Elob tsî ǁîb di ǁhûiǂuisa ǁaes
1 Xristub* ǃnâ ta ra amaba ǃhoa, ǂhumi tama ta hâ. ǃAnu Gagab ge ti ǃnâ hâ ǂgaoǂans ǀkha ra ǀhûǃkhō-am, 2 kai ǃoab tsî toa tama tsûaǂgaob tita ǀkha hâsa. 3 Tita ǂûta ǀâxarexūhe tsî ta ga Xristuba xu ti ǀaokhoen di ǃgâib ǃaroma ǀgorahesa gere ǁkhore xui-ao. 4 ǁÎn ge Israelǁîna, ǁîb ge ǁîna ǁîb ôase ǃkhōǃoa tsî ǁîb ǂkhaisiba ǂhaiǂhaiba, ǃgaeǀhaode ǁîn ǀkha dī tsî Moseb ǂhanuba* ǁîna mā, ǁîn ge ama ǀgoreǀîsa ūhâ, Elob mîmâiden ge ǃkhōǃoa, 5 kai aboxagu di suriba xun ge hā, tsîb ge Xristuba khoeb ase ǁîna xu ge ǃnae. Ab ǁîb, hoan ǂama a Eloba, ǀamose karehe! Amen.*
6 Elob ge ǁîb di mîmâis ǃnâ ǃgâiǃgâ tama i ti ī ǃkhais ose, hoa khoen Israela xu ra hān ama Israelǁî tama xui-ao. 7 Tsîn ge ǁkhāti Abrahammi suriba xu hân hoana Elob ôa tama hâ. Elob ge Abrahammi ǃoa “Isaki ǃnâ-ub ge sa suriba nî ǂgaihe” ti mî xui-ao. 8 ǁNās ge ǀgôan ǁnaetisa ǀgaub ai ra ǃnaen Elob di ôa tama; xawe Elob mîmâis ǃnâ-u ra ǃnaen ama surib Abrahammi dib ase ra ǃgôahe ti ra ǂâibasen. 9 Mîmâis Elob dis ge nēti ge hâ i: “Nē ǁaeb ǁkhāb ai ta ge ǁkhawa nî hā, os ge Sarasa ǀgôaba nî ūhâ.”
10 Tsî nēs ǀgui tamas. Rebekas ôakha, ǀgui ǁgûb, sada îb Isaki dikha, 11-12 noxopa ǃnae tsî ǃgâi-i tamas ka io ǂkhaba-i xare-e dī tama hîas ge ǁîsa ǀnai Elob xa “Kaib ge ǂkhamma nî ǃoaba” ti ge mîbahe. Elob di ǁhûis ge ǁîn di sîsengu ais ose ǁîb ǂgais ai ge ǃgaoǃgaosa i. 13 Xoamâihe hâ khami: “Jakoba ta ge a ǀnam xawe ta ge Esauba ǁkhan hâ.”
14 O da kha ǁnâi Elob a ǂhanuoǃnâ ti nî mî? Tātsē! 15 ǁÎb kom Moseb ǃoa ge mîo: “ǀKhomxa ta nî ǀkhomxaǂgao ta hâ-i hoa-e tsî tsâbaǁhao ta nî tsâbaǁhao ǂgao ta hâ-i hoa-e.” 16 ǁNā-amaga i ge khoe-i di ǂâis tamas ka io ǀhupuba xu hâ tama hâ, xawe Elob di ǀkhomxasiba xu. 17 Xoas ra Faraob ǃoa mî xui-ao: “Nēs ǃaroma ta ge sa ǃnâ ta nî ǀgaiba ǁgauga ra ǂkhaiǂkhai tsi, îs ti ǀonsa hoaraga ǃhūbaib ǃnâ aoǁnâhe.” 18 ǁNā-amagab ge Eloba ǂgaob ra khami, khoe-e ǀkhomxaǂgao tamas ka io a ǃnâudanaxa kai ǁkhā.
ǃKhūb di ǁaib tsî ǀkhomxaǂgaosib
19 Xawe i ge khoe-e nî mî: “Tare-i ǃaromab ganupe ra ǀau da? Tari-e kha Elob di ǂâis ǃoagu a mâ ǁkhā?” 20 Khoetse, taritsa sats Eloba ra ǃhoaǃoatsa? “Mâti i kuruhe hâ xū-e kuru-ao-i ǃoa nî mî: ‘Tare-i ǃaromats ge nēti kuru te?’ ” 21 Sūǂnubi-aoba kha ǂâib ra khami ǂgoab ǀkha a dī ǁoa tsî ǀgam xapara ǁkhā ǂgoaba xu kurusa, ǀguisa ǀō-aisa ǁāxasigu ǃaroma tsî nausa hoaǁae sîsenūs ǃaroma.
22 ǁNās ǁkhāsab kha Eloba dī tama hâ? ǁÎb di ǁaib tsî ǀgaibab gere ǁgauǂui ǂgao, xaweb ge kai ǃnūǃnâxasib ǀkha ǁîb di ǁaib di xūn hîkākās ǃaroma ge ǂhomihe hâ ina ge ǃkhō-oa. 23 Nēsab ge ǁîb ǂkhaisib di ǃkhūsibab nî ǂan kaise ge dī, ǁîb ǀkhomxasib di xūn ǀnai ge ǂkhaisib ǃaroma ǂhomihe hâ in ǃoa. 24 ǁÎna xu da ge sada tsîna ǂgaihe hâ, Jodeǁîn ǀguina xus ose xawe Jodeǁî taman tsîna xu. 25 Hoseab ǂkhanis ǃnâb ra ǁkhāti mî khami:
“ǁNās ti ǁae tama ge isa
ta ge ‘ti ǁae’ ti nî ǂgai,
tsî ǀnamhe tama ge hâ isa
ta ge ‘ti ǀnamsabe’ ti nî ǂgai.
26 Tsî ǁnā ǃkhaib
‘Ti ǁae tama du’ tin ra mîǀîheb,
tawan ge ‘ûitsama Elob ôan’ ti nî ǂgaihe.”
27 Tsî Jesajab ge Israeli ǂama ra ǂgaiǂui. “Tsî Israeli ôan ga hurib ammi di ǃhūb khami ī, xawen ge ǀoron ǁîn din ǀguina nî sâuhe. 28 ǃKhūb nî ǁîb di ǀgoraǃgâsa ǂanǂansase tsî ǃhaese dītoa ǃhūbaib ai amaga.” 29 Tsî Jesajab ra ǀnai mî khami: “ǃKhūb Hoaǀgaixab ga sada suri-e ǃgauba tama i hâo, o da ga Sodoms tsî Gomoras ǀkha ǀguiti-ī hâ.”
ǃGâiǂhôas Israelǁîn tsîn ǃaroma
30 Tare-e da ǁnâi nēs xa nî mî? Jodeǁî taman hîa Elob ǀkha ǂhanu-ai kaisen taman ge ǂgoms ǃnâ-u ǁîb ǀkha ge ǂhanu-ai kaihe. 31 Xawe Israelǁîn, ǂhanub ǃnâ-u Elob ǀkha ǂhanu-ai kaisensa gere ôan ge ǁnāsa hō tama ge i. 32 Tare-i ǃaroma? ǁÎn ge ǂgoms ǃnâ-us ose xawe ǁîn di sîsengu ǀkha gere ǂhanu-ai kaisen amaga. ǁÎn ge ǃnôa-aiǀuis ai ge ǃnôa, 33 xoahe hâ khami:
“Mû, Sions ǃnâ ta ge ǀuib khoena nî ǃnôa kaib
tsî ǃhaob ǁîna nî ǁnā kaiba ra ǁgui
tsî ǁîb ǃnâ ra ǂgom-i hoa-i ge taotaohe tide-e.”
© Khoekhoegowab Elobmîs © Bible Society in Namibia, 2020.
