1 Jojakimmi ǂgaeǂguis ǁaeb ǃnâb ge Babilons gao-aob Nebukadnesara Judaba ge ǁnāǂam, tsîb ge Jojakimma ǃnona kurigu ǀgaiba ǁîb xa ge gaoǂamhe, xawe ǁnās khaoǃgâ ǁîba ge mâǃoa. 2 ǃKhūb ge ǁâtanisen hâ ǂnubis Babiloniaǁîgu, Siriaǁîgu, Moabǁîgu tsî Amonǁîgu tsîgu disa Judaba gu sī nî hîkākāse Jojakimmi ǃoagu ge sî, ǀnaib ge dīb nî ti ǁîb ǃgāgu, kēbo-aogu ǃnâ-u mî hâ i khami. 3 Nēs ge ǃKhūb di mîmās ai ge ī, Judab khoenab ǁîb aisa xu nî dībēse, gao-aob Manaseb ge dī ǁoren ǃaroma, 4 tsî ǁkhāti ǀhapio khoen hîab ge ǃgamn ǃaroma. ǃKhūb ge Manaseba nē dīgu ǃaroma ge ǀûba ǂgao tama hâ i.
5 Jojakimmi ge dī xūn hoan ge ǃNaeǃkhaidi ǂKhanis Judab Gao-aogu dis ǃnâ a xoamâisa. 6 Jojakimmi ge ge ǁō tsîb ge ǁîb ôab Jojaxinna ǁîba gao-aose ge saoǃgon.
7 Egipteb gao-aob ge ǁîb toroǂnubis ǀkha ǁkhawa Egipteba xu ǃgûǂoa tama ge i, Babilons gao-aob ge hoaraga ǀkharib Egipteb di ge ib hoaba, Eufratǃāba xu ǀapasǀkhāb ǃhūǀgoras Egipteb dis kōse gaoǂam hâ i xui-ao.
Judab di gao-aob Jojaxinni
(2 Kroniks 36:9-10)8 Disiǁkhaisaǀa kurixab a hîab ge Jojaxinna ge Judab di gao-ao kai tsîb ge ǃnona ǁkhâga Jerusalems ǃnâ ge ǂgaeǂgui. ǁÎb îs ge Nehustas, Elnatanni Jerusalems dib di ôasa. 9 Jojaxinni ge ǁîb îb aiǁgausa sao tsî ǃKhūb ǃoagu ge ǁore.
10 ǁÎb ǂgaeǂguis ǁaeb ǃnâs ge Babilons gao-aob Nebukadnesari toroǂnubis ge Jerusalems ǃoagu ǃkham tsî ǁîsa ǃnamiǂgāsa. 11 Nē ǃnamiǂgās ǁaeb ǃnâb ge Nebukadnesari ǂûba Jerusalems ǁga ge hā. 12 Gao-aob Jojaxinni ge ǁîb îs, ǁîb ôagu, ǁîb ǂamkhoegu tsî gao-ommi ǂamkhoegu tsîn hoan ǀkha Babilons gao-aoba ge māǁnâsen. ǁKhaisaǁî kurib Nebukadnesari ǂgaeǂguis dib ǃnâs ge ǁîb ge Jojaxinna ǃkhōsis ǃnâ ū, 13 tsî hoaraga ǁuib Tempeli tsî gao-ommi ǃnâ ge hâ iba Babiloniab ǁga a ǃgû-ūsa. ǀNaib ge ǃKhūba mî hâ i khamib ge Nebukadnesara hoaraga ǃhuniǀuri xapan, gao-aob Salomob ge Tempeli ǃnân nî sîsenūhese kuru hâ ina ge khôaǂkhū. 14 Nebukadnesari ge Jerusalems khoen, hoaraga gaoǀgôagu tsî ǂamkhoegu tsîn, ǀhaob ai disiǀoadisina ǃkhōsabese ge ǃgû-ū. ǁÎb ge ǁkhāti ǃomsîsenni ǂansa ūhâ khoegu tsî ǀurikuru-aogu tsîna ūsao tsî hoan xa ǀgâsan ǀguina Judab ǃnâ ge ǁnāxū.
15 Nebukadnesari ge Jojaxinna ǃkhōsabese Babiloniab ǃoa ge ǃgû-ū, tsî ǁkhāti Jojaxinni îs, ǁîb taradi, ǁîb ǂamkhoegu tsî ǃgôahesa khoegu ǃhūb digu tsîna. 16 Nebukadnesari ge hoaraga ǁkhoaǂgaoxa khoegu, ǀhaob ai ge hûǀoadisi igu tsî ǀguiǀoadisi khoegu ǃomsîsenni ǂansa ūhâgu, ǀurikuru-aogu tsîna ǃkhōǂgā hâgu tsîna Babilons ǁga ge ǃgû-ū; nēgu hoagu ge torob ǃnâ ǃkham ǁkhā khoe ge iga.
17 Nebukadnesari ge Jojaxinni ǁnaosab Mataniaba Judab gao-aose dī tsî ǁîb ǀonsa Sedekia ti ge ǀkharaǀkhara.
Judab di gao-aob Sedekiab
(2 Kroniks 36:11-12Jeremia 52:1-3a)18 ǀGamdisiǀguiǀa kurixab a hîab ge Sedekiaba ge Judab di gao-ao kai, tsî disiǀguiǀa kuriga Jerusalems ǃnâ gere ǂgaeǂgui. ǁÎb îs ge Hamutals, Jeremiab, ǃās Libnas dib di ôasa. 19 Gao-aob Sedekiab ge gao-aob Jojakimmi ǁkhāb khami ǃKhūb ǃoagu ge ǁore. 20 ǃKhūb ge Jerusalems tsî Judab tsîra khoen ǀkha ǁaixa tsî ǁîna ais âba xu ge dībē.
© Khoekhoegowab Elobmîs © Bible Society in Namibia, 2020.
