ǃGameǀgoras tsî ǁkhawa ǃgames
1 “Khoeb ga ǃgame tsî taras ge dī taotaosa xū-i ǃaroma ǁîs xa ǃgâibahe tama i, ob ge ǁîba ǀgoraǂkhanisa xoa, ǁîsa mā tsî ǁîsa ǁîb omsa xu nî ǃgû kai. 2 Xawes ga ǁîsa ǀkhara aob xa a ǃgameheo, 3 tsîb ga ǁîb tsîna ǁîsa ǃaruǀî ǂgao tama i, ob ge ǀgoraǂkhanisa xoa, ǁîsa mā tsî ǁîsa oms âba xu nî ǃgû kai; tamas ka iob ga ǁîs di ǀgamǁî aoba ǁō, 4 tamas ka io i ga mâti ǀgui hās hoasab ge ǁîs di ǂguro aoba ǁîsa ǁkhawa ǃgame tide, ǁîs a ǃanuoǃnâ tib ge mî xui-ao. Xaweb ga ǁîsa ǁkhawa ǃgame, os ge ǁnāsa ǃKhūb mûǁae a ui-uisa. Tā ǃKhūb sadu Elob xa du ǀumis ase nî māhe ǃhūba ǁnāti ī ui-uisa ǁoreb ǀkha ǃanuoǃnâ kai.
ǃKharagagu ǂhanumādi
5 “Khoeb ga ǀasase ǃgame, ob ge toroǃkhams tamas ka io ǀhûhâsib sîsen-i xare-e ǁgui-aihe tide. Hoaraga kuriba māǁnâhe tsîb ge oms ai ǀgui hâ tsî ǁîb tarasa nî ǂkhîǂkhîǂgao.
6 “Khoe-ets ga xū-e ǀkhupi, ots ge matares ase ǁnā khoe-i ǃhorob ǁkhamiǀuisa ū tide. ǁÎ-i di tsēkorobe ǂûs tsî hōǂgās tsînats ra ǀhana xui-ao.
7 “Khoe-i hîa ga ǁî-i ǃgâsa Israelǁî-e khobosis ǃaroma ǃnari tamas ka io ǁî-e khobo-i ase ǁamaxū-i hoa-i ge nî ǃgamhe. Nē ǀgaus ai ǀgui du ge nēti ī ǂkhababa Israelǁîn ǁaeguba xu nî ǀariǂui.
8 “Khōǀaesenats ga ūhâ, ots ge Leviǁî pristergu ra mî khami ǀgui nî dī; tita ge ǁîga mā ǁgui-aidi hoade sao. 9 ǃKhūb sadu Elob ge Miriams ǀkha Egipteba xu du gere doeǂoaxa, o dī ǀgausa ǂâihō re.
10 “Sa ǃgâsa Israelǁî-ets ga xū-e ǀkhupi, o tā matares ase ǁî-i oms ǃnâ ǂgâ tsî xū-e ūbasen. 11 Sats ge ǃauga nî ǃâumâ, tsî-i ge khoe-i hîats ǀkhupi hâ-e, sa mataresa nî ǂoaxa-ūba tsi. 12 ǁÎ-i ga ǀgâsa, o tā ǁî-i ra matares ǃaroma mā xū-e nau ǁgoas kōse ūhâ. 13 Sores ga ǂgâ, ots ge ǁî-e nî mā-oa, î-i ǁî-e ǁî-i ǃnâ ǁgoe ǁkhā. O-i ge ǁî-e nî ǀkhae tsi tsîb ge ǃKhūb sadu Eloba sats ǃnâ ǃgâiǃgâibasensa nî ūhâ.
14 “Tā sadu ǃādi ǃnâ ǁan hâ ǀgâsa tamas ka io ǂhâb ǃnâ hâ ǀkhupiǃgān, nēsin ga Israelǁî tamas ka io ǃhaokhoe xawe, ǁîna ǁgaisise ûi-ū. 15 ǁÎna ǁkhā tsēs ai sores nî ǂgâs aiǃâ ǁîn mataresa mā, ǀgâsa tsîn ǁnāpa xu ǀgui nî ǂhanu xuige. ǁNāsats ga dī tama i, on ge ǁîna sa ǃoagu ǃKhūb kōse nî ǂgai tsîts ge ǀhapixase nî hōhe.
16 “ǁGûn ge ǀgôan di ǁoren ǃaroma ǃgamhe tide tamas ka ion ge ǀgôana ǁgûn di ǁoren ǃaroma ǃgamhe tide. Mâ khoe-i hoa-i ge ǁî-i di ǂhunuma ǁoren ǃaroma nî ǃgamhe.
17 “Tā ǃhaokhoen tamas ka io ǃguniǀgôan tsîna ǁîn di ǂhanuga ǀhana; tsî tā ǃoataras sarana surudeb ǃaroma ǀhana. 18 Egipteb di khobosis ǃnâ du ge hâ i, ob ge ǃKhūb sadu Eloba ǁnāpa xu ǃnoraǃnora du ǃkhaisa ǂâihō re. ǁNā-amaga ta ge nēsa dī du nîse ra mîmā du.
19 “Sadu ǃhoroǃhanaba du ga ǃgao, tsî ǀhaoǀhao du ge ǃhoroǂûn danade ǁnāpa a ǀuru, o tā ǁîna ôa-oa. Xawe ǁîna ǃhaokhoen, ǃguniǀgôan tamas ka io ǃoataradi ǃaroma ǁnāxū; ob ge ǃKhūb sadu Eloba dī du ra xū-i hoa-i ǃnâ nî ǀkhae du. 20 Sadu ǀkherana du ga ǂguro ǃnāsa ǃora, o du ge ǁkhawa ǃora tide, xawe ǃgau ra ǀkherana ǃhaokhoen, ǃguniǀgôan tsî ǃoataradi tsîna ǁnāxūba. 21 ǂGuro ǃnāsa du ga sadu draibena ǃora, o tā ǀgamǁî ǃnāsa oaǃgâ, xawe ǃgau ra draibena ǃhaokhoen, ǃguniǀgôan tsî ǃoataradi tsîna ǁnāxūba. 22 Tātsēs tsîna tā Egipteb ǃnâ du ge khobo i ǃkhaisa ǀuru; ǁnā-amagab ge ǁîba nē mîmāsa ge mā du.
© Khoekhoegowab Elobmîs © Bible Society in Namibia, 2020.
