Eksodus 1 - Khoekhoegowab New Translation 2020 (KKG20)

Israelǁîn Egipteb ǃnâ

1 Sao ragu ge Jakob ôagu, ǁîgu îb tsî mâb hoaba ǁîb omaris ǀkha Egipteb ǁga ge hāga: 2 Rubenni, Simeonni, Levib, Judab, 3 Isaskari, Sebulonni, Benjaminni, 4 Danni, Naftalib, Gadi tsî Aseri tsîga. 5 Hoaraga surib Jakob dib ge ge hûdisi i. ǁÎb ôab Josefi ge ǀnai Egipteb ǃnâ ge hâ i. 6 Tsî ǁaeb ra ǃkharu khami gu ge Josefi, ǁîb ǃgâsagu tsî ǁîgu ôananôagub Kanaanǃhūba xu Egipteb ǁga ge hāgu tsîna ǁō, 7 xaweb ge ǁîgu surib, Israeli diba ǃaruǀî ôananôagu, kai ǃgôab ǃnâ ǂguiǂguisen tsî ge ǀgai, Egipteb ge ǁîn xa ǀoas kōse.

8 ǀAsa gao-aob, Josefa ge ǀū ib ge ǂgui kurigu khaoǃgâ ge Egipteb di ǂgaeǂgui-ao kai. 9 Ob ge ǁîba ǁîb khoen ǃoa ge mî: “Mû, nē khoen Israeli din ge sada ǃoagu kaise ǂgui tsî a ǀgaisa. 10 Sada khākhoen ga ǁnāǂam da, on ge Israelǁîna ǁîn ǀkha ǀhao tsî sada ǁnāǂam, tsî nēs ǃnâ-u Egipteba xu a ûiǂoa ǁkhā. ǁNā-amaga da ge ǃaruǀîn ǂguiǂguisen tidese ǁîna gā-aise nî ǀape.” 11 ǁNā-amagab ge gao-aob tsî ǁîb ǀapemāǃnans tsîna mûǂamaoga ge ǁgaumâi, ǃgom sîsengu ǁîna gagasise nî dīhapuga ǁîn ai nî ǁgariǁnâse. Israelǁîn ge nē ǁgariǁnâs ǃnaka Faraob di sîsenūs ǃaroma ǃāra Pitoms tsî Rameses tsîra ge ǂnubi. 12 Xawe Israelǁîn ge ǁîn di ǁgâiǀāhes ǃnâ ǃaruǀî ǁîn di ǂguisib ǃnâ ǀarosen tsî Egipteb hoab ǃnâ ge ǂapaǂoa. Tsîn ge Egipteǁîna Israelǁîna ǃao tsî ge ǁkhantsoatsoa. 13-14 ǁNā-amagan ge ǁîna Israelǁîn di ûiga gere au-au, ǁîn ai ǁkhō sîsengu khobodīs diga ǁgariǁnâs ǀkha. ǁÎn ge ǁîna ǀkhom tamase omkurus tsî ǃhanagu ǃnâ sîsens ǀkha gere ǁgarisîsenū.

15 Tsîb ge Egipteb gao-aoba Hebreǁî tarade gere ǁoraǃkhō taradi di ǀgamra, Sifras tsî Puas tsîra ge mîmā: 16 “Hebreǁî tarade ro ga ǁoras ǀkha hui tsî axarob a ǃkhaisa mû, o ro ge nî ǃgam bi; tsî ǀgôaros kao, nî ûi kai.” 17 Xawe ra ge ǁoraǃkhō-aora Eloba ǃao tsî Egipteb gao-aob ge mîmā khami dī tama i tsî ǃgams ǃās ǃnâ axaroga gere ûi kai. 18 Ob ge Egipteb gao-aoba ǁoraǃkhō-aora ǂgaiǀkhī tsî ǁîra ǃoa ge mî: “Tare-i ǃaroma ro nēsa dī tsî axaroga ra ûi kai?” 19 O ra ge ǁîra Faraob ǃoa ge mî: “Hebreǁî tarekhoedi ge Egipteb tarekhoedi xa kaise ǃhaese ra ǁora tsî sim ga sī, o-i ge ǀgôaro-e ǀnai ǃnae hâ.” 20-21 ǁOraǃkhō-aora ge Eloba ǃao amagab ge ǁîra ǃgâidī tsî ǁîra ǂûra ǀgôana ge mā. Tsîn ge Israelǁîna ǃaruǀîǀgui kai ǃgôab ǃnâ ǂguiǂguisen tsî ge ǀgai. 22 Ob ge Faraoba ǁîb khoen hoana ge mîmā: “ǀAse ǃnae hâ Hebreǁî axarogu hoaga ū, î Nylǃāb ǃnâ aoǂgā, xawe hoaraga ǀgôarode ûi kai.”