Levitikus 18 - Khoekhoegowab New Translation 2020 (KKG20)

Mâ-amhe tama sorosi ǁgoe-ūgudi

1 ǃKhūb ge Moseba ge mîmā, 2 îb Israelǁîna “Tita ge ǃKhūta sadu Elota” ti mîba. 3 Tā Egipteb hîa du ge ǁanǃnâ hâ ib ǃnân gere dī khami dī, tsî ǁkhāti tā Kanaanǃhūb hîa du nî ǁanǃnâse ib ǃnân ra dī khami dī tsî ǁîn di ǁnaetiga sao. 4 Ti ǂhanugu tsî ǁgui-aidi tsîna ǁnâuǀnam. Tita ge ǃKhūta sadu Elota. 5 ǁNaetigu tsî ǂhanugu hîa ta ra mā tsina ǁnâuǀnam; ûihâhâts nîga. Tita ge ǃKhūta.

6 ǃKhūb ge sao ra ǁgaraga ge mîmā: Khoe-i xare-i ge ǁî-i di ǀaokhoe-i ǀkha sorosise ǁgoe tide. 7 Sa îb di taosib ǃaroma tā sa îb di taras ǀkha sorosise ǁgoe tsî ǁîs ona tā kai taosib ǃnâ mâi, sa îs a xuige. 8 Sa îb di taosib ǃaroma tā ǀnî ga hâ taradi sa îb didi ǀkha sorosise ǁgoe. 9 Tā sa ǃgâsas tamas ka io ǁnuriǃgâsas ǀkha sorosise ǁgoe, nēsis ga sa îb tamas ka io îs ǀkhāba xu, ǁgâus ǃnâ tamas ka io ǁgâus ǃauga ǃnae hâ xawe. 10 Tā sa ǀgôab tamas ka io ǀgôas di tare ôasas ǀkha sorosise ǁgoe, sa taosib ase ǀgui nî ī xuige. 11 Tā sa ǁnuriǃgâsas, sa îb ǀkhāba xu hâs ǀkha sorosise ǁgoe, ǁîs tsîn a sa ǃgâsa xuige. 12-13 Tā sa îb tamas ka io sa îs di ǃgâsas ǀkha sorosise ǁgoe. 14 Tā sa îb di ǃgâsab taras ǀkha sorosise ǁgoe, ǁîs a sa îb di ǃgâsab tara xuige. 15 Tā sa ôab di taras 16 tamas ka io sa ǃgâsab di taras ǀkha sorosise ǁgoe. 17 Tā tarekhoes sorosisets ra ǁgoe-ūs di ôas tamas ka io ôasas di ôas ǀkhas tsîna sorosise ǁgoe, ǁîra a ǁnā tarekhoes di ǀaokhoe xuige. Nēs ge kai taosib ase nî ī. 18 Tā sa taras a ûitsama hîa ǁîs di ǃgâsasa tarase ūbasen tsî ǁîs ǀkha sorosise ǁgoe.

19 Tā ǁkhâǀaesenna ūhâ tarekhoes ǀkha sorosise ǁgoe, ǁîs a ǃanuoǃnâ xuige. 20 Tā sa ǀgūkhoeb di taras ǀkha sorosise ǁgoe, ǁnās nî ǃanuoǃnâ kai tsi xuige. 21 Tā ǀgôan âts di ǀgui-e Moleka ǁguiba tsî ǁnās ǀkha ǃKhūb Elob di ǀonsa ǀuriǀuri. 22 Aorekhoeb ge ǀnî aorekhoeb ǀkha sorosise ǁgoe tide, nēs ui-uisa xui-ao. 23 Khoe-i xare-i ge ǀgoan ǀkha sorosise ǂharugu tide, nēs a taotaosa tsî ǃanuoǃnâ xui-ao.

24 Tā nē xūn di ǀgui-i ǀkha ǀuriǀurisen, Jodeǁî tama ǁaedi ǃKhūb ra sadu mûǁae sauruǂuidi gere ǁîn ǀkha ǀuriǀurisen khami. 25 ǁÎn ge ǃhūba ge ǀuriǀuri tsîb ge ǃKhūba ǁnā-amaga ǃhūba ǁnāti ra ǁkhara, ǁîb ǃnâ ǁan hâ khoen hoanab nî ǂharase. 26-27 ǁÎn ge nē ǁgaisi ûiga ǃaroma xui-aob ge ǃhūba ge ǃanuoǃnâ kaihe, ǁnā-amaga sado tā ǁnāti dī re. Israelǁîdu tsî sadu ǁaegu ǁan hâ ǃhaokhoen tsîdu hoadu ge ǃKhūb di ǂhanugu tsî mîmāde nî ǁnâuǀnam. 28 ǁNāsa du ga dī, ob ge ǃhūba ǀnai ge ǁnāpa ǁan hâ i ǁaedeb ge ǂhara khami ǂhara du tide. 29 ǀNai du a ǂanse, nēti ī ǁgaidīgu ǃnâ nî ǀhapixase hōsen khoe-i hoa-i ge ǃaruǀî Elob ǁaes di ǀgui-i ase ǃgôahe tide.

30 Ob ge ǃKhūba ge mî: “Ti mîmāde ǁnâuǀnam, î tā sadu aiǃâ ge nē ǃhūb ǃnâ ǁan hâ i khoen di ǁnaetiga sao, tsî sadu ǂûdo ǁnā ǁgaidīga dīs ǀkha ǃanuoǃnâ kaisen. Tita ge ǃKhūta sadu Elota.”