Mâti gu Pristerga ǃanu ûiba nî ūhâ ǀgaub
1 ǃKhūb ge Moseba ge mîmā îb pristergu, Aronni ôaga mîba: “Prister-i xare-i ge ǁō hâ khoe-i soros tawa ǀgūse sīs ǀkha tā nî ǃanuoǃnâ kaisen; 2 ǁî-i îs, îb, ôasan, ǃgâsab, 3 tamas ka io ǃgame tama ǃgâsas ǁîb oms ǃnâ ǁan hâ taman ka io. 4 ǁÎb di ǀaokhoe-i di ǁō hâ soros ǀgūse sīs ǀkhab ge tā nî ǃanuoǃnâ kaisen.
5 “Prister-i ge ǁî-i danas tamas ka io, ǀhō-amsa ǂkhom tamas ka io ǁî-i sorosa ǃoaba ǁgauǂuis ǃaroma ǃgao tide. 6 ǁÎ-i ge ǃanu ûiba nî ūhâ tsî ti ǀonsa ǃanuoǃnâ kai tide. Pristerse i ge ǁî-e ǂûna ǁguibas ase ra hā-ū, ǁnā-amaga i ge ǃanu ûiba nî ūhâ. 7 Pristeri ge ǀai gere khoes tamas ka io, oaxae tama khoes tamas ka io, ǃgameba xu ge ǀgoraxūhe hâ i khoes ǀkha ǃgame tide; ǁîb Elob ǃoabas ǃoa khaihe hâ xui-ao. 8 Mâ Israelǁî-i hoa-i ge pristera ǃanub ase nî ǃgapaǀî, ǂûǁguibasab ra ti ǃgôasib ǃoa ǁguiba xui-ao. Tita ge ǃKhūta; ǃanu ta a xui-ao ta ge ti khoen ona ra ǃanuǃanu. 9 Pristeri di ôas ga ǀai-ao kai, os ge ǁîsa ǁîs îba taosib ǃnâ ra mâi tsîs ge ǁnā-amaga nî ǂhubiǂuihe.
10 “ǀGapipristeri ǀnau-ū-oli-i ǀkha ge ǀnau danahe tsî pristersi saranab nî anase ge mâiǂgāheb ge ǃoab ǃnâb ga hâ xawe, ǁîb di danaǀûna ǃamkuse ūhâ tsî ǁîb sarana ǀkhau tide. 11-12 ǁÎb ge ti ǃoabas ǃaroma ge ǀnauhe tsî ǁîb ǂûba ǀuriǀurisen tamas ka io, ti Tentomma xu ǂoa tsî ǁōb hâ om-i tawa sī ǂgâs ǀkha ǃanuoǃnâ kaisen tide, nēsi i ga ǁîb îb tamas ka io îsa ǁō xawe. 13 ǁÎb ge oaxaesa nî ǃgame, 14 xaweb ge ǃoataras tamas ka io, ǃgameba xu ǀgoraxūhe hâ khoes tamas ka io, ǀai-ao ge isa ǃgame tide. ǁÎb ge ǁîb di suriba xu ǀgui hâ oaxaesa nî ǃgame. 15 ǁNā tamas ka io, on ge ǁîb ôan ǃanu ka hâna nî ǃanuoǃnâ. Tita ge ǃKhūta ǁîba ti ǃoabas ǃaroma ǀGapipristerse ge khaita.”
16 ǃKhūb ge Moseba ge mîmā, 17 îb Aronni ǃoa mî: “Sa surib di khoen hîa sorosi ǃnubusina ūhân hoan ge ǂûǁguibasa tita ǁguibas ase hā-ūba tide. 18 Khoe-i hîa sorosi ǃnubusina ūhâ-i hoa-i: ǂGī khoe-i tamas ka io, ǃhora khoe-i tamas ka io, ūsa ais tamas ka io sorosa ūhâ khoe-i hoa-i ge ǁguibasa dī tide. 19 Tamas ka io ǃhora ǁôab tamas ka io ǂaisa ūhâ khoe-i, 20 tamas ka io khoe-i hîa ǁkhamusa ūhâ-i, tamas ka io kai ǁoa sorosa ūhâ-i, tamas ka io mûǀaeb tsî khōǀaesenna ūhâ khoe-i; tamas ka io dabisa khoeb kas hoasa. 21 Aronni di suriba xu hâ khoe-i hîa sorosi ǃnubusina ūhâ-i hoa-i ge ǃKhūb Tentommi ǃnâ ǂgâ tsî ǁguibasa mā-amhe tide. 22 ǁNāti ī khoe-i ge tita ra ǁguibahe ǂûna a ǂû ǁkhā tsî ǁkhāti ǀō-aisase ta ra ǁguibahe ǃanu tsî hoan xa ǃanu ǂûn tsîn hoana xu a ǂû ǁkhā. 23 Xawe ǁî-i sorosi ǃnubusina ūhâ xui-ao i ge ǃanu ǂgāmâisab tamas ka io altars tawa ǀgū tide. ǁÎ-i ge nē ǃanu xūna ǃanuoǃnâ kai tide, tita a ǃKhū tsî ǁîna nî ǃanuǃanu xui-ao.”
24 Nēs ge Moseb ge Aronni, Aronni ôagu tsî Israelǁîn ǃoa mî mîsa.
© Khoekhoegowab Elobmîs © Bible Society in Namibia, 2020.
