Mordekaib di ǁnaetisa tama ǁhapos
1-3 [1-3] Mordekai ti ǀon hâ Jodeǁîb, Benjaminni ǃhaos dib ge Babilons gao-aob Nebukadnesari xa Jerusalemsa xu Judeab gao-aob Jekoniab ǀkha ǃkhōsis ǃnâ ge ūhe. Mordekaib ge Jairi ôa tsî Simeib tsî Kisi tsîkha di suriba xu ge hâ i. ǁÎb ge ǁnā ǁaeb ǃnâ Persiab di kaiǃās, Susas ǃnâ ge ǁan hâ i tsî kai gao-aob Artaxerxeb di gao-ommi ǃnâ mûmûsa ǂammâisase gere ǃoaba.
ǀGamǁî kurib kai gao-aob Artaxerxeb di ǂgaeǂguis dib di ǂguro tsēs Nisanǁkhâb dis aib ge Mordekaiba ǁhapo-e ge ūhâ i. 4 [4] ǁÎb ge ǁnāpa kai ǂkhupib tsî kai ǀgarusaǂâisib, ǀgaisa ǃgurub tsî ǃhūǂgubib kai gagasi sâoǃnâsib tsî ǃaoba ǃhūbaib ai ge ǃaromab tsîn xa ge ǁhapo. 5 [5] O kha ge ǀgam kai drakkha, nēb nî naub ǀkha ǃkhamse ǂhomisen hâse ge ǂkherexa. 6 [6] ǁÎkha ge ǃhuriǃhurisa ǀōba gere dī tsîdi ge hoaraga ǁaede Elob ǁaes, ǂhanu-ai khoen dis ǃoagu nî torodīse ge ǂhomisen. 7 [7] ǁNā tsēs ge ǃhūbaiba ǃkhaeb tsî ǃkhaenab, ǂhansens tsî ǃaob, ǁgâiǀāb tsî kai ǀhūsasib tsîna ge ǃkhōǂgāba hâ i. 8 [8] On ge hoa ǂhanu-ai khoen Elob dina ǂhansens tsî kai ǃaob, ǁîn ǀkha nî ǀgūǁaeb ǃnâ ī xūn dib tsîn ǃnâ ge hâ i. ǁÎn ge ǁōba ge aiǂhomisenba, 9 [9] xawen ge Elob ǃoa huib ǃaroma ge ǂgaiǂui. ǁHapos ǃnâs ge ǁîn ǀgoresa, kai ǃāb, ǂkhari ǀausa xu gere dâuǂoaxab ǀkha ge ǃereamhe. 10 [10] ǁGoa i ge tsîs ge soresa ǂoaxa on ge ǃgamǃgamsensa khoena ge ǀgaiǀgaihe tsî ǁîn di ǁîǃgôasen hâ khākhoena ge hîkākā.
11 [11] Mordekaib ge ǁîb di ǁhapos, ǁîs ǃnâb ge tare-eb Eloba ra ǀape ǃkhaisa mûsa xu ge ǂkhai. ǁÎb ge hoaraga tsēsa ǁîs xa gere ǂâiǂâisen tsî tare-es ra ǂâibasen ǃkhaisa gere ǁnâuǃā ǂgao.
Mordekaib ge gao-aob ûiba ra sâu
12 [12] ǀGuitsēb ge Mordekaiba gao-ommi omǂnamib, gao-aob ǂammâisakha hîa, ǁîb di ǂhunuma ǃoaba-aokha, Gabatab tsî Tarab hâkha xa gere ǃûiheb ǃnâb sâǁgoe hâ hîa, 13 [13] ǁîkha ǀapeǀhaosa ge ǁnâu. ǁÎb ge ǂōrisase ǁîkha gere mî xūna ǃgâ tsî ǁnā ǀgaub ai gao-aoba ǃgamsa kha ra ǀape ǃkhaisa ge ǁnâu. Mordekaib ge gao-aob Artaxerxeb ǃoa ǃgû tsî nē ǀgam khoekha ǀapeǀhaosa ǁîba ge mîba. 14 [14] Gao-aob ge ǁîkha ge dîǂuiǃnâ kai tsîkha ge ǁîkha ǀapesa kha ge ǁguiǁnâ, o ūbēhe tsî sī ge ǃgamhe.
15 [15] Gao-aob ge nē ge ī xūn nî ǂhanusi xoaǁguigu ǃnâ xoamâihe ǃkhaisa ge mîmā. Mordekaib tsîn ge ǁkhāti nē ge ī xūna ge xoamâi. 16 [16] Ob ge gao-aoba Mordekaiba gao-ommi danase ǁgaumâi tsî ǁîba dīb âb di mādawa-ams ase ǂgui ǀkhaexūna ge mā.
17 [17] Xawe Hamanni, Hamedatab ôab, Bougaiǁîb, gao-aob xa ge ǀgapiǃgôahe hâ ib ge Mordekaib tsî ǁîb khoen, Jodeǁîn tsîna gere tsûtsû ǂgao, Mordekaib ge ǁnā ǀgam ǂammâisakha, gao-aob dikha di ǁōba ǃaroma xui-ao.
1
Gao-aob Artaxerxeb di ǂûǁares
18-19 [1-2] Nē xūn ge gao-aob Artaxerxeb ge ǀguikaidisi tsî ǀgamdisihûǀa ǀkhariga Indiaba xu Etiopiab kōse, Persiab di kaiǃās, Susas ǃnâ hâ tronsa xu gere ǂgaeǂgui ǁaeb ǃnâ ge ī. 20 [3] ǃNonaǁî kurib ǁîb ǂgaeǂguis dib ǃnâb ge hoa ǀapemā-aogu, ǀnî ǀkharigu di ǂnûǁkhaeba-aogu, Persiab tsî Mediaba xu ge hā ǃgôaǃgôasa khoegu tsî ǀkharigu di gowoniagu ǃaroma ǂûǁare-e ge dī. 21 [4] Nēs khaoǃgâb ge ǃnani ǁkhâgu ǀgaiba, ǁîb ǃkhūsib di ǁgauǂui-e, ǂoaǂamsa tsî ǃgomǀgausa ǁâudīb ǀkha ge dī.
22 [5] Nē ǁâudīb ǀunis aib ge gao-aoba nau ǁaedi khoen, ǃās ǃnâ ge hâ ina ǂûǁare-e ge dība. Nē ǁâudīb ge ǃnani tsēdi ǀgaiba gao-ommi di omǂnamib, 23 [6] lapin tsî ǃapin ǀkha dīhe hâ mûǂuidaolapigu ǀkha anihe tsî ǂhoaǀapa tsurigu ǀkha ǀhaiǀuri tsî ǃhuniǀurirâidi hîa marmerǂkhâǃnâgu tsî ǀnî ǃgomǀgausa ǀuin ai ge ǃgaehe hâ in ǃnâ ge dīhe. Sâ-aikharogu, ǃhuniǀurib tsî ǀhaiǀurib ǀkha kuruhe hâgu ge ǃam tsî ǃuri marmerǀuigu tsî ǃgomǀgausa ǀuin ǀkha ǁguiǂuisa ǃkhaib ai, omǂnamib ǃnâ ge mâihe hâ i. ǁÎgu ge ǂgui ǃkharagaǃnâgu ǀûga ūhâ tsaura lapigu, amǃgâgu ai ge ǃkhāde ūhâ igu ǀkha ge ǀgâi-aisa i. 24 [7] ǁNāpa di ge ǃhuniǀuri tsî ǀhaiǀuri āǃnâxapade ge hâ i. ǁÎdi di ǀguis, ǀguiǀoadisi tongu ǀhaiǀurib xa ǃnāsa ǁkhāsiba ūhâ ǃgomǀgausa ǀuidi ǀkha ge anisa is ge khoen nî mûse ge ǁgauǂuihe hâ i. ǁNāpa i ge ǃnāsa, ǃgâi ǂauxûi-e gao-aob di ǂhunuma ǂauxûina xu ge hâ i. 25 [8] ǁNāpa i ge mâtikō ān ǀguin a māǂuihe ǁkhā ǃkhais di xoaǁgui-e ge hâ tama hâ i. Gao-aob ge gao-ommi sîsenaona ǁîb tsî ǁîb ǀkha ra ǁhao khoen tsîn ǂhâban hâs kōse nî ǂnâbahe ǃkhaisa ge mîmā.
26 [9] ǁKhā ǁaeb ǁkhāb ais ge gao-aos Astinsa tarekhoede ǁkhoaxa ǁâudī-e gao-ommi ǃnâ gere dība.
27 [10] Hûǁî tsēs ǁîb ǂûǁares dis aib ge gao-aoba ǃgâise gere tsâ, tsîb ge hû ǂammâisagu, ǁîb di ǂhunuma ǃoaba-aogu Hamanni, Basanni, Tarab, Boraseb, Satoltab, Abatasab tsî Tarabab tsîga ge ǂgai. 28 [11] ǁÎb ge ǁîga ge mîmā, î gu gao-aosa hā-ū, îb ǁîsa gao-aosi kronsa ǀgapa tsî ǂgaeǂgui-aon tsî ǁhao-aona, kaises ge îsa i xui-ao ǁgau. 29 [12] Xawes ge gao-aos Astinsa ǁnâuǀnamoǃnâ tsî ǂammâisagu, ǁîb ǂhunuma ǃoaba-aogu ǀkha ǀkhī ǂgao tama ge i. Nē ǃkhais ge gao-aoba taotao tsî ge ǁaixa kai.
30 [13] ǁÎb ge Astins ge ǃeream bi ǀgausa ǁîb ǀapemā-aoga mîba tsî ǁîga ge ǂgan, î gu ǂhanusi mûǂgāǀgaub ǃoa ǁîba tare-eb ǁîs ǀkha nî dī ǃkhaisa mîba. 31-32 [14-15] Arkesaeub, Sarsataeub, Maleseari tsî gowoniagu Persiab tsî Mediab digu, gao-aob ǀgūse ge hâ igu, ǁîb xōǀkhā ge ǀgapi ǃharodi ǃnâ ǂnôa igu ge ǁîb ǃoa hā tsî ǁîba tare-eb gao-aos Astins, ǁîb ge ǂammâisagu, ǁîb di ǂhunuma ǃoaba-aogu ǃnâ-ū mā mîmāsa ge ǁnâuǀnamoǃnâs ǀkha dī ǁkhā ǃkhaisa ge mîba.
33 [16] Gao-aob ge tare-es ge gao-aosa dī tsî ǁîba ǁnâuǀnamoǃnâ ǃkhaisa ǂamkhoegu tsî gowoniagu Persiab tsî Mediab digu tsîga ge mîba. Ob ge Mukaeuba gao-aob tsî Mediab tsî Persiab di gowoniagu ǃoa ge mî: “Gao-aos Astins ge sats ǀguits ose, xawe ǁkhāti sige hoage tsîna ge mîǁgaiǁgai. 34-35 [17-18] ǁÎs ge gao-aob Artaxerxeba ǁnâuǀnamoǃnâ ǃkhaisa di ga ǁnâu, o di ge Persiab tsî Mediab gowoniagu di taradi tsîna ǁîdi aoga nî ǁnâuǀnamoǃnâ. 36 [19] ǁNā-amaga Gao-aotse satsa iga ǃgâibao, gao-aosi mîmāsa māǂui, îs Astinsa tā tātsē ǁkhawa gao-aots aiǃâ hā. As nē ǃkhaisa Mediab tsî Persiab di ǂhanugu ǃnâ xoaǁguihe. Î ǁîs di gaosisa ǁîs ǃgâ-ai ǃgâi tarekhoesa mā. ǀNî ǀgau-i ge a ǀkhai. 37 [20] Sa mîmās ga hoaraga gaosib ǃnâ khoraǂuihe, os ge mâ taras hoasa ǁîs ǃgame-aoba nēsib ga ǃkhū tamas ka io ǀgâsa, xawes tsîna ǂhâbasa ǃgôasiba nî mā.”
38 [21] Gao-aob tsî gowoniagu tsîn ge nē mîdi xa ge ǃgâibahe tsîb ge gao-aoba Mukaeub ge mî khami ge dī. 39 [22] Gao-aob ge mâ gao-aosi ǀkharib hoab ǁga, ǁnā ǀkharib di gowab ǃnâ, mâ aob hoab ǁîb di oms ǂûs ǃnâ nî ǃgôahe, ti ra mî mîmāsa ge sîǂui.
© Khoekhoegowab Elobmîs © Bible Society in Namibia, 2020.
