Esekiel 18 - Khoekhoegowab New Translation 2020 (KKG20)

Mâ-i hoa-i di ǃereams

1 ǃKhūb di mîs ge tita ǃoa ge hā: 2 “Tare-e du ra nē ǂkhōs Israeli xa hâsa ǁguiǃgâs ǀkha ra ǂâibasen?

“ ‘ǁGûn ge ǀkhuru draibe ra ǂû,

xawen ge ǀgôana ǀkhuru ǁkhoaba ra hō.’ ”

3 Nētib ge ǃKhūb Eloba ra mî: “Tita ûi hâs ao, nē ǂkhōsa du ge ǃaruǀî Israeli ǃnâ sîsenū tide. 4 Hoaraga ûigu a ti ǃkhaisa ǂanǃgâ; ǁgû-i di ûib tsî ǀgôa-i di ûib tsîkha hoakha ge a ti. ǁOre ra khoe-i ǀgui-i ge nî ǁō.

5 “Khoeb ga ǂhanu-ai tsî ǂhanu tsî ǂhauǃnâse ûio, 6 ǁîb ga ǃhomgu ai ǂû tama i, tamas ka io mûra âba Israeli ǁgôa-elogu ai ǃammâi tama i, ǁîb ǀgūkhoeb tarasab ga ǀuriǀuri tama i, tamas ka io khoesa ǁîs ǁkhâǀaesennas ūhâ hîa ǀgū tama i, 7 khoe-i xare-eb ga ǁgâiǀā tama i, xaweb ga surude-ao-e ǁî-i mâiǁkhaesa mā-oao, ǁîb ga ǁgūǀhana tama io, ǁîb perebab ga ǃâsa khoena mā tsî ǀōǀkhā hâna ana, 8 ǁîb ga hōǃnāsa ūbasen tama i, tamas ka io hōǂgās xa ǃnāsase ūbasen tama i, 9 ǁîb ga ti ǂnûiǂgāde sao tsî ti ǂhanuga ǂōrisase ǃkhōǀgaipe, tsî ǂgomǂgomsase ûio; ǁnāti ī khoeb ge a ǂhanu-ai tsî amase nî ûi,”

tib ge ǃKhūb Eloba ra mî.

10 “ǁNāti ī khoeb ga ǂkhabaxa ǀgôab, ǀaoǂnâxū-aoba ūhâ, 11 nē xūn di ǀgui-e ga dīb, ǁîb îb ga dī tama i xawe, ǃhomgu ai ra ǂûb, ǀgūkhoeb tarasa ra ǀuriǀurib, 12 ǀgâsan tsî ǂhâb ǃnâ hânab ga ǁgâiǀā, ǁgūǀhana, mâiǁkhaesab ga mā-oa tama i, ǁîb mûrab ga ǁgôa-elogu ai ǃammâi, ui-uisa xūnab ga dī, 13 hōǃnās tsî hōǂgās tsîra xab ga ǃnāsase ūbasen; o ǁîba ûib kha nî? ǁÎb ge ûi tide. ǁÎb ge nē ui-uisa xūn hoana ge dī; ǁîb ge amase nî ǁō. ǁÎb ǀaob ge ǁîb ǂûb ai nî hâ.

14 “Nē ǀgamǁî khoeb ga ǀgôaba ūhâ, ǁîb îb ge dī ǁoren hoana ra mûba, ǁîn xa ǂâiǂâisen, tsî ǁnāti dī tamaba, 15 ǃhomgu ai ǂû tamaba, tamas ka io Israeli ǁgôa-elogu ai mûra âba ǃammâi tamaba, ǁîb ǀgūkhoeb tarasa ǀuriǀuri tamaba, 16 tamas ka io khoe-i xare-e tsūdī tamaba, mâiǁkhaesa ūbasen tamaba, ǁgūǀhana tamaba, xawe ǁîb pereba ǃâ hâna ra māb tsî ǀōǀkhā hâna ra anaba, 17 ǁîb ǃomma tsūdība xu ra ǂgae-oaba, hōǃnās tamas ka io hōǂgās xa ǃnāsase ūbasen tamab, ti ǂhanuga ra ǃkhōǀgaipeb tsî ti ǂnûiǂgāde ra saob; ǁîb ge ǁîb îb ǁoren ǃaroma ǁō tide. ǁÎb ge amase nî ûi. 18 ǁÎb îb xasa, ǁîb gere ǁgūǀhana, ǁîb ǃgâsaba ǀhôagaoǃnâ tsî ǁîb khoen ǃnâ ǃgâi tamase gere ûi xui-aob ge ǁîb ǁoren ǃaroma nî ǁō.

19 “Xawe du ge ra dî: ‘Tare-i ǃaromab ǀgôaba ǁgûb ǁoren ǃaroma nî tsâ?’ ǀGôab ga ǂhanuse tsî ǂhauǃnâse ûi tsî ǂōrisase ti ǂnûiǂgādi hoade ǃkhōǀgaipe, ob ge ǁîba amase nî ûi. 20 ǁOre ga khoe-i hoa-i ge nî ǁō. ǀGôa-i ge ǁgû-i di ǁoren ǃaroma tsâ tide, tamas ka io i ge ǁgû-e ǀgôa-i ǁoren ǃaroma tsâ tide. ǂHanu-ai-i di ǂhanu-aisib ge ǁî-i ǂû-i ai nî hâ tsî ǂkhabadī-ao-i di ǂkhabadīb ge ǁî-i ǂû-i ai nî hâ.

21 “Xawe i ga ǂkhabadī-ao-e ǁî-i ǁoren hoana xu dabasen tsî ti ǂnûiǂgādi hoade ǃkhōǀgaipe tsî ǂhanuse tsî ǂhauǃnâse ûi, o i ge ǁî-e amase nî ûi. ǁÎ-i ge ǁō tide. 22 ǁÎ-i ge ǁore ǁoren di ǀgui-i tsîn ge ǁî-i ǃoagu ǂâihōhe tide. ǂHanu-aisib hîa i go dīb ǃaroma i ge ǁî-e nî ûi. 23 Tita kha ǂkhaba khoe-i di ǁōb ǃnâ ǃgâiǃgâibasen-e ūhâ, xawe ta ra ǂgaos ge ǁî-i ga ǁî-i tsū daoga xu dabasen tsî ûi ǃkhaisa”

tib ge ǃKhūb Eloba ra mî.

24 “Xawe i ga ǂhanu-ai khoe-e ǁî-i ǂhanu-aisiba xu dabasen tsî ǁore tsî ǂkhaba khoe-i ra dī ui-uisa xūna dī, o ǁî-e ûi-i kha nî? ǁÎ-i ge dī ǃgâi xūn di ǀgui-i tsîn ge ǂâihōhe tide; ǁî-i ǂgomoǃnâsib ǀhapis tsî ǁoreb ǃaroma i ge ǁî-e nî ǁō.

25 “Xawe du ge ra mî: ‘ǃKhūb ge ǂhanu tamase ra dī.’ Nēsi ǁnâu, Israeli ommi dido: Ti dīǀgauba kha a ǂhanuoǃnâ? Sadu dīǀgau tamaba kha ǂhanu tama hâba? 26 ǂHanu-ai-i ga ǁî-i ǂhanuoǃnâsiba xu dabasen tsî tsūdī, o i ge ǁnās ǃaroma nî ǁō. Tsūdī-i go ǃkhais ǃaroma i ge ǁî-e nî ǁō. 27 Xawe ǁkhawa, ǂkhabadī-ao-i ga ǁî-i ǂkhabadība xu dabasen tsî ǂhanuse tsî ǂhauǃnâse ûi, o i ge ǁî-e ûib â-e nî sâubasen. 28 ǁÎ-i ge ǂâiǃgâ tsî dī-i ge tsūdīn hoana xu ūdabasen, xui-ao i ge ǁî-e amase nî ûi. ǁÎ-i ge ǁō tide. 29 Xawen ge Israeli ommi dina ra mî: ‘ǃKhūb ge ǂhanu tamase ra dī.’ Nēsi ǁnâu, Israeli ommi dido: Ti dīǀgauba kha a ǂhanuoǃnâ? Sadu dīǀgau tamaba kha ǂhanu tama hâba?

30 “ǁNā-amaga ta ge tita nî ǀgoraǃgâ du, Israeli ommi dido, mâ-i hoa-e ǁî-i ra ûi ǀgauba ǃoa,”

tib ge ǃKhūb Eloba ra mî.

“ǃHobasen, î sadu dīsādi hoade xu dabasen; ǁnā tamas ka iob ge ǁoreba nî sadu di hîǀhuru. 31 Sado xu hoaraga dīsān ti ǃoagu du ge dīn hoana dībē, î sadu ǃaroma ǀasa ǂgaob tsî ǀasa gagas tsîna hōbasen! Israeli ommi dido, tarexū-i ǃaroma du kha nî ǁō? 32 Tita ge khoe-i di ǁōb ǃnâ ǃgâiǃgâibasen-i xare-e ūhâ tama hâ,” tib ge ǃKhūb Eloba ra mî. “ǁNā-amaga, ǃhobasen, î du ûi.”