Deboras tsî Baraki tsîra di ǁnaetsanas
1 ǁNā tsēs ai ra ge Deboras tsî Abinoammi ôab Baraki tsîra nē ǁnaetsanasa ge ǁnae:
2 ǃKhōǀkhā re ǃKhūba.
Israelǁîn ge ǃkhamsa go mîǁgui hâ i;
khoen ge turaxase ge māsen.
3 ǁNâu re gao-aogo,
ǃgaoǃgâ re ǂgaeǂgui-aogo.
Tita ge nî ǁnae, koaǁnaeba ta ge nî
ǃKhūb Israeli di Eloba.
4 ǃKhūtse Seirǃhomma xuts ge ǀkhīo,
Edommi di ǀkhariba xuts ge hāo,
ob ge ǃhūba ge ǂgubi,
ǀnanub ge ǀhomma xu ge ǀapi
tsî i ge ǁgam-e ǃâude xu ge ǁhōsen.
5 ǃHomgu ge ge ǂgubi
ǃKhūb Sinaib dib aiǃâ,
ǃKhūb Israeli di Elob aiǃâ.
6 Anati ôab Samgari di tsēdi ǃnâ,
Jaels di tsēdi ǃnân,
ge ǃgûkhoena ǃhūb ǃnâ-u ge ǃkharu tama hâ i
tsîn ge xōǀkhā ǁgoe daoga gere ū.
7 Israeli ǃādi ge ge ǃū-aisa, Deborase;
ǁîdi ge ge ǀkhaiǃnâ i sas ge hās kōse,
ǁgûses ge Israela hābas kōse.
8 ǁAes ge ǀasa elona a ǁhûiǂuibasen,
ob ge toroba ǃhūb ǃnâ ge hā.
Hakadisiǀoadisi aogu Israeli digu xa,
ǀguib xaweba ǁâtani-e tanib ge hâ i?
9 Tita ge Israeli ǂgaeǂgui-aogu xa ra ǂâi,
ǁnā aogu turaxase ge māsengu xa.
ǃKhōǀkhā re ǃKhūba.
10 ǃHoa re, ǁîs xa sago ǃuri dâukin ai ra ǃgapigo,
sago îxa saldi ai ra ǂnûgo,
tsî sago daogu ai ra ǃgûgo.
11 ǃGâ re! Tsaugu tawa hâ ǂgui khoen,
ǁîn ge ǃKhūb di dandi xa ra ǃhoa,
ǁîn ge Israelǁîn di dandi xa ra ǃhoa.
ǃKhūb di ǁaes ge ǃās di dao-amdi ǁga ra ǁgôa.
12 ǃKhōdana re Deborase, ǃkhōdana re.
ǃKhōdana, î ǁnaetsana-e ǁnae re, ǃkhōdana re.
Abinoammi ôats Baraktse, ǂhomisen,
î ǃkhōsaben âtsa ǂgaeǂguibē re.
13 ǂGomǂgomsa ǁaes ge ǂgaeǂgui-aogu tawa ge hā;
ǃKhūb di ǁaes ge ǁîb ǃoa ge hā,
ǃkhammi ǃoa ǂhomisen hâ aogu ge ge hā.
14 ǁÎgu ge Efraimma xu ǃgoaǃnāb ǁga ge ǁgôaxa,
Benjaminni ǃhaos di khoen khaoǃgâ.
ǂGaeǂgui-aogu ge Makirsa xu ge hā,
ǂamkhoega Sebulonna xu.
15 Isaskari di ǂgaeǂgui-aogu ge Deboras ǀkha ge hā;
Ā, Isaskari digu tsîn ge Baraki ǁga ge hā,
tsî gu ge ǁîba ǃgoaǃnāb ǁga ge saoǁgôa.
Xawe Rubenni ǃhaos ge ge ǁnâugu tama hâ i;
ǁîn ge ǀkhīn nîsa ge mîǁgui ǁoa i.
16 Tare-i ǃaromats kha gūn tawa ge hâ-oa?
ǃÛi-aogu gūna ra ǂgai ǀgausats nî ǃgâse?
Ā, Rubenni ǃhaos ge ge ǁnâugu tama hâ i;
ǁîn ge ǀkhīn nîsa ge mîǁgui ǁoa i.
17 Gadi ǃhaos ge Jordanni aiǂoas ǃnâ ge hâ,
Danni ǃhaos ge doe-omdi tawa ge hâhâ.
Aseri ǃhaos ge hurib tawa ge hâ,
ǁîn ge huribamǃgâb ai ge hâhâ.
18 Xawe Sebulonni tsî Naftalib tsîkha di khoen,
ge ûib âna ǀkhomsen tamase ǃkhammi ǃoa ge ǂoa.
19 Tanaks, Megidos ǃārob amǃgâ ǁgoes
tawa gu ge gao-aoga hā ge ǃkham;
Kanaanni di gao-aogu ge hā ge ǃkham,
xawe gu ge ǀhaiǀuri-e hōbasen tama ge i.
20 ǀGamirodi ge ǀhomma xu ge ǃkham;
ǀhomaib ai garuse di ge Siserab ǃoagu ge ǃkham.
21 Kisonǃāb ge khākhoena ge dâubē,
ǀgaisase ra dâu Kisonǃāba.
Tita ge nî ǃgû, ǁkhoaǂgaoxase ta ge nî aiǃgû.
22 On ge hāna ǀō ra ǂaidi ǀkha ge ǃkhoeǀkhī,
ǂaidi âna ǀgaisase ǃhūb ai ra dāmâise.
23 Ob ge ǃKhūb di ǀhomǃgāba ge mî:
“Merosa ǀâxare; ǁîs ǃnâ ǁan hâna ǀâxare.
ǁÎn ge ǃKhūba hā hui tama ge i,
ǁîn di toroǃkhamaogu ge ǁîba ǃkhamba tama ge i.”
24 Hoa taradi ǃgâ-ai ǃgâiǃgâxa taras ge Jaels,
Kenǁîb Heberi di tarasa.
ǁÎs ge tentdi ǃnâ ǁan hâ taradi hoadi ǃgâ-ai a ǃgâiǃgâxa.
25 Siserab ge ǁgam-e ǂgan, xawes ge dai-e ge mā bi;
îxa xapas ǃnâs ge âudai-e ge hā-ūba bi.
26 ǀGuiǀkhāb ǃommi ǃnâs ge tents ǀuriba ge ū,
nauǀkhāb ǃommi ǃnâ sîsenaob di hamersa;
Siseraba danas ai ǂnau tsîs ge danas âba ge ǂkhūǂkhū,
ǀuribas ge danas âb ǃnâ-u ge ǃkhāǃkharu.
27 ǁÎb di ǁgoara aib ge ge ǁnā,
ǁîs ǂai-am ǁnā tsîb ge ge ǃnōǁgoe.
ǁÎs ǂaira tawab ge ǁgoara âb ai ǁnā tsî ge ǁnāǁgoe;
ǁîb ge ǃhūb ai ǁnā tsî ge ǁō.
28 Siserab îs ge mûǂuidaosa-u gere ǂui;
ǁîs ge tralib ǃgâb ai mâ gere ǃauǂgai:
“Tare-i ǃaromasa kha torokunis âb di hās a ǀhabesa?
Tarexan kha hān âba oahān nîsa a ǂauba?”
29 O di ge hoadi xa gā-ai taradi âsa ge ǃeream si,
tsîs ge ǁîs ǂûsa aitsama gere mî ka mîbasen.
30 “ǁÎgu ge ǁkhâuǁnâ tsî gu nî ǀgoragu xūna ra ôabasen,
mâ toroǃkhamaob hoaba ǀgui tamas ka io ǀgam khoera,
îxa sarana Siserab ǃaroma,
anxa ǃkhaina gao-aos di ǃaob ǃaroma.”
31 ǃKhūtse an sa khākhoen hoana ǁnāti ǁō re,
xawe an satsa a ǀnamna, ǂoaxa ra sores khami ǂkhai re.
ǁNās khaoǃgâb ge ǂkhîba hakadisi kuriga ǃhūb ǃnâ ge hâ.
© Khoekhoegowab Elobmîs © Bible Society in Namibia, 2020.
