Aiǂoasǀkhāb dao-ams di sîsenūhes
1 Ob ge ǁîba tita ge oa kai ǃauga hâ ǃanusib di dao-ams, aiǂoasǀî ǃoa hâsa-u, xawes ge ǁîsa ge ǂganamsa i. 2 Ob ge ǃKhūba tita ǃoa ge mî: “Nē dao-ams ge ǂganamhe hâse nî hâ, ǁîs ge ǁkhowa-amhe tide, tsî khoe-i ge ǁîsa-u ǂgâ tide, ǃKhūb Israeli di Elob ge ǁîsa-u ǂgâ amaga; ǁnā-amagas ge ǂganamsase nî hâ. 3 Gaosab ge, gaosab a amaga ǁîs ǃnâ nî ǂnû, pere-eb ǃKhūb di ais aiǃâ nî ǂûga; dao-ams ai-ommi dis di daoba-ub ge ǁîba nî ǂgâ tsî ǁnā daob ǁkhāba-u nî ǂoa.”
Tempeli ǃnâ ǂgâsa mā-amhes di ǁgaragu
4 ǁNās khaoǃgâb ge ǁîba ǀapas dao-ams di daoba-u ommi aiǃâ ge ūsī te; tsî kō ta geo, ob ge ǂkhaisib ǃKhūb diba ǃKhūb di omma ge ǀoaǀoa; o ta ge ais âtas ai ge ǁnā. 5 Ob ge ǃKhūba tita ǃoa ge mî: “Khoenôa ǀgôatse, ǂgaob âtsa ǁî ǃkhais ai ǂnûi, îts sa mûra ǀkha mû, îts sa ǂgaera ǀkha ǁnâu, tita sats ǀkha nî ǃhoana, ǃKhūb ommi di ǂnûiǂgādi hoadi tsî ǁîb di ǂhanugu hoagu xa. Îts ǃgaoǃgâ, tari-i Tempeli ǃnâ ǂgâsa mā-amsas tsî tari-i ǁnāpa ǂgâsa mā-amsa tamasa.
6 “ǁNā mâǃoaxan Israeli ommi dina mîba: Nētib ge ǃKhūb Eloba ra mî: ǂÂu tama du kha hâ sadu di ǁgaidīgu hoagu ǀkha, sadu Israeli khoedo! 7 ǃHao khoen, ǃgaohe tamana du ge ti ǃanusib ǃnâ ge ūǂgâ, ǁîban nî ǃanuoǃnâ kaise, pereb tsî kaub tsî ǀaob tsîna du ra ǁguiba hîa. Ti ǃgaeǀhaosa du ge sadu ǁgaidīgu ǀkha ge khôao. 8 Sadu ge ti ǃanu xūna ǃûiǃgâ tama ge i, tsî du ge ǃhaokhoena ti ǃanusib di ǃûiǃgâ-aose ge mâi.
9 “Nētib ge ǃKhūb Eloba mî: ǃHao khoe-i, ǂgaob â-i ǃgaohe tama-i tsî ǁgans â-i ǃgaohe tama-i xare-i ge ti ǃanusib ǃnâ ǂgâ tide, Israeli khoen ǁaegu hâ ǃhaokhoen hoan xa.”
Leviǁîgu ge prisersisa xu ra ǁaraǂuihe
10 Ob ge ǃKhūba tita ǃoa ge mî: “Tsî Leviǁîgu, tita ge ǁnāxūgu, Israelǁîn ra ǁhapu, tsî tita xu ǁgôa-elogu âna ra ǁhapuǃgon hîa, ǁîgu ge ǁîgu di ǂhanuoǃnâsiba nî tani. 11 Xawe gu ge ǁîga ti ǃanusib ǃnâ ǃoaba-aose nî i; ǁîgu ge ommi di dao-amdi tawa nî ǃoaba, tsî gu ge ommi ǃnâ nî ǃoaba; ǁîgu ge khauǁguibas tsî ǂāǁguibas tsîra ǁaesa nî ǂāba tsî ais ân aiǃâ nî mâ, ǁîna gu nî ǃoabase. 12 ǁÎna gu ǁgôa-elogu ân di ais aiǃâ gere ǃoaba, tsî Israeli ommi dina gu ge ǂhanuoǃnâsib di ǁgonǁgonǂgaose ība amaga ta ge ti ǃomma ǁîgu ǃoagu ge ūkhâi, o gu ge ǂhanuoǃnâsib âga nî tani,
tib ge ǃKhūb Eloba ra mî.13 “O gu ge tita ǀgū tide, pristersisa gu tita nî ǃoabase, tsî hoan xa ǃanu xūna gu nî ǀgūse, tsî gu ge taob âga nî tani tsî ǁîgu di ǁgaidīgu, dī gu ge gu tsîna. 14 ǁNā-amaga ta ge tita ǁîga ti ommi di ǃûiǃgâ-aose nî mâi ǁîb di ǃoabas hoas tawa, ǁîb ǃnâ nî dīhesa a anu xūn hoan tawa.”
Pristergu
15 “Tsî Leviǁî pristergu, Sadoki ôagu, ǃûis ti ǃanusib disa gere dīgu, Israeli khoen tita xu ra ǁhapu hîa, ǁîgu ge tita nî ǀgū, tita gu nî ǃoabase, tsî gu ge ti ais aiǃâ nî mâ, tita gu kaub tsî ǀaob tsîkha nî ǁguibase,”
tib ge ǃKhūb Eloba ra mî.16 “ǁÎgu ge ti ǃanusib ǃnâ nî ǂgâ, tsî ǁîgu ge ti tāb tawa nî hā ǃoaba nîse, tsî gu ge ti soas ǃnâ nî ǃûi. 17 Tsî i ge nî ī, dao-amdi, ǂganagab ǃnâ hâ ai-ommi didi ǃnâ gu ga ǂgâ, o gu ǃuri linesarana nî ana ǃkhaisa, xawe gūǀûn ge ǁîgu ai hâ tide, ǂganagab ǃnâ hâ ai-ommi di dao-amdi ǃnâ tsî ommi ǃnâ gu ga ǃoaba ǁaeb ai. 18 ǃUri ǀgapadi ge danas âgu ai nî hâ, tsî ǃuri linesarana kamanagu âgu ai, tsî gu ge aosen kai nî xū-e ǃgaesen tide. 19 Tsî ǃauga hâ ai-ommi ǃoa gu ga ǁaes ǃoa ǂoao, o gu ge ǁnā saran, ǁîn ǃnâ gu gere ǃoabana nî ǁhû tsî ǁîna ǃanu ǃnā-omdi ǃnâ sī nî ǁgui, tsî gu ge ǀkhara sarana nî ana, ǁaesa gu khai tidese ǁîgu di saran ǀkha.
20 “Tsî gu ge ǁîgu di danade ǂkhomǃgoraǃgora tide, anu i a khami gu ge danadi âga nî ǂkhom. 21 ǁKhātib ge pristeri xareba ǂauxûiba ā tide, ǃnāb ǃnâ hâ ai-ommi ǃnâ gu ga ǂgâ ǃnubai. 22 ǁKhāti gu ge ǃoataras kas, ǀgoraxūhe hâs kas hoasa tarase ūbasen tide, xawe gu ge ǂkhamkhoede nî ūbasen, Israeli khoen di suriba xu, tamas ka io ǃoataras pristeri di ǃoatara ge isa.
23 “Tsî gu ge ti ǁaesa ǀgorasa nî ǁkhāǁkhā, ǃanusib tsî ǃanuoǃnâsib tsîkha ǁaegu, tsî ǁîna nî ǂanǂan, mâ ǀgoras ǃanuoǃnâb tsî ǃanusib tsîkha ǁaegu hâ ǃkhaisa. 24 Tsî gu ge ǂnoaguǃkhai-i ga hâ, o ǁî-e ti ǂhanugu ǃoa nî ǀgoraǃgâ; tsî gu ge ti ǂhanugu tsî ti ǂnûiǂgādi tsîna ǂnûihe hā ǀgapi ǁaegu âtagu ai nî ǃkhōǀgaipe tsî ti sâtsēde nî khai.
25 “ǁKhātib ge ǁîgu di ǀguib xareba ǁō hâ khoe-i tawa ǀgū tide, îb tā ǃanuoǃnâ, xawe ǁgûb kas, ǁgûs kas, ǀgôas kas, ǃgâsab kas, ǃgame tama ge hâ i ǃgâsas kas, ǃaroma gu ge a ǃanuoǃnâ kaisen ǁkhā. 26 Tsî ǃanuǃanusens âb khaoǃgâb ge ǁîba hû tsēde nî ǃâu. 27 Tsî ǃanusib ǃnâb ga ǂgâ tsēs ai ǃnāb ǃnâ hâ ai-ommi, hoan xa ǃanu ǃkhais ǃnâb nî ǃoabase, ob ge ǁoreǁguibas âba nî ǁguiba,
tib ge ǃKhūb Eloba ra mî.28 “Tsî nēs ge ǁîga ǀumise nî ība: Tita ge ǁîgu di ǀumi ta. ǁNā-amaga du ge ǁîga ūhâxū-e māhe tide Israeli ǃnâ; tita ge a ǁîgu di ūhâxū. 29 ǂÛǁguibas tsî ǁoreǁguibas tsî ǀhapiǁguibas tsîde gu ge ǁîga nî ǂû, ǁkhātin ge Israeli ǃnâ khaihe hân hoana nî ǁîgu di. 30 Tsî ǂgurosan, ǂguro ǂûn hoan din tsî ǃkhōkhâiǁguibas xūn hoan dis tsî sadu di ǃkhōkhâiǁguibadi hoadi tsîn ge nî pristergu di. ǁKhāti du ge ǂgurosan sadu tsampereb dina pristerga nî mā, ǀkhaeb sadu omdi ai nî hâga. 31 ǁŌ hâ xū-i kas, ǀkhauǃāhe hâ ani-i kas, ǀgoa-i kas hoasab ge pristera ǂû tide.”
© Khoekhoegowab Elobmîs © Bible Society in Namibia, 2020.
