Sauli ge Amonǁîna ra dan
1 ǁNās khaoǃgâb ge Nahas ti ǀon hâ Amonǁîba toroǂnubis âb ǀkha ǃās Jabes, Gileadi ǃnâ ǂnôas ǃoagu khâi tsî ǁîsa ge xāǂgā. On ge Jabes khoen hoana Nahasi ǃoa ge mî: “Sida ǀkha ǃgaeǀhao-e dī re, o da ge sa ǃnaka nî ǃgamǃgamsen.”
2 Xaweb ge Nahasa ǁîn ǃoa ge mî: “Ti ǂgaoǀkhāsa du ga dī, o ta ge sadu ǀkha ǃgaeǀhao-e nî dī. Tita ge sadu hoadu di amǀkhāb mûde nî ǁhoroǂui, îs nēsa Israeli hoab di taosib ase ī.”
3 O gu ge Jabes di ǂgaeǂgui-aoga ǁîb ǃoa ge mî: “Hû tsēdi ǁaeba mā ge re, î ge sîsabega Israeli hoab ǃnâ sî. Hui da nî khoe-i xare-i ga ǀkhaio, o da ge satsa nî māǁnâsen.”
4 Sîsabegu ge Sauli ǃās, Gibeas tawa sī tsî nē ǃkhaisa ǁaesa ǂanǂan, os ge ǁaes hoasa ge ǃau-ā. 5 ǁNā ǁaeb ǁkhāb aib ge Saula ǃhanaba xu gomagu ǀkha ge hā, tsîb ge ge dî: “Tare-e go ī, on khoena nēti ra ā?” On ge Jabesa xu ge hā sîsabegu go mîna ge mîba bi. 6 Nēsab ge ǁnâu ob ge Elob di gagaba ǀgaisase Sauli ǃnâ ge sîsen tsîb ge kaise ge ǁaixa. 7 Ob ge ǀgam gomakha ū, ǁîkha ǃâdi ǃnâ ǁhāǃā tsî ǁîb sîsabega nē ǃâdi ǀkha Israeli hoab ǃnâ nē ǃkhâikhoms ǀkha ge sîma: “Sauli tsî Samueli tsîkha ga torob ǃoa saoǂoa tama i-i di goman ǀkha i ge nēti nî dīhe.”
Os ge Israelǁaes hoasa ge ǃao ǃKhūb nî dī ǁkhā xū-i xa tsîn ge hoatsama ǀgui khoeb khami ge ǂoaxa. 8 Sauli ge ǁîna Beseks ǃnâ ge ǃgôa, Israelǁîn xa ǃnonakaidisiǀoadisiga tsî Judab din xa ǃnonadisiǀoadisiga. 9 ǃNubain ge ǁnā sîsabegu, Jabesa xu ge hāgu ǃoa ge mî: “Nēti go ge Jabes, Gileadi dis aoga nî mîba: ‘ǁAri, sores ǀgaisase nî ǀgams aiǃâ du ge nî huiǂuihe.’ ” Nē ǂhôasa gu ge sîsabegu xa sī a mîbahe, o gu ge Jabes aoga kaise ge ǃgâiaǂgao. 10 ǁÎgu ge Nahasi ǃoa ge mî: “ǁAri da ge sado nî māǁnâsen, î du ǂgao du ra khami dī-ū da.”
11 ǁNā ǃuiab ge Saula toroǃkhamaogu âba ǃnona ǃnandi ǃnâ ge ǀgoraǂgā. Tsî gu ge ǁgoaǃaroma Amonǁîn di hâǃkhaiba ǁnāǂam tsî ǁîna tsēǃgâǁaeb kōse ge hîkākā. Ûiǃgau gen xa i ge mâ-i hoa-e ǀguri hâ ǀkhāb ai ge ǃkhoe.
12 O gu ge Israeli aoga Samueli ǃoa ge mî: “Mâpan hâ ǁnān, Sauli ge sida ǂama a gao ǁoa, ti ge mîna? ǁÎna ūhā, î ge ǁîna ǃgam.”
13 Xaweb ge Saula ge mî: “Khoe-i xare-i ge nētsē ǃgamhe tide, ǃKhūb go nētsē Israelǁaesa huiǂui amaga.” 14 Samueli ge ǁîgu ǃoa ge mî: “A ge hoage Gilgals ǃoa ǃgû, î ge Sauli gaosisa ǁkhawa ǀgaiǀgai.” 15 O gu ge hoatsama Gilgals ǁga ǃgû tsî ǁnāpa Sauli gaosisa ǃKhūb aiǃâ ge ǀgaiǀgai. Tsî gu ge ǂkhîbagusǁguibade ǃKhūb aiǃâ ge hā-ū; tsî Sauli tsî Israeli khoen hoan tsîn ge kaise gere ǃgâiaǂgao.
© Khoekhoegowab Elobmîs © Bible Society in Namibia, 2020.
