1 ǃGâsado, ti ǂgaob hoab di ǁkhoreb ǀkha ta ge ti khoen, Jodeǁîn nî ǃgâiǃō kaihesa Elob ǃoa ra ǀgore! 2 ǀHûǀgui ta ge ra ǁîn Eloba ūba hâ ǀaexasiba, xawe ǂans ǃoas ose. 3 ǁÎn ge Elob xa ǁîb xa ǂhanu-ai kaihes ǀkha ǁaeǁaesen tama i tsî ǁî-aitsama ǂhanu-ai kaisensa gere ôa-am tsî ǁnā-amaga Elob di ǂhanu-aisib ǃnâ māǁnâsen tama ge i. 4 Xristub* ge ǂhanuba ge ǀamǀam, ǂgom ra-i hoa-i nî Elob ǀkha ǂhanu-ai kaihese.
ǃGâiǃōsib ge hoan ǃaroma hâ
5 Moseb ra ǂHanub di ǂhanu-aisib xa “Khoe-i nē mîmādi ǂhanub dide ra ǁnâuǀnam-i ge nî ûi” ti xoa xui-ao. 6 Xaweb ge ǂgoms di ǂhanu-aisiba nēti ra mî: “Tā sa ǂgaob ǃnâ tari-e nî ǀhommi ǃoa ǃapa?” ti dîsen. (ǁNās ge Xristuba ūǁgôaxasa.) 7 “Tamas ka io tari-e ǃgam āb ǃoa nî ǁgôa?” ti nî dî. (ǁNās ge Xristuba ǁō hâna xu oaǀkhī-ūsa.) 8 Xawe Xoasa mâti ra mî? “Elob di ǂhôas ge sa ǀgūse hâ, sa nams ai tsî sa ǂgaob ǃnâ.” ǁNās ge ǂgoms di ǂhôas sige ra aoǁnâsa. 9 Jesub a ǃKhū ǃkhaisats ga nams ǀkha ǁguiǁnâ tsî Elob xab ge ǁōba xu ǂkhaiǂkhaihe ǃkhaisa ǂgaob ǃnâ ǂgom, ots ge nî ǃgâiǃō kaihe. 10 Khoe-i ge ǂgaoba xu ǂgoms ǃnâ-u Elob ǀkha ǂhanu-ai kaihe tsî nams ǀkha ǁguiǁnâs ǃnâ ra ǃgâiǃō kaihe. 11 Xoas ra mî xui-ao: “ǁÎb ǃnâ kara ǂgom-i hoa-i ge taotaohe tide.” 12 ǀGora-i ge Jodeǁîn tsî Grikeǁîn ǁaegu a ǀkhai. Elob ge a hoan di ǃKhū tsî ǁîba ra ǂgaiǀîna ǃkhū hâse ra ǀkhae. 13 Xoas ra mî khami: “ǃKhūb di ǀonsa ra ǂgaiǀî-i hoa-i ge nî ǃgâiǃō kaihe.”
14 Xawe, mâtin ǁnâi ǁnāb ǁîb ǃnân ǂgom tamaba nî ǂgaiǀî? ǁÎb xan ga ǁnâu tama io mâtin ǁîb ǃnâ nî ǂgom? Tsî aoǁnâhe tamab ga io, mâtin ǁîb xa nî ǁnâu? 15 Tsî sîhe tamats ka io, mâtits ǁîb xa nî aoǁnâ? Xoas ra mî khami: “Mâtikōse di a ǀnamǀnamsa ǃGâiǂhôasa ra aoǁnâgu di ǂaide!” 16 Xawe hoan ge ǃGâiǂhôasa ǃkhōǃoa tama ge i. Jesajab ra mî xui-ao: “ǃKhūtse, tari-e sige di ǂhôasa ge ǂgom?” 17 ǂGoms ge ǂhôasa ǁnâusa xu hâ tsîs ge ǂhôasa Xristuba aoǁnâs ǃnâ-u ra ǁnâuhe.
18 Xawe ta ra dî: Ama i a ǁnâu taman hâ ǃkhaisa? Amase ge ǁnâu. Xoas ra mî xui-ao:
“ǁÎn di domgu di ǀōb ge ǃhūgu hoagu ǃoa ge ǂoa
tsî ǃhūbaib di ǀamdi kōse di ge ǁîn di mîde ge sī.”
19 Xawe, ǁkhawa ta ra dî, Israelǁîna ǁnâuǃā taman ge hâ i? ǂGurob ge Moseba ra mî:
“Tita ge sado ǁae taman ai nî tauxa kai,
ǁnâuǃāoǃnâ ǁaes ǀkha ta ge nî ǁaiǁai du.”
20 Xawe Jesajab ge ǁkhoaǂgaoxase ra mî:
“Tita ôa taman xa ta ge ge hōhe
tsî tita dî taman ai ta ge ge ǂhaiǂhaisen.”
21 Xaweb ge Israelǁîn ǃoa ra mî: “Mâ tsēs hoasa ta ge ti ǃomkha ge ǀhōǂui, ǁnâuǀnamoǃnâ tsî mâǃoaxa ǁaes ǃoa.”
© Khoekhoegowab Elobmîs © Bible Society in Namibia, 2020.
