1 Korinteǁîn 9 - Khoekhoegowab New Translation 2020 (KKG20)

Apostel-i* di aiǂhanugu tsî ǁguiǂamdi

1 ǃNorasa tama ta hâ? Apostel tama ta hâ? Sada ǃKhūb Jesub Xristuba* ta mû tama hâ? Ti sîsenni ǃKhūb diba xu du kha sado hâ tama hâ? 2 Nauna ta apostelse ība tama, xawe ta ge sado apostelse ība, sadu ǃKhūb ǃnâ ti apostelsis di ǁgauǁgau xui-ao.

3 Ti ǃereams tita ra ǀgoraǃgân ǃoagu hâs ge a nē: 4 ǂÛs tsî ās di aiǂhanuba ge kha sige ūhâ tama hâ? 5 Aiǂhanuba ge kha ūhâ tama hâ, ǀnî apostelgu, ǃKhūb ǃgâsagu tsî Kefab tsîgu ra dī khami, ǂgomsabe tara-e sige daogu ai ūsaosa? 6 Tamas ka io tita tsî Barnabab hâkhom ǀguikhoma sîsenbasen khom nî ǃkhais di ǂhanuba ūhâ tama? 7 Tari-e torokhamao-i ase ǁî-i di ǂhunuma māǂuis ai ra ǃoaba? Tari-e draibeǃhanaba ǂgā tsî ǁîb di ǂûn xa ǂû tama? Tamas ka io tari-e ǀgoana ǃûi tsî ǁîn di dai-i xa ā tama?

8 Khoesi ǂâiǀgaub ǃoa ǀgui ta kha ǁîna ra mî? ǂHanub tsîna kha nē xūn ǁkhāna mî tama hâ? 9 Moseb ǂhanub* ǃnâ i kom “Tā ǃhoroba ra dāǃnâ-ūhe gomaba ǃgae-amǃgâ!” ti xoamâihe hâo. Gomagu ǃaromasa ǁnâi Elob ra ǂhansensa? 10 Xawe sige ǃaroma tamasa ǁînab ra mîsa? Ā, sige ǃaroma i kom xoahe hâo, ǃhūǃgao rab nî ǃâubasens ǀkha ǃhūǃgao tsîb dāǃnâ raba amǃnâxab nî ǃâubasens ǀkha ǁnāsa dīsa. 11 Sige ga gagasi ǃkhomna sadu ǃnâ tsoro, o kai xū-e sige ga sadu di ǃhūbaisi xūna xu ǃgaobaseno? 12 Naun ga ǁnā aiǂhanuba sadu ǂama ūhâo, sige ǁnâi ǁnās xa ǃnāsase ūhâ tama?

Xawe ge ge ǁnā ǂhanuba sîsenū tama hâ tsî ge ge hoana ra tani, ǂhanixū-i xare-e ge ǃGâiǂhôas Xristub disa dība tidese. 13 ǂAn tama du kha hâ ǁnān Tempelǃoabade ra dīn, Tempeli di ǂûna ra ǂû tsîn ǁnān altars tawa ra ǃoabana altars ai ra ǁguibahen ǃnâ ra amǃnâxa ǃkhaisa. 14 ǁNās ǁkhās khamib ge ǃKhūba ǃGâiǂhôas aoǁnâ-aona ǁîsa xun nî ûise ge ǁgaumâi.

15 Xawe ta ge tita nē aiǂhanugu di ǀguib tsîna sîsenū tama hâ. Tsî ta ge nē xūna tita ga dībahe ǂâibasens ǀkha xoa tama hâ. Ti ǂnīsasib nî khoe-i xa ǁaudīhes xas ge ǁō ta ga ǃkhaisa nî ǃgâi! 16 ǃGâiǂhôasa ta ra aoǁnâ ǃkhais ge tita koasens di aiǂhanuba mā tama hâ. ǁNāti dīs di ǁguiǂams ǃnaka ta hâ xui-ao. Tsî mâtikōse i nî tita tsūba ǃGâiǂhôasa ta ga aoǁnâ tama io. 17 Māsenxase ta ga ǁîsa dī, o ta ge mādawa-amsa ūhâ; xawe māsenxa tama ta ka i, ǃereams hîa ta ǂgomǃgâbahe hâs ǃnâ, 18 o tarebe mādawa-am-e ta ǁnâi ūhâ? Nēs ǀguis: ǃGâiǂhôasa aoǁnâsa ta marioǃnâse ra dī, ti ǂhanub ǃGâiǂhôas ǃnâ ta ūhâba ta ǀoasase sîsenū tidese.

19 Tita ge ǃnorasa tsî khoe-i di ǃgā tama hâ, xawe ta ge hoana ǃgāse ge ība, ǂguina ta nî Xristuba danbase. 20 Jodeǁîna ta ge Jodeǁî-i ase ge ība, ǁîna ta nî dan ǁkhāse; ǁnān Jodeǁî ǂhanub ǃnaka hâna ta ge ǂhanub ǃnaka hâ-i ase ība, (Jodeǁîn ǂhanub ǃnaka ta tita tsîna hâo tama) xawe ǁnān Jodeǁîn ǂhanub ǃnaka hâna ta nî dan ǁkhāse. 21 ǂHanub ose hâna ta ge ǂhanub ose hâ-i ase ība, (ǂhanub ose ta Elob aiǃâ hâ tama, xawe Xristub di ǂhanub ǃnâ ta hâ) ǂhanub ose hâna ta nî danse. 22 ǂKhabusana ta ge ǂkhabusa-i ase ība, ǂkhabusana ta nî danse. Hoana ta ge hoaraga xūn ase ība, mâ ǀgaus hoas ai ta nî ǀnîna ore ǁkhāse.

23 Nē xūn hoana ta ǃGâiǂhôas ǃaroma ra dī, ǁîs di ǀkhaeb ǃnâ ta nî amǃnâxase. 24 ǂAn tama du kha hâ, ǃkhoeǀnûgus ǃnân hoa ǃkhoe-aona ra ǃkhoe, xawe i ǀgui-i ǀgui-e dansa ra ǃkhōǃoa ǃkhaisa? ǁNāti ǁnâi ǃkhoe re, danao kai du nîse. 25 Tsî mâ-i hoa-i ǀnûgus ǃnâ ra ǁhao-i ge ǀgaisa ǃâisens ǃnâ ra amǃnâxa. ǁÎn ge nēsa ra dī, hâhâ tama dans kronsa nî ǃkhōǃoase, xawe sada ge ǀamo kronsa nî ǃkhōǃoa. 26 ǁNā-amaga ta ge îganǀgē rase ǃkhoe tama hâ, tsî ta ge ǂoab ǃnâ ra ǂnau ǃkhamaob khami ǃkham tama hâ. 27 Xawe ta ge ti sorosa ǀgaisase ǃâi tsî ra ǃgādī, î ta tita tā nauna ta ra aoǁnâba hîa, aoxūhesa anu.