2 Gao-aogu 19 - Khoekhoegowab New Translation 2020 (KKG20)

Hiskiab ge kēbo-aob Jesajab tawa ra ǀape-ôa

1 Nē ǂhôasab ge ǁnâu, ob ge gao-aob Hiskiaba ǃoab ǃnâ saran âba ǀkhau, ǃoab sarana ana tsî ǃKhūb di Tempela ǃoa ge ǃgû. 2 Tsîb ge ǁîba gao-ommi mûǂamaob Eliakimmi, gao-aob di xoa-aob Sebnab tsî danapristergu tsîna Amob ôab kēbo-aob Jesajab ǁga ge sî. ǁÎgu hoagu ge ǃoab sarana ge ana hâ i. 3 Jesajabab ge ǁîgu ǀkha nēti ge haisiba: “Nēs ge ǂōǂōsib di tsēsa; sida ge ǁkharahe tsî ra taotaohe. Sida ge ǁora nîse ī taras xawe ǁoras di ǀgai-e ūhâ tamas ǁkhās khami ī. 4 Siriab gao-aob ge ǁîb ǂamkhoeba ûitsama Elobab nî ǃkhāǃkhāga go sî. Ab ǃKhūb sa Eloba nē ǃkhāǃkhāmîde ǁnâu tsî ǁnāb ǁîde ra mîba ǁkhara. Sida hîa noxopa ǃgau hâda Elob ai ǂganba re.”

5 Jesajab ge gao-aob Hiskiab haisisab ge ǁnâuo, 6 nēti ge ǃeream: “ǃKhūb ge ra mî, tā du ǁîb a huiǂui du ǁoa, tin Siriaǁîna ra mî ǃkhais xa ǃaoǃaohe. 7 ǃKhūb ge nî dī, îb gao-aoba ǁîb di ǃhūb ǂûb ǁga ǁîba nî oa kai gom-e ǁnâu, tsîb ge ǃKhūba nî dī ǁnāpab nî ǃgamhesa.”

Asiriaǁîn ge ǁkhawa Jerusalemsa ra ǁnāǂam

(Jesaja 37:8-20)

8 Siriab di ǂamkhoeb ge gao-aob Lakisa xu ǃgû tsî Libnas ǃoagu sī ra ǃkham ǃkhaisab ge ǁnâuo, ǁîbab nî dîse ǁnāpa ge sī. 9 ǁNāpab ge Asiriab gao-aoba Egipteb di toroǂnubis, Etiopiab gao-aob Tirhakab xa ǂgaeǂguihe hâs, ǁîbas nî ǁnāǂamse ra hā ǃkhaisa ge ǁnâu. Ob ge ǁîba nēsab ge ǁnâuo, sîǂkhanisa Judab gao-aob Hiskiaba ge sîba 10 nēti ra mîsa: “Sa Elob ǁîb aits ǂgomaiǂnûi hâba ab tā ǂgaeǂhapu tsi, Jerusalems tita xa danhe tide ti mîba tsis ǀkha. 11 Tare-eb Siriab gao-aoba hîkākā ǂgaob ra ǃhūb hoab ǀkha ra dī ǃkhaisats ge ge ǁnâu. Satsa kha ûiǂoats nî ti ra ǂâi? 12 Ti aboxagu ge Gosans, Harans tsî Resefs tsîde hîkākā tsî Edens khoen Telasars ǃnâ ge ǁan hâ ina ge ǃgam, xaweb ge ǀguib ǁîn elogu dib xaweba ǁîna ge huiǂui ǁoa i. 13 Mâpa gu hâ Hamats, Arpads, Sefarvaims, Henas tsî Iwas tsîdi gao-aoga?”

14 Gao-aob Hiskiab ge sîǂkhanisa sîsabega xu ū tsî ge khomai. ǁNās khaoǃgâb ge Tempeli ǁga ǃgû tsî sîǂkhanisa ǃKhūb aiǃâ khoraǁgui 15 tsî ge ǀgore: “ǃKhū Israeli di Elots, trons âts xerugu ǂamai hâtse, sats ǀguits ge ǃhūbaib di gaosigu hoagu ǂama a Elo. Sats ge ǀhommi tsî ǃhūbaib tsîkha ge kuru. 16 Kō re, nēsi ǃKhūtse tare-i sida ǀkha ra īsa. ǃGâ re, taren hoanab Sanheriba ra ǃhoasa tsîb sats ûitsama Elotsa ra mîǁgaiǁgaisa. 17 ǃKhūtse, hoada ge a ǂan Siriab gao-aogu ge ǃhaodi tsî ǃhūgu tsîna hîkākā 18 tsî ǁîn di eloga ǂhubiǂuisa; ǁîn di elogu elo tama tsî khoen xa hain tsî ǀuina xu kuruhe hâ īs ǀguisa i xui-ao. 19 ǃKhū sida Elotse, nēsi ǁnâi Asiriaǁîna xu huiǂui da re, îdi ǃhūbaib di ǃhaodi hoade sats ǃKhūts ǀguits a Elo ǃkhaisa ǂan.”

Jesajab di haisi-ams gao-aob ǃoa

(Jesaja 37:21-38)

20 Jesajab ge gao-aob Hiskiaba ge haisiba ǁîb di ǀgores aib 21 ǃKhūba nēti ra mîsa: “Sanheritse, Jerusalems ge âiǂui tsi tsî ra ǃharaxū tsi. 22 Tari-ets mîǁgaiǁgai tsî goro ǃkhāǃkhā tits ra ǂâi? Sats ge tita Israeli di ǃanu Elota go ǃgôaǁnâ. 23 Sats ge sa sîsabega sa torokunidi ǀkhats ge Libanonni ǀgapi ǃhomga īǂam ǃkhais ǀkha gu tita nî ǂamase ge sî. Sats ge ǁnāpats ge ǀgapi sederhaidi tsî îxa denehaidi tsîna ǁhāǁnâ, tsîts ge ǃgamse haiǀgoms kōse ǂgâ ǃkhais ǀkha gere koasen. 24 Sats ge ǃhao ǃhūgu ǃnâts ge tsauga khao tsî ǁgam-e ā, tsî gu ge sa toroǃkhamaoga Nylǃāba dāǂnâǂnâ ǃkhais ǀkha gere koasen.

25 “ǁNâu tamats ge hâ i ǁî ǃkhaisa ta ge ǀnai ǀapeǁgui hâ isa? Tsî nēsi ta ge ǁîsa ra dīǀoaǀoa. Tita ge ǀgaiba ra mā tsi omǂnamisa ǃādets nî hîkākāse. 26 ǁÎdi ǃnâ ge ǁan hâ i khoen ge ǃhuri tsî ge burugâ hâ i; ǁîn ge ǃaub ai hâ ǀgân tamas ka io oms ǂamǃnâ mâ ǁîǁhaiben, ǀgamsa ǂoab aiǂoas dib xan ra ǃgomhe, o ra ī khami ge ī i.

27 “Xawe ta ge nēsi mâ xū-i hoa-e sats xa a ǂan, tare-ets ra dīs tsî mâǀîts ra īsa. Mâtits ti ǃoagu ra ǃkhauǃkhausensa ta ge a ǂan. 28 Sa ǃkhauǃkhausens tsî ǂnīǂnīsens xa ta ge ge ǁnâu, o ta ge nēsi ǁgabeba sa ǂguis ǃnâ-u ǂgā, haiba sa amǃnâs ǃnâ ǁgui tsî ǁnā daob hā-ūts geb ǁkhāb ai nî oa-ū tsi.”

29 ǁNās khaoǃgâb ge Jesajaba Hiskiab ǃoa ge mî: “Nēs ge ǁgauǁgaus ī nî xūn disa. Nē kurib tsî sao ra kurib tsîkha du ge ǁî-aitsama ra ǃī ǃhorob ǀguiba nî ǂû, xawe ǃnonaǁî kurib ǃnâ du ge sadu ǃhoroba tsoro tsî nî ǃgao tsî draibahaide ǃhana tsî draibena nî ǂû. 30 Judab ǃnâ ge ǃgaun ge ǃam hain khami ǀomkhâi, ǃnomaǃkhō tsî nî ǂûtani. 31 Ûiǃgau nî khoen ge Jerusalems ǃnâ tsî Sionǃhommi ai nî hâ, ǃKhūb nē ǃkhaisab nî dīsa ǂâibasen hâ xui-ao.

32 “Siriab di gao-aob xab ge ǃKhūba nēti ge mî: ‘ǁÎb ge nē ǃās ǃnâ ǂgâxa tide tsî ǁkhāti ǂā-e ǁîs ǃnâ ǁkhâu tide. ǁKhaukhō-e ūhâ toroǃkhamaob xareb ge ǃās ǀgūse hā tide tsî-i ge ǁkhāti ǁkhui-i xare-e ǁîs ǂnamipe omkhâihe tide. 33 ǁÎb ge hā-ūb ge daob ǁkhāb ǀkha ǃās ǃnâb ǂgâ tamase nî oa. Tita ǃKhūta ge ǁnāti go mî. 34 Tita ge ti ǃgôasib ǃaroma tsî ti ǃgāb Davida ta ge mîmâiba mîmâis ǃaroma nē ǃāsa ǁkhauba tsî nî sâu.’ ”

35 ǁNā tsuxub ǃnâb ge ǃKhūb di ǀhomǃgāba Siriaǁîgu hâǃkhaib ǃnâ ǀguikaidisi tsî ǁkhaisadisikoroǀaǀoadisi toroǃkhamaoga ge ǃgam. Sao ra ǃnauǁgoaga gu ge ǁîgu hoaga ǁnāpa ge ǁōǁgoe i. 36 Ob ge Siriab gao-aob Sanheriba, ǁnāpa xu Nineves ǁga ge oa. 37 ǀGuitsēb ǁîb elob Nisroxi tempeli ǃnâ ra ǀgoreǀî, hîa kha ge ǁîb ôakha Adrameleki tsî Sareseri tsîkha gôakha ǀkha ǃkhāǃan bi tsî Araratǃhūb ǁga ge ǁhâ. Tsîb ge ǀnî ǀgôab ǁîb dib Esarhadon ti ǀon hâba ǁîb soas ǃnâ ge gao-ao kai.