Mixab di ǁgôa-elo-īgu
1 ǀGui ǃnā-eb ge Mixa ti ǀon hâ khoeba Efraimmi di ǃnâuxa ǃhūb ǃnâ ge hâ i. 2 ǁÎb ge ǁîb îs ǃoa ge mî: “Khoe-i ge ǁnā ǀguiǀoadisi tsî kaidisi ǀhaiǀuri maride sasa xu a ǃnari, os ge ǃnari-aobas ge ǀâxaresa ge ǁnâu. Tita ge ǁnā mari-e ge ū ta tsî ta ge ǁî-e ūhâ.”
Os ge ǁîb îsa ge mî: “Ti ôatse, ab ǃKhūba ǀkhae tsi re.” 3 ǁÎb ge ǁgûsa mari-e a mā-oa, os ge ǁîsa ge mî: “ǀÂxareb ti ôab ai nî ǃkhō ǃkhaisa ǁkhaes ǃaroma ta ge ǀhaiǀuriba ǃKhūba ra khaiba. ǁÎ-e xub ge ǁgôa-elo-īb ǀhaiǀurib ǀkha ǃkhûǀkhāsaba nî dīhe. ǁNā-amaga ta ge ǀhaiǀuriba nî mā-oa tsi.” 4 ǀHaiǀuri marides ge mā-oahe, os ge ǁîsa ǀgamkaidiside ū tsî ǀhaiǀurikuru-aoba ge mā, îb ǁgôa-elo-ība kuru. Tsîb ge ǁnā ība Mixab oms ǃnâ ge mâihe.
5 Mixab ge ǁîb di ǂhunuma ǀgoreǀîǃkhaisa ge ūhâ i. ǁÎb ge elo-īgu tsî efodi tsîna dī tsî ǀgôagu âb di ǀguiba pristerse ge ǁgaumâi. 6 ǁNā ǁaeb ǃnâ i ge gao-ao-e Israeli ǃnâ ge ǀkhai i; mâ khoe-i hoa-i ge ǂgao-i ra khami gere dī.
7 ǁNā ǁaeb ǃnâb ge ǂkham Leviǁîba Judab di ǃās Betlehems ǃnâ ǃhaokhoese ge ǁan hâ i. 8 ǁÎb ge ǀkhara ǁanǃkhai-eb sī nî ôabasenga, Betlehemsa xu ge ǃgû. ǁNātib garu ra ǃgû hîab ge Efraimmi ǃnâuxa ǃhūb ǃnâ Mixab oms tawa ge sī. 9 Mixab ge ǁîba “Mâpa xuts ra hā?” ti ge dî.
Ob ge ǁîba ge ǃeream: “Tita ge Leviǁîta Betlehems, Judab disa xu ra hā ta. Tsî ta ge ǁan ta nî ǃkhai-e ra ôa.”
10 Ob ge Mixaba ge mî: “Tita ǀkha hâ, î ti ǀapemā-ao tsî pristerse i re, o ta ge kurikorobe disi ǀhaiǀuri maride nî mā tsi, tsî saran tsî ǂûn tsîna.” 11 Nē ǂkham Leviǁîb ge Mixab ǀkhab nî hâsa ge mîǀgui tsîb ge ǁîba ǀgôab ase ge iba. 12 Mixab ge ǁîba pristerse ge ǁgaumâi tsîb ge Mixab oms ǃnâ ge ǁan. 13 Ob ge Mixaba ge mî: “Leviǁîba ta nēsi pristerse ūhâ, xui-ao ta ge a ǂan, ǃKhūb nî ǃgâiǃgâxa kai tesa.”
© Khoekhoegowab Elobmîs © Bible Society in Namibia, 2020.
