Moseb ǃnaes tsî kaikhâis
1 ǁNā ǁaeb ǃnâb ge khoeb hîa aboxab Levib ǃhaosa xu hâba ǁkhāti khoes hîa ǁkhā ǃhaos Levib disa xu hâsa taras ase ge ūbasen. 2 ǁÎs ge ǀgamǀkhā tsî axaroba ge ǁora. ǂUru, îsa axarob a ǃkhaisas ge mû, os ge ǁîba ǃnona ǁkhâga Egipteǁîna xu ge sâu. 3 Xawe ǁîbas ge ǃaruǀî sâu ǁoa, os ge ǂāgu ǀkha kurusa ǀharu-e ū tsî ǁgam-i ǂgâ tidese ter-i ǀkha ge ǂkhauǀkhā. ǁÎs ge axaroba ǁnā ǀharus ǃnâ ǂgā tsî Nylǃāb ammi ai gaxu ǂāgu ǁaegu sī ge mâi. 4 Tsî axarob di ǃgâsas ge ǃnūse mâ tsî tare-i ǁîb ǀkha nî īsa gere kō.
5 Gao-aob Faraob ôas ge ǁāsens nîse Nylǃāb ǁga ǁgôa, o di ge ǁîsa ge ǁnūsī ǃgāde ǃāb ammi ai gere ǃgûma. ǃNapetamases ge ǁîsa ǂāgu ǁaegu ǀharusa mû tsî ǃgādi ǀguisa ge sî ǀharusas sī nî ūse. 6 Tsî gao-aob ôas ge ǀharusas ge ǁkhowa-am, o axaroba ge mû. Tsî mû, nē axarob ge gere ā, os ge ǁîba kaise ǀkhom tsî ge mî: “Nēb ge Hebreǁî ǀgôaron di ǀguiba.”
7 Os ge ǁîb di ǃgâsasa gao-aob Faraob ôas ǃoa ge mî: “Hebreǁî khoes hîa axaroba nî daisiba sisa ta nî ǀkhī-ūba si ǃkhaisas ra ǂgao?”
8 Os ge Faraob ôasa ǁîs ǃoa “ǁNâi ǃgû re” ti ge mî. Tsîs ge ǀgôasa ǃgû tsî axarob di ǂhunuma îsa sī ge ǂgai. 9 Tsîs ge Faraob ôasa axarob di îs ǃoa ge mî: “Nē axaroba ū, îs daisikaikaiba te, ǁnās ǃaroma ta nî matare si xuige.” Os ge ǁîsa axaroba daisikaikais nîse ge ū. 10 Axarob ge kaiǂâu, os ge ǁîb îsa Faraob ôas, ǁîba ǁîs ôab ase ge ūs tawa ge sī-ū. ǁÎs ge ǁîs ǂûs ǃnâ “Tita ge ǁîba ǁgam-e xu ge ǂgaeǂui, ǁnā-amaga ta ge ǁîba Moseb ti nî ǀonǂgai” ti ge mî.
Moseb ge Midianǃhūb ǁga ra ǃhū
11 Tsî ǂgui kurigu khaoǃgâb ge Moseba kaikhâi, ob ge ǁîb ǂhunuma khoen, Hebreǁînab sī nî kōse gao-omma xu ǂoaxa tsî mâtin ǁkhōǁkhōsa sîsenga ra ǁgariǁnâ-aihe ǃkhaisa ge mû. ǁKhātib ge ǁîba Egipteǁîb mâti Hebreǁîb, Moseb khoen di ǀguiba ra ǂnau ǃkhaisa ge mû. 12 Moseb ge hoa ǀkhāgu ai kō tsî khoe-i xab kōhe tama ǃkhaisa mû, ob ge Egipteǁîba ǂnauǃan tsî ǁîb sorosa ǃhaese ǃhūb ǀkha ge ǁhanǂgan. 13 Sao ra tsēs aib ge ǂoaxa, ob ge ǀgam Hebreǁîkha ra ǃkham ǃkhaisa mû tsî ǁnāb, ǀhapixa ge iba ge dî: “Tare-i ǃaromats sa ǃgâsaba ra ǂnau?”
14 Ob ge khoeba ge ǃeream: “Tari-e satsa sikhoma ǀgoraǃgâs ǁkhāsiba go mā? Titats Egipteǁîbats go ǃgam khami ra ǃgam ǂgao?” Ob ge Moseba ǃao tsî ǁîb ǂûb ǃnâ ge ǂâi: “Khoen ge amab ǃnâ tare-e ta go dī ǃkhaisa a ǂan.” 15-16 Tsî Faraob ge tare-eb ge Moseba dī ǃkhaisa ǁnâu, ob ge ǁîbab nî ǃgamsa ge ôa-am. Xaweb ge Moseba Egipteba xu Midianǃhūb ǁga ǃhū tsî ǁnāpa sī ge ǁan.
ǀGuitsēb Moseba tsaus tawa ǂnôa hîa di ge hû ǀgôadi, Midianǃhūb pristeri, Jetrob dide ǁgûb ǀgoana ǁgam-e xuri tsî ǁgorogu ǃnâ nî ǁhōbase ge hā. 17 Xawe gu ge ǀnî ǃûi-aogu ǀgoana gere ǃûiga hā tsî Jetrob ôade tsausa xu ge ǁgaribē. Ob ge Moseba ǁîdeb nē ǃûi-aoga xu nî huise sī tsî ǁgam-e xuri, ǁgorogu ǃnâ ǁhō tsî ǁîdi ǀgoana ge āsi. 18 Tsî ǁîdi îb, Reueli tawa di ge oasī, ob ge ǁîba ǁîde ge dî: “Tare-i ǃaroma so nētsē ǁnāti ǃhaese go oaǀkhī?”
19 O di ge “Egipteǁî khoeb ge sise ǃûi-aogu di ǃomga xu huiǂui, tsî ǁkhāti ǁgam-e xuri tsî ǀgoana go āsiba” ti ge ǃeream.
20 Ob ge Jetroba ǁîde ge dî: “Ob kha ǁîba mâpa hâ? Tare-i ǃaroma so ǁîba ǁnāpa go ǁnāxū? ǃGû î ǁîba sī ǁkhau, îb sada ǀkha hā ǂûǀhao.”
21 Moseb ge ge māsen ǁnāpa Jetrob tsî ǁîb ôadi tsîn tawa ǁansa. Tsîb ge Jetroba ǁîb ôas Siporasa taras ase Moseba ge mā. 22 ǁÎs ge ǁae-i khaoǃgâ axaroba ge ǁora, ob ge Moseba ǁîb ǂûb ǃnâ ge mî: “Tita ge ǁîba Gersom ti nî ǀonǂgai, nē ǃhūb ǃnâ ta a ǃhaokhoe xui-ao.”
23 ǂGui kurigu khaoǃgâb ge Egipteb gao-aoba ge ǁō. Xawen ge Israelǁîna noxopa khobosis ǃnâ ǃgae tsî huib ǃaroma gere ǂgaiǂui. ǁÎn di ǂgaidommi ge Elob kōse ge sī. 24 Elob ge ǁîn di ǃgaesa ǁnâu tsî ǁîb di ǃgaeǀhaos Abrahammi, Isaki tsî Jakob hâgu ǀkhab ge dīsa ge ǂâihō. 25 Elob ge Israelǁîn khobosisa mû tsî ǁîn di mâsiba ge ǂan i.
© Khoekhoegowab Elobmîs © Bible Society in Namibia, 2020.
