Holoferneb ge Kanaanǁîna ra dîǃnâ
1 Holoferneb Asiriab toroǂnubis ǃkhōdana-aob ge Israelǁaes ra torob ǃaroma ǂhomisen, ǃhommi ǃoa hâ ǃkharuǃkhaiga ǁkhaeǂganam, hoaraga ǀgapi ǃhomǂaoga ǀgaiǀgai tsî daoga ǂgāgu ǃnâ ǂganam ǃkhaisa a ǁnâu, 2 ob ge kaise ge ǁaixa. ǁÎb ge hoaraga Moab ǂgaeǂgui-aogu, Amonni ǃkhōdana-aogu tsî gowoniagu Mediteraneahurib ǀnomammi ǀkharib diga ǂgaiǀhao 3 tsî ǁîgu ǃoa ge mî: “Sago Kanaanǁîgo, tarin nē ǃhomgu ǃnâ ǁan hâ ǃkhaisa mîba te re. Mâ kai ǃādi ǃnân ǁan hâ? ǁÎn toroǂnubisa mâtikōse a kai? ǁÎn ǀgaib tsî ǁaposasiba mâpa xun ra hō? Tari-e a ǁîn gao-ao tsî ǁîn toroǂnubisa ra ǂgaeǂgui? 4 Tare-i ǃaroman ǁîn ǀguina hoa khoen huriǂoas ǃnâ hâna xu tita ǃoa hā tsî māǁnâsensa ge ǂkhā?”
Axiori ge Holoferneba ra ǃeream
5 Ob ge Axiori, Amonǁîn ǂgaeǂgui-aoba Holoferneba ge ǃeream: “ǃGôahesatse, nē khoen sa hâǃkhaib ǀgūse ǁan hân xa ta ga amaba mîba tsio, o toxopa ǃgâ te re. Tita ge ǂhumiba tsi tide. 6 Nē khoen ge Babiloniaǁîn di ǀnî suriba xu hâ, 7-8 xawen ge Israelǁîna ǁîn aboxagu ǁnaetiga sao tsî Babiloniaǁî elona ǀgoreǀîsa ge ǂkhā. ǁNās ǃās ǃnân ge ǀkhara Elob, ǀHommi di Eloba ge ǀgoreǀîtsoatsoa. Babiloniaǁîn ge ǁnātimîsi Israelǁîna ge ǁgari, în ǁîn ǃhūba xu ǂoa tsî Mesopotamiab ǃnâ sī ǁan tsîn ge ǁnāpa gaxu ǁaeba ge hâ.
9 “ǁNās khaoǃgâb ge ǁîn Eloba ǁîna ge mîmā, în Mesopotamiaba xu ǂoa tsî Kanaanǃhūb ǃoa ǃgû tsîn ge ǁnāpa ǃhuniǀurib, ǀhaiǀurib tsî ǀgoan xa kaise ge ǃkhū. 10 ǃÂtsūǀkhāb ge hoaraga Kanaanǃhūba hāǂam, on ge nē khoen, ega ge Israelǁîn ti ǀonǂgaihena, Egipteb ǃoa doe tsî ǁnāpa ǂâu hâ ǂûn hâs kōse ge hâ. ǁNāpan hâ hîan ge ǃgôaheǁoasa ǀnōb kōse ge kaiǁae kai. 11 Tsîb ge gao-aob Egipteb diba ǁîn ǃoagu ge dabasen. ǁÎb ge ǁîna ǀgaisase sîsen tsîn nî ǂnubiǀuide kuru ǃkhaisa ǁgari tsî ǁîna ǁgâiǀā tsî ge khobodī. 12 On ge ǁîna Elob ǃoa ge ǀgore tsîb ge ǁîba tsūǀkhāgu Egipteba ge hui-ose ǁnāxūga ge sî. On ge Egipteǁîn xa ge sauruǂuihe. 13 Israelǁîn Elob ge ǀApahuriba ǁîn aiǃâ ge ǂnâ kai tsîn ge khoena ǃnorasase ge ǃgûǃkharu, 14 tsîb ge ǁîna Sinaiǃhommi tsî Kadesbarneaǀaus ǃoa garu daob ai ge ǂgaeǂgui.
“Israelǁîn ge hoaraga khoen, Kanaanǃhūb ǃkhawagas ǃnâ ge ǁan hâ ina ǁgariǂui, 15 Amorǁîn ǃhūba ǃnamiǂgā, Hesbons khoena ǃgamǂui, Jordanǃāba ǃgâu tsî hoaraga ǃhomxa ǀkhariba ge ūbasen. 16 ǁÎn ge Kanaanǁîn, Perisǁîn, Jebusǁîn, Sexemǁîn tsî hoaraga Girgasǁîn tsîna ge ǁgaruǂui. Tsîn ge Israelǁîna gaxu ǁae-e ǁnā ǃhomgu ǃnâ ge ǁan hâ i.
17 “ǁÎn Elob ge ǁoreba ǁkhan hâ tsîn ge ǁîb ǃoagun ǁore tamas kōse gere ǃgâiǃgâ. 18 Xawen ga ǁîba ǁnâuǀnamoǃnâ, on ge ǂgui torogu ǃnâ ǂguin âna hoaragase hîkākāhe tsî ǃkhōsaben ase ǃhao ǃhūgu ǃoa ge ǃgû-ūhe. ǁÎn Elob di Tempela ǃhūb kōse hîkākāhe tsîdi ge ǁîn di kai ǃāde ge ǁkhâuǁnâhe. 19 Xawe ǁîn Elob ǃoan ge dabasen, on ge ǁîn khākhoen xan ge ǃkhōsabese ǀgaruǀgaruhe hâ i ǃhūga xu ǁgûsi ǃhūb ân ǃoa ge oahā. ǁÎn ge ǁkhawa ǁîn di Tempeli ge mâǃnâ i ǃās Jerusalemsa ū-oa tsî ǃhomgu, khoe-i xare-i ge ǁanǃnâ tama hâ igu ǃnâ ge ǁan.
20 “Ti ǃkhōdana-ao tsî ǃgôahesatse, nē khoen ga ǁîn Elob ǃoagu ǂan tamase ǁore, tsî ge ga dīsādi ǃnân a ǀhapixa ǃkhaisa ǂanǁapo, o ge ge ǁîna ǁnāǂam tsî a dan ǁkhā. 21 Xawen ga ǁîn di Elob ǂhanuba ǁnâuǀnam hâo, ots ge ǁîna nî ǁnāxūǂui. ǁÎb ge ǁîna nî ǁkhauba tsî ge ge hoaraga ǃhūbaib aiǃâ nî taotaohe.”
ǂNubis tanisenǀgaub
22 Axiori ge gowaǀîs âb ǀkha toa, on ge Holoferneb di tentommi ǂnamipe ge mâ i khoen hoana ǁîba ge mâǃoatsoatsoa. Holoferneb di ǂhunuma danakhoegu tsî ǁkhāti Moabǁîn tsî Mediteraneahuri-amma xu hā hâ khoen ge Axiori nî ǃgamhe ǃkhaisa gere ǂgaoǀkhā.
23 “Tare-e da ǁnā Israelǁîna nî ǃaoba?” tin ge gere dî. “ǁÎn ge sida ǃoagu ǃkhams ǃaroma kaise a ǂkhabusa. 24 ǃKhōdana-ao Holofernetse, sa kai toroǂnubis ge ǁîna supuse nî ǃkhamdan, xuige a da aiǃgû.”
© Khoekhoegowab Elobmîs © Bible Society in Namibia, 2020.
