Eksodus 12 - Khoekhoegowab New Translation 2020 (KKG20)

Pasxaǁâudīb

1 ǃKhūb ge Egipteb ǃnâ Moseb tsî Aron hâkha ǃoa ge mî: 2 “Nē ǁkhâba du ge ǂguro ǁkhâb kurib dib ase nî ǃgapaǀî. 3 Hoaraga ǀhûhâsib Israelǁîn diba mîba, în disiǁî tsēs nē ǁkhâb dis ai mâ omaris hoas di danaba, omaris âb ǃaroma ǀgui ǁkhaob tamas ka io piriroba kōǂuibasen. 4 Omaris ga ǀoro khoena ūhâ tsî nē ǁkhaob tamas ka io piriroba hapu ǁoa, os ge ǁîs di ǀgūkhoen ǀkha nî ǀgoragu. Omaris khoen di ǃgôab tsî mâ-i hoa-i mâtikōse nî ǂûsa kō hâse sa ǁkhaob tamas ka io piriroba ǁhûiǂuibasen. 5 Nē ǁkhaob tamas ka io pirirob hîats nî kōǂuibasenni ge ǀgui kurixa tsî nî ūo. 6 Disihakaǀaǁî tsēs ǁkhâb dis di ǃoes aib ge hoaraga ǀhûhâsib Israelǁîn diba nē ǁkhaob tamas ka io piriroba nî ǂā. 7 ǁNās khaoǃgân ge ǁîna ǀaoba ū tsî ǁnā oms hîa ǁkhaob tamas ka io pirirob ra ǂûǃnâhes di dao-amhaikha tsî dao-ams ai ǀgapise nî ǂkhau. 8 ǁNā tsuxub ǃnân ge ǁgan-e ǀaes ai am tsî au hain tsî khūkhū-e ūhâ tama pere-i ǀkha nî ǂû. 9 Tā orase tamas ka io ǁgam-i ǃnâ sâi, xawe hoaraga ǁkhaob tamas ka io piriroba danas, ǃūgu tsî ǃnāxūn tsîn hoan ǀkha ǀaes ai am. 10 Hoaraga ǃân ǁkhaob tamas ka io pirirob din ge ǃuis ǃnâ nî hapuhe tsî ǁgoas kōse ūhâhe tide. ǂÛǃgauhe hâ ǃân hâ hîas ga soresa ǁhai, on ge nî ǂhubiǂuihe. 11 Tsî ǂû du ka, o du ge sao ra ǀgaub ai nî anasen: Sadu kamanaga ǃgaesenni ǀkha ǃgae, sadu ǀkhapude ǂaidi ǃnâ ǂgaeǂgā tsî sadu ǁgâibasenhaiga sadu ǃomgu ǃnâ ūhâse ǃhaese ǂû. Nēb ge ǃKhūb di Pasxaǁâudība xuige.

12 “ǁNā tsuxuba ta ge hoaraga Egipteb ǃnâ-u ǃgû tsî hoaraga ǂguroǃnaesagu khoen, ǀgoan tsî goman tsîn diga ǃgam tsî hoaraga elogu Egipteb digu ai kai ǁkharaba nî gowaǂui, tita a ǃKhū xui-ao. 13 ǁNā ǀaob hâǃnâ du a omdi ai a ǂkhausab ge sado sâus di saos ase nî ī. ǀAoba ta ga mû-ai oms hoasa ta ge nî ǃkharuǀkhā tsî Egipteb hoaragaba ta ga ǁkhara, o ta ge tsâǀkhā du tide. 14 Nē tsēs ge sadu di ǂâiǂâisentsēs ase ī tsî hoaǁae hā nî surib hoab xa ǃKhūb di tsēs ase nî tsēdīhe.

Khūkhū-e ūhâ tama pere-i di ǁâudīb

15 “Hû tsēdi ǀgaiba du ge khūkhū-e ūhâ tama pere-e nî ǂû. ǂGuro tsēs ai du ge sadu omdi ǃnâ hâ khūkhū-ūxūn hoana nî aoxū. Tsî ǁnā hû tsēdi ǃnâ ga khūkhū-e ūhâ pere-e ǂû khoe-i hoa-i ge ǃaruǀî Israelǁîn di ǀgui-i ase ǃgapaǀîhe tide. 16 ǂGuro tsēs tsî ǀuni tsēs tsîra ai du ge tita nî ǀgoreǀî. ǁNā tsēra ai i ge sîsen-i xare-e dīhe tide, xawe ǂû du nî ǂûn ǀguin ge nî aiǂhomihe. 17 Khūkhū-e ūhâ tama pere-i di ǁâudība du ge nî tsēdī. Nē tsēs ǂûs ais ge tita ge sakho di ǃhaode Egipteba xu ǂgaeǂguiǂuisa. Nē tsēs ge hoaǁae hā nî surib hoab xa ǃKhūb di tsēs ase nî tsēdīhe. 18 ǂGuro ǁkhâb di disihakaǀas ǃoesa xū ǁkhā ǁkhâb di ǀgamdisiǀguiǀas ǃoes kōse i ge khūkhū-e ūhâ tama pere-e nî ǂûhe. 19 Hû tsēdi ǀgaiba i ge khūkhū-e ūhâ xū-i xare-e sadu omdi ǃnâ hōhe tide. Tsî khoe-i ga ǁnā hû tsēdi ǃnâ khūkhū-e ūhâ pere-e ǂû, o i ge ǁî-e nēsi i ga ǃhaokhoe tamas ka io Israelǁî xawe ǃaruǀî Israelǁîn di ǀgui-i ase ǃgapaǀîhe tide. 20 Khūkhū-e ūhâ xū-i xare-i ge ǂûhe tide, xawe du ge sadu omdi ǃnâ khūkhū-e ūhâ tama pere-i ǀgui-e nî ǂû.”

Moseb ge Israelǁîna ǁgui-aisa ra mā

21 Ob ge Moseba hoaraga ǂgaeǂgui-aogu Israelǁîn diga ǂgaiǀkhī tsî ǁîgu ǃoa ge mî: “Mâ omaris hoasa mîba, îs kōǂuibasens go ǁkhaob tamas ka io piriroba Pasxaǁâudīb ǃaroma ǂā. 22 Hisophais di ǁnâu-e ū, î ǀaob hâǃnâ ǃores ǃnâ ǀhari tsî oms di dao-amhaikha tsî dao-ams di ǀgapises tsîna ǂkhau. Khoe-i xare-i ge sores nî ǁhais aiǃâ omsa xu ǂoaxa tide. 23 ǁNā tsuxubab ge ǃKhūba Egipteb ǃnâ-u ǃkharu tsî mâ Egipteǁî ǂguroǃnaesab hoaba nî ǃgam. Oms di dao-amhaikha tsî dao-ams di ǀgapiseb tsîn tawab ga ǀaoba mû, ob ge ǁnāti ī omsa nî ǃkharuǀkhā tsî ǃgamǂui-aoba ǁnāpa ǂgâ tsîb sadu ǂguroǃnaesaga nî ǃgamsa mā-am tide. 24 Sadu tsî sadu surib tsîn ge nē mîmāde hoaǁae nî ǃkhōǀgaipe. 25 ǃKhūb ge mîmâiba du ǃhūb ǃnâ du ga sīs tsîna du ge nē ǂnûiǂgāsa tsēdīs ǀkha nî aiǃgû. 26 Tsî sadu surib ga ‘Tare-i ǃaroma du nē ǁÂudība ra tsēdī?’ ti dî duo, 27 o du ge ‘Nēb ge Pasxaǁâudīb ǃKhūb di ǃgôasib ǃaroma ra tsēdīheba. ǁÎb ge Egipteb ǃnâ Israelǁîn di omde ǃkharuǀkhā tsî Egipteǁî ǂguroǃnaesaga ǃgam, xaweb ge sida ǂguroǃnaesaga ge sâu’ ” ti nî ǃeream.

Tsîn ge Israelǁîna ǃhon tsî ǁîba ge ǀgoreǀî. 28 On ge Israelǁîna ǃgû tsî ǃKhūb ge Moseb tsî Aron hâkha mîmā khami sī ge dī.

Egipteb ǂguroǃnaesagu ra ǁō

29 Tsuxub ǁaegub ǃnâb ge ǃKhūba hoaraga ǂguroǃnaesagu Egipteb digu, Faraob di ǂguroǃnaesab, trons di ǀumi-aoba xu ādi ǃnâ ǂnôa ǃkhōsan di ǂguroǃnaesab kōse nî ǁō kai. ǁKhāti gu ge hoaraga ǂguroǃnaesagu ǀgoan tsî goman digu tsîna nî ǃgam. 30 ǁNā tsuxub ǃnân ge Faraob, ǁîb ǂammâisagu tsî hoaraga Egipteǁîn tsîna kai ǃau-āb Egipteb hoaragab ǃnâ ge khâib xa ge ǂkhai. Mâ oms hoas ǃnâb ge ǂguroǃnaesaba ge ǁō. 31 ǁKhā tsuxub ǂûb ǃnâb ge Faraoba Moseb tsî Aron hâkha ǂgaiǀkhī tsî ge mî: “Sakho tsî Israelǁîn tsîdo ti ǃhūba xu ǂoa! ǃGû, î ǂgan kho ge khami ǃKhūba sī ǀgoreǀî. 32 Sadu ǀgoan tsî goman tsîn hoana ū, î ǃgû ǂgan kho ge hâ i khami, xawe Elob ǀkhaeba ǂganba te re.”

33 Egipteǁîn ge Israelǁîna kaisen nî ǃnoesase Egipteba xu ǂoa ǃkhaisa ge ǀkhoma. ǁÎn gere mî xui-ao: “Sadu ga nēsi Egipteba xu ǂoa tama i, o da ge hoada nî ǁō.” 34 On ge Israelǁîna ǁîn di khūkhū-e ūhâ tama kinisa pere-e kiniǃnâxapan ǃnâ ǂgā, saran ǃnâ ǃgami tsî ǁîn ǃhōdi ai ge tani. 35 Israelǁîn ge Moseb ge ǁîna mîba khami Egipteǁîn ai ǃhuniǀuri tsî ǀhaiǀuri-anixūn tsî saran tsîna ge ǂgan. 36 Tsîb ge ǃKhūba Egipteǁîn nî Israelǁîna ǃgôasiba mā ǃkhaisa dī tsî ǁîn ge ǂgan xūna ǁîna ge mā. Nē ǀgaub ain ge Israelǁîna Egipteǁîna ǃkhūsib âna ge ǀhana.

Israelǁîn ra Egipteba xu ǂoa

37 ǁKhā tsuxub ǃnân ge Israelǁîna Ramesesa xu Sukot ti ǀon hâ ǃkhais ǁga ge ǃgû. Tarekhoedi tsî ǀgôan tsîn ǃgôaǂgāhe tamase gu ge ǁnāpa ǁaubexa ǃnanikaidisiǀoadisi aorekhoega ge hâ i. 38 Kai ǂnubis di khoen ǀnîn, ǂgui ǀgoan tsî goman tsîn ge ǁîn ǀkha ge ǃgû. 39 Egipteba xun ge ūsao khūkhū-e ūhâ tama kinisa pere-i ǀkhan ge ǃgupu, ǂhaba perede ge am. ǁÎn ge Egipteba xun ge kaise ǃnoesase ǁgariǂuihe xui-ao, ǁîn di perenan nî ǁanǁan ǁae-i tsîna hō tama ge hâ i.

40 Israelǁîn ge Egipteb ǃnâ hakakaidisi tsî ǃnonadisi kuriga ge ǁan hâ i. 41 Tsî hakakaidisi tsî ǃnonadisi kurigu di ǀuni tsēs ais ge ǃKhūb di ǁaes hoasa Egipteba xu ge ǂoa. 42 ǁNā tsuxub ǃnân ge ǃKhūb di ǃûis ǃnakan hâse Egipteba xu ǁîb xa ge ǂgaeǂguiǂuihe. Tsî nē tsuxub ge ǃKhūb di ǃgôasib ǃoa hoaraga Israelǁîn xa mâ kurib hoaba nî tsēdīhe.

Pasxaǁâudīb xa hâ ǁgui-aidi

43 ǃKhūb ge Moseb tsî Aron hâkha ǃoa ge mî: “Nēdi ge Pasxaǁâudīb xa hâ ǁgui-aide: ǃHaokhoe-i xare-i ge Pasxaǂûs ǃnâ ǁhao tide, 44 xawe mâ khobob hîa mari-i ǀkha ǁamahe hâb hoab ge ǃgaoheb kas khaoǃgâ Pasxaǂûs ǃnâ a ǁhao ǁkhā. 45 ǃHaokhoe-i hîa sari hâ-i tamas ka io ǀkhupiǃgā-i tsîn ge Pasxaǂûsa mā-amhe tide. 46 ǁNā oms hîas ra Pasxaǂûsa aiǂhomiǃnâhes ǃnâ i ge hoaraga ǁkhaob tamas ka io piriroba nî ǂûhe tsî omsa xu ūǂuihe tide. ǂKhō-i xare-i tsîn ge khôahe tide. 47 Hoaraga ǀhûhâsib Israelǁîn dib ge nē Pasxaǁâudība nî tsēdī. 48 Tsî i ga ǃhaokhoe-i sadu ǁaegu ǁan hâ-e ǃKhūb di Pasxab ǃnâ a amǃnâxa ǂgao-o, a gu hoaraga aorekhoegu ǁnā omaris diga ǃgaohe. ǁNās khaoǃgâ gu ge Israelǁî-i khami Pasxaǂûs ǃnâ a ǁhao ǁkhā. 49 Nē ǁgui-aidi ge Israelǁîn tsî ǃhaokhoen, ǁîn ǁaegu ǁan hân tsîn hoan ai a sîsenxa.” 50 Hoaraga Israelǁîn ge ǃKhūb ge Moseb tsî Aron hâkha mîmā xūn hoana ǁnâuǀnam tsî ge dī. 51 ǁNā tsēs ǂûs aib ge ǃKhūba Israelǁîn hoana Egipteba xu ge ǂgaeǂguiǂui.