1 Khoen ge ra ǃeream:
“Tari-e sida ge ǁnâuna a ǂgom ǁkhā?
Tsî ǃKhūb ǁôaba tari-eb ge ǂhaiǂhaibahe?
2 Elob aiǃâs ge ǁîb ge ǂgonaro-i khami ǀomkhâisa
tsî ǃnoma-i khami ǂnâsa ǃhūba xu ǂoaxasa.
ǁÎb ge ī-i tamas ka io ǂkhaisi-i hîa da nî kōǀî-e ūhâ tama,
ī-i hîa da nî ǁkhore-eb ge ūhâ tama hâ.
3 ǁÎb ge naun xa ǁgaiǁgaihe tsî ge ǂharahe;
khoeb tsâb tsî ǀaesenni tsî ǃâitsâb diba.
ǁNāb khoen ǁîn aide ǁîba xu gaugaus ǀkha gere ǁgaiǁgaiba
da ge xū-e harebe tamab ase gere ǃgapaǀî.
4 “Amase ǁîb ge sada ǀaesenga ǁîb ai tani
tsî sada tsâga ǁîb ai ge ū,
xawe da ge ǁkharaheb hâse ǁîba gere ǃgapaǀî,
Elob xa ǂnauǁguihe tsî tsûtsûhe hâb ase.
5 Xawe ǁîb ge sada ǁoren ǃaroma ge tsuihe,
ǁîb ge sada tsūdīn ǃaroma ge ǂnauhe.
ǁÎb di ǁkharab ge sada ge ǂgauǂgau
tsî ǁîb ǂnauǀhapidi ge ge ǂuruǂuru da.
6 Sada hoada ge gūn khami ge kāǁhapu,
sada ǂhunuma daogu ǃoa da ge ge dabasen
tsîb ge ǃKhūba ǁîb ǂûb ai sada dīsade ge tani.
7 “ǁÎb ge ǁgâiǀāhe tsî ge tsâ kaihe,
xaweb ge ams âba ǁkhowa-am tama ge i.
ǂĀǃkhaib ǁga garu-ūhe ǁkhao-i khami
tsî gū-i ǁî-i ǂkhomaogu aiǃâ ǃnōsase ǁgoe i,
khamib ge ams âba ǁkhowa-am tama ge i.
8 ǁÎb ge ǁgâiǀāb tsî ǀgoraǃgâs tsîra ǃnâ-u ge ūbēhe.
Tari-e ǁîb ǃgoaxaǁaeb xa ga ǂâiǃgâ hâ?
ǁÎb ge ûitsaman ǃhūba xu ge ǁaraǁnâhe,
ti khoen ǁoren ǃaromab ge ǂnauhe amaga.
9 ǁÎb ǀhobasan ge ǂkhabadī-aon ǀkha ǀguipa ge dī
tsî ǁîb ǀhobasa ǃkhū hân ǀkha;
ǂkhaba-i xare-eb dī tama hîa
tsî ǁîb ams ǃnâ i ge ǀhôagaosi-i xare-e ge ǀkhai i.”
10 “Xawe ǃKhūb ǂâi ge is ge tsûb ǀkha tsâ kai bisa,
ǁîb ge ǁîba kaise ge ǃoa kai;
ǁîb ûiba du ga ǁoreǁguibas ase dī,
ob ge ǁîb suriba nî mû
tsî tsēdi âba nî gaxugaxu.
ǁÎb ǃnâ-us ge
ǃKhūb ǂâis nî aiǃgûsa.
11 ǃAob âba xus ge ǃnâbab nî mûsa,
ǂans âba xus ge ǃnāǂamsasibab nî hōsa.
ǂHanu-aib, ti ǃoaba-aob ge ǂguina nî ǂhanu-ai kai
tsîb ge ǁîn dīsāde nî tani.
12 ǁNā-amaga ta ge kain ǀkha ǃhūǃâ-e nî mā bi
tsîb ge ǀgaisan ǀkha ǁkhâuǁnâxūna nî ǀgoragu;
ǁōb kōseb ge ǁî-aitsama a ǁhōǂuisen
tsî tsūdī-aon ǀkha ǃgôaǀhaohe hâ i xui-ao.
Xaweb ge ǂguin di ǁorena ge tani
tsî tsūdī-aona ge mâǂgâba.”
© Khoekhoegowab Elobmîs © Bible Society in Namibia, 2020.
