob di ǀâxareb ge ǀgurun ǀkha ra sorosise ǂharugu khoe-i hoa-i ai nî hâ.’
“Tsîs ge hoaraga ǁaesa ‘Amen!’ ti nî ǃeream.
22 “ ‘Elob di ǀâxareb ge ǃgâsas âb ǀkha ra sorosise ǁgoe khoeb hoab ai nî hâ.’
“Tsîs ge hoaraga ǁaesa ‘Amen!’ ti nî ǃeream.
23 “ ‘Elob di ǀâxareb ge ǀuisas âb ǀkha ra sorosise ǁgoe khoeb hoab ai nî hâ.’
“Tsîs ge hoaraga ǁaesa ‘Amen!’ ti nî ǃeream.
24 “ ‘Elob di ǀâxareb ge ǀhôagaose nau khoe-e ra ǃgam khoe-i hoa-i ai nî hâ.’
“Tsîs ge hoaraga ǁaesa ‘Amen!’ ti nî ǃeream.
25 “ ‘Elob di ǀâxareb ge mari-i ǃaroma ǀhapio khoe-e ra ǃgam khoe-i hoa-i ai nî hâ.’
“Tsîs ge hoaraga ǁaesa ‘Amen!’ ti nî ǃeream.
26 “ ‘Elob di ǀâxareb ge Elob di mîmādi tsî ǁkhāǁkhāde ǁnâuǀnam tama khoe-i hoa-i ai nî hâ.’
“Tsîs ge hoaraga ǁaesa ‘Amen!’ ti nî ǃeream.
© Khoekhoegowab Elobmîs © Bible Society in Namibia, 2020.
