2 Kroniks 4 - Khoekhoegowab New Translation 2020 (KKG20)

Tempeli di sîsenūxūn

1 Gao-aob Salomob ge brons altars, khoese meterga gaxu, khoese meterga ǂhaba tsî haka tsî ǃkhare meterga ǀgapisa ge kuru kai. 2 ǁÎb ge ǁkhāti ǃgupu, brons ǁgamxapas, ǀgam tsî ǃkhare meterga ǃgam, koro meterga ǂhaba tsî ǂnamipeb âsa ge disikoroǀa meter isa ge kuru. 3 Xapas amǃgâb ai i ge ǃaukabǀkhāb ai, ǁîs ǂnamipe, ǀgam raikha ge anansa i, ǀguiba naub ǀgapiga. Nē ananxūn ge gomagu ība ge ūhâ i tsî xapas ǀkha ge ǀgui ǂnâhe hâ i. 4 Xapas ge disiǀgamǀa brons gomagu ai ge mâ i, ǃnonagu ge ǀapasǀkhāb ǁga gere kō, ǃnonaga huriǂoasǀkhāb ǁga, ǃnonaga ǃkhawagasǀkhāb ǁga tsî ǃnonaga aiǂoasǀkhāb ǁga. 5 Xapas di ǀkhāb ge khoese sentimeterga ge ǁau i tsî amǃgâb âs ge kobis dib khami ge ī i, tsî ǃkhās amǃgâb khami ǃaugabǀî gere ǂapaǂoa. ǁÎs ge ǁaubexa ǃnanidisiǀoadisi litergu ǁgam-e ge ū ǁkhā i. 6 ǁÎgu ge ǁkhāti disi ǁāsenǃnâǃorede kuru tsî korode ǃkhawagasǀkhāb Tempeli dib ai ge mâi tsî korode ǀapasǀkhāb ai. ǁÎdi ǃnâ i ge khauǁguibas xūn di ǁgan-e gere ǁāhe. Kai ǁgamxapas ge pristergu nî ǁāsenǃnâse ge hâ i.

7-8 ǁÎgu ge disi, ǃhuniǀuri ǃamǀaekandelarga xoaǁguiga ǃoa ge kuru, tsî disi tāgu tsîna. Tsî gu ge ǁîna Tempeli ǃnâ ge mâi, koro kandelargu tsî koro tāgu tsîna ǀguiǀkhāb ai tsî koro kandelargu tsî koro tāgu tsîna nauǀkhāb ai. ǁKhāti gu ge ǀguikaidisi ǃhuniǀuri ǃoredi tsîna ge kuru.

9 ǁÎgu ge pristergu ǃaroma omǂnamiba ge dī tsî ǁkhāti ǃaugab di omǂnamib ona. Omǂnamikha ǁaegu hâ dao-amdi ge brons-i ǀkha ge ǃkhûǀkhāsa i. 10 ǁGamxapas ge ǃkhawagas di aiǂoasǀkhāb ǁhôas Tempeli dis ǃnâ ge mâihe.

11-16 Hirammi ge ǁkhāti sūdi, xaraodi tsî ǃoredi tsîna ge kuru. ǁÎb ge gao-aob Salomobab ge mîmâiba xūn, Tempeli din hoana ge dītoa:

ǀGam ǂkhâǃnâkha

ǃhupu ǃore-i khami i danara ǂkhâǃnâkha di ra

ǂGapusa khedegu, mâ danas hoas ai

Hakakaidisi brons xranatdi, mâ danas hoas ǂnamipe ǀgam raikha ǃnâ

Disi kunirodi

Disi ǁāsenǃnâǃoredi

ǁGamxapas

Disiǀgamǀa gomaǁgōgu ǁgamxapas mâ-ai gu

Sūdi, xaraodi tsî ferkhegu

ǂOaǂamsa ǂansa ūhâ sîsenaob Hirammi ge nē xūn hoana ǂkhaiǂkhaisa brons-i ǀkha ge kuru, gao-aob Salomob ge mîmā bi khami, ǃKhūb di Tempeli ǃnân nî sîsenūhese.

17 Gao-aob ge ǁîn hoana ǀurin ra ǂnâhe ǃkhais, Sukots tsî Seredas tsîra ǁaegu, Jordanǃgoaǃnāb ǃnâ ǁgoes tawa ge kuru kai. 18 ǁNātikōsen ge ǂgui xūna ge kuruhe, ǁîn ge kuru-ūhe brons-i di ǃgommi ge mîǁguihe ǁoa is kōse.

19 Gao-aob Salomob ge ǁkhāti Elob Tempeli di xūn hoana ǃhuniǀurib ǀkha ge kuru kai: Altars, ǁguibaperegu di tāgu, 20 ǃūmû ǃhuniǀurib ǀkha dīsa kandelargu tsî ǃamǀaedi, Hoan xa ǃAnuǃkhais aiǃâ nî ǃamhedi, 21 ananūhe hâ ǃkhādi, ǃamǀaedi tsî tsurigu xapadi, 22 ǁaraǂao-ūxūn, ǃoredi, ǀanǀanūxapadi tsî ǀgamsa ǂnomdi ra taniǃnâhe pandi tsîn hoan ge ǃūmû ǃhuniǀurib ǀkha ge kurusa i. ǃAugab daodi Tempeli didi tsî Hoan xa ǃAnuǃkhais didi tsîn ge ǃhuniǀurib ǀkha ge ǃkhûǀkhāsa i.