Jeremiab ge Tempeli ǃnâ ra aoǁnâ
1 Nēs ge mîs ǃKhūba xu ge Jeremiaba hābasa: 2 ǃKhūb ommi di ǂgâ-ams tawa mâ îts nē ǂhôasa māǃkharu: “ǁNâu re ǃKhūb di mîsa sadu Judab didu, nē ǂgâ-amsa-u ǃKhūba nî ǀgoreǀîse ra ǂgâdo. 3 Nētib ge ǃKhūb Hoaǀgaixa Eloba ra mî: ‘Sadu di ûiǀgaugu tsî dīga dī-unu re, o ta ge nē ǃās ǃnâ nî ǁan kai du. 4 Tā ǂkhaba mîdi ai ǂgomaiǂnûi’ tsî ‘Nēb ge ǃKhūb di Tempela! ǃKhūb di Tempeli, ǃKhūb di Tempeli’ ” ti mî re.
5 “Sadu ga sadu daogu tsî dīga ǀkharaǀkhara tsî ǂhanu-aise ûi-ūguo, 6 tsî du ga ǃhaokhoen, ǃoaǀgôan tamas ka io ǃoatarade ǁgâiǀā tama i, tsî ǀhapio ǀaoba ǂnâxū tama i, tsî du ga sadu ǂkhôab ase ǀkhara elona ǃoaba tama io, 7 o ta ge sadu ǀkha nē ǃās ǃnâ nî ǁan, ǃhūb sadu aboxaga ta ge ǀamosib kōse māb ǃnâ.
8 “Mû, sadu ge ǂkhaba mîdi harebeoǃnâdi ai ra ǂgomaiǂnûi. 9 ǃNarits nî, ǃgamts nî, ǃgamekhôats nî, ǂkhabasets nî nū, wirokǁguibadets Baala nî hā-ūba, ǀkhara elon ǀūts ge ina sao, 10 tsîts ǁnās khaoǃgâ ti Tempeli, ti ǀons ǃoa ǂgaiheb ǃnâ ǂgâxa tsî tita ǀgoreǀî tsî nî mî: ‘Sida ge orehe hâ!’ O, ǁnāsa nē ǁgaiǁgaisa xūna dīs ǃoa orehesa? 11 Nē ommi ti ǀons ǃoa ǂgaihe hâba kha sadu mûǁae ǃnari-aon di ǁhāb ase ge ī? Tarena du ra dī ǃkhaisa ta ge ge mû”
tib ge ǃKhūba ra mî. 12 “Nēsi ǁnâi Silos ǁga ǃgû re, ǂguro ta ti ǀonsa ge ǁan kaipa, î sī kō re tare-e ta ǁîsa ti ǁaes Israels ǃaroma ge dīsa. 13 Nē sîsengu hoaga du ra dī amaga ta ge sadu ǀkha ǁkhawa tsî ǁkhawa ge ǃhoa, xawe du ge ǃgâ tama ge i, tsî ǂgai ta gere xawe du ge ǃeream tama ge i”
tib ge ǃKhūba ra mî.14 “ǁNā-amaga ta ge tita nē ommi, ti ǀons ǃoa ǂgaihe hâb, Tempeli ǁîba du ǂgomaiǂnûi hâb tsî nē ǃkhais tita ge sadu tsî sadu îna mās tsîna nî sîsenū, Silosa ta ge sîsenūs ǁkhās xase. 15 O ta ge sado ti aisa xu nî aoxū, sadu ǃgâsan hoan Efraimmi din ǀkha ta ge dīs ǁkhās xase.
ǁAes di ǁnâuǀnamoǃnâsib
16 “Satsa tā nē ǁaesa ǀgoreba, îts tā ǁîna ǃau tsî ǀkhomaba; tā tita tawa ǁîna ǀkhomaba, ǃgâ tsi ta tide xuige. 17 Tarenan Judab ǃādi ǃnâ tsî Jerusalems ǃgangu ǃnâ ra dī ǃkhaisats mû tama hâ? 18 ǀGôan ge ra ǀaere, ǁgûgu ge ǀaesa ra khau tsî di ge tarade ǀâpereba kini tsî tsamperena ǁîn di elos, ǀHommi Gaos tin gere ǂgaisa ra amba. ǁÎn ge āǁguibade ǀkhara eloga ra ǂnâǂuiba, tita ǁaib ǃoa ǁgoaǂuis ase. 19 Titan ra ǁgoaǂui? ǁÎ-aitsaman kha tsûtsûsen tama hâ?”
tib ge ǃKhūba ra mî.20 ǁNā-amagab ge ǃKhūb Eloba nēti ra mî: “Mû, ti ǁaixasib tsî ǁgôasib ge nē ǃkhaib ai nî ǁhōǂuihe, khoesib ai tsî ǀgurun tsî xamarin ai, ǃhanab hain tsî ǃhūba xu hâ ǃhanaǂûn ai; tsîn ge ǀarihe ǁoa ǀaes khami nî ǂhubi.”
21 Nētib ge ǃKhūb Hoaǀgaixab, Israeli Eloba ra mî: “Noxopa ǃnāsa khauǁguibade sadu ǁguibadi tawa hā-ū î du ǁgan-e ǂû. 22 Sadu aboxagu ǀkha ta ge tita Egipteba xu ta ge ǁîna ǂgaeǂguiǂuisa xu ǃhoa tama hâ i, tsî khauǁguibadi tsî ǂāǁguibadi xa ge mîmā tama hâ i? 23 Xawe ta ge nē mîmāsa ǁîna ge mā: ‘Ti domma du ga ǃgâ o ta ge tita sado Elose nî ība tsî du ge sado ti ǁaese nî ī. Xawe du ge mîmā du ta ra khami nî dī, ǃgâise i sadu ǀkha nî ǃgûga.’ 24 Xawen ge ǂgaes âna tiǀî ǂō tama i tsî ǁîn di ǀapemādi tsî ǃnâudanaxasib ǁîn di ǂkhaba ǂgaogu dib ai ǃgû tsî aisǀkhāb ǁgas ose xawe khaosǀî ge ǃgû. 25 Sadu aboxagu ge Egipteba xu ǂoaxa tsēsa xu nētsēs kōse ta ge ti ǃgāgu kēbo-aoga ǃnākorobe ra sî. 26 Xawe i ge ǀgui-i tsîna ǃgâ te tamas ka io ge ǃgaoǃgâ tama i tsî ge ǂnîǃaoxa. Tsîn ge ǁîn aboxan ǃgâ-ai ge ǁore.
27 “Ots ge nē mîdi hoade ǁîn ǀkha nî ǃhoa, xawen ge ǃgâ tsi tide. ǁÎnats ga ǂgai xawen ge ǃeream tsi tide. 28 ǁNā-amaga ǁîna mîba re: ‘Nēs ge ǁnā ǁaes hîa ǃKhūb, ǁîn Elob di domma ǁnâuǀnam tama i tsî ǂgōǀausa ǃkhōǃoa tama ge isa. Amab ge ǀkhai tsî ams âna xu ūǂuihe hâ.
Hinomǃgoaǃnāb di ǁoren
29 “ ‘Danaǀûn âsa ǂkhom î aoxu re;
ǃgae re ǀgapi ǃkhaidi ai.
ǃGaetsanasa ǃnâugu ai ǁnae re,
ǁîb ǁaixasib ǃaromab ge ǃKhūba
ǁnāxū tsî ǂhara xui-ao.’
30 “Judab ôan ge ti mûǁae ǂkhabana ge dī”
tib ge ǃKhūba ra mî.ǁÎn ge ǁîn di ǁgaiǁgaisa īga ǁnā ommi ǁîb ti ǀons ǃoa ǂgaihe hâb ǃnâ ge mâi, ǁîban nî ǃanuoǃnâ kaise. 31 ǁÎn ge ǀgapi ǃkhaib Tofeta Hinomǃgoaǃnāb ǃnâ ge ǂnubi, ôasanan ǁnāpa nî ǁguibase. 32 Mû, tsēdi ge ǃgoaxa ǃaruǀîb nē ǃkhaiba Tofet tamas ka io Hinomǃgoaǃnāb ti ǂansa tide, xawe ǃGamaonǃgoaǃnāb ti nî ǂansaba. 33 Sorodi nē khoen didi ge nî ǀhomanin di ǂû kai, tsî khoe-i xare-i ǁîna nî ǃaoǃao-i ge hâ tide. 34 Judab ǃādi tsî Jerusalems ǃganga xu ta ge dâb di ǀōba nî ǃnō kai, ǃgameǁâus ǃgâiaǂgaoba nî ǃnō kai, ǃhūb nî ǃū-aisa xui-ao.
© Khoekhoegowab Elobmîs © Bible Society in Namibia, 2020.
