Tarade Benjaminni di ǃhaos ǃaroma
1 Israelǁîn ge Mispas tawan ge ǀhao-o, ǃKhūba ge nūba: “ǀGui-i sida di-i tsîn ge sida ǀgôade Benjaminǁîgu ǀkha ǃgame kai tide.” 2 Israelǁîn ge Betels tawa sī tsî ǁnāpa Elob di ais aiǃâ sī ge ǂnû, tsî ǃgarise tsî tsûsase ge ā: 3 “ǃKhū, Israeli di Elotse, tare-i ǃaromas kha nē ǃkhaisa ī? Tare-i ǃaromas kha Benjaminni di ǃhaosa Israela xu go ǀari ǁga?”
4 Sao ra tsēs ain ge Israelǁîna ǃnauǁgoaga khâimâ tsî ǁnāpa altarsa ǂnubi tsî ǂkhîbagusǁguibadi tsî khauǁguibadi tsîna ge ǁguiba. 5 ǁÎn ge ge dî: “Tari-e Israeli ǃhaodi hoade xu Mispas tawa ge ǃKhūb di ais aiǃâ hâ i ǀhaos ǁga ge ǃgû tama hâ i?” (ǁNāpan ge nūs ǀkha ge mîmâi, Mispas ǁga ge ǃgû tama hâ i khoe-i hoa-i nî ǃgamhesa.) 6 Israelǁîn ge ǁîn di ǃgâsan, Benjaminǁîna ǀkhom tsî ge mî: “Nētsēb ge Israela ǀgui ǃhaosa go ǂoaǃnâ. 7 Mâti dī tsî da Benjaminǁîgu hîa ge ǃgauga tarade nî hōba? Sada ge ǃKhūba ge nūba ǁîga da sada ǀgôade mā tidesa.”
8 Tari-i ge Israeli ǃhaodi hoade xu Mispas tawa ge hâ i ǀhaos ǁga ǃgû tama hâ i ǃkhaisan ge dî, on ge ge ǂanǂui Jabes, Gileadi disa xu i ge ǀgui khoe-i tsîna ǁnāpa sī tama hâ isa. 9 ǁAes ge ǃgôakhâihe, o i ge ǀgui khoe-i Jabes, Gileadi dis di-i tsîna ǁnāpa ge ǀkhai i. 10 Ob ge ǀhaohâba disiǀgamǀaǀoadisi ǁkhoaǂgaoxa toroǃkhamaoga ge sî nēti mîmā tsî: “ǃGû, î go Jabes di khoen hoana sī ǃgam, ǁkhāti taradi tsî ǀgôan tsîn hoana. 11 Aoregu hoagu tsî oaxae tama khoedi hoadi tsîna ǃgam.” 12 Jabes di khoen ǃnâ gu ge ǁîga hakakaidisi oaxaede ge hō, tsî gu ge ǁîde Silos, Kanaanǃhūb ǃnâ hâs di hâǃkhaib tawa ge sī-ū.
13 Ob ge hoaraga ǀhaohâba Benjaminǁîgu Rimonǃgareǀuib tawa hâga ge haisiba, în ǁîgu ǀkha ǂkhîba dī. 14 Benjaminǁîgu ge ǃhaese ge oaǀkhī, tsîn ge Israelǁîna ǃgam taman ge i khoedi Jabes dide ǁîga ge mā, xawe di ge ǁîgu ǃaroma ge ǂâu tama hâ i.
15 ǁAes ge Benjaminǁîna gere ǀkhom, ǃKhūb ge Israeli ǃhaode xu ǀguisa ǀgora xui-ao. 16 O gu ge ǀhaohâb di ǂgaeǂgui-aoga ge mî: “Benjaminni ǃhaos ǃnâ i ge tarekhoe-i xare-e a ǀkhai. Mâti dī tsî da ǃgau go Benjaminǁîgu tsîna tarade nî hōba? 17 Israeli ge ǀguis, ǁîb di disiǀgamǀa ǃhaodi disa a ǂoaǃnâ ǁoa. Benjaminni ǃhaos nî aiǃgû ǃkhaisa da ge nî kōǃgâ, 18 xawe da ge ǁîga sada ǀgôadi ǀkha a ǃgame kai ǁoa, nū da ge xui-ao, sada ǃnâ ga ǁî-i ôasa Benjaminǁîba tarase mā khoe-i hoa-i nî ǀâxarexūhesa.”
19 O gu ge ge ǂâi: “ǃKhūb di kaitsēs, kurikorobe Silos tawa ra tsēdīhes ge a ǀgū.” (Silos ge Betels ǀapasǀkhāb ai, Libanonni ǃkhawagas ǃnâ, Betels tsî Sexems tsîra ǁaegu ǁgoe daob di aiǂoasǀkhāb ǃnâ ǂnôa.) 20 ǁÎgu ge Benjaminǁîga ǃoa ge mî: “ǃGû, î go draibeǃhanagu ǃnâ sī gau 21 tsî ǃkhē, î go Silos di ǂkham ǀgôadi ga ǁâudīb ǁaeb ai ǂnāǃgûǂoaxao, draibeǃhanaga xu ǃkhoeǂoaxa. Ab mâb sago dib hoaba ǀguisa ǁîdi xa ǃkhō tsî Benjaminni di ǀkharib ǁga ūsao. 22 ǁÎdi îgu kas, ǃgâsagu kas hoas ga sago hā ǀhapimā, o ge ge sago nî mî: ‘Sige ge ǂâu hâ go tarade ǁîga torob ǃnâ ge ūba tama hâ i; sago ge ǀhapio, sago ǁîde ǁîga mā tama xui-ao.’ ”
23 O gu ge Benjaminǁîga ǁnāti ge dī. Mâb hoab ge Silos tawa gere ǂnā khoedi xa tarasa ūbasen tsî ǁîgu di ǀkharib ǂûb ǁga ge oa. Tsî gu ge ǁîn di ǃāde ǂnubikhâi tsî ǁîdi ǃnâ ge ǁan. 24 ǁNā ǁaeb ǁkhāb ain ge nau Israelǁîna ge oa, mâ-i hoa-e ǁî-i ǃhaos tsî ǀaokhoen tsî ǁî-i di xūn ǁga.
25 ǁNā ǁaeb ǃnâ i ge gao-ao-e Israeli ǃnâ ge ǀkhai i. Mâ khoe-i hoa-i ge ǂgao-i ra khami gere dī.
© Khoekhoegowab Elobmîs © Bible Society in Namibia, 2020.
