Lukab 20 - Khoekhoegowab New Translation 2020 (KKG20)

Jesub ǁkhāsib xa hâ dîs

1 ǁKhawab Jesuba ǁnā tsēdi di ǀguis ai Tempeli ǃnâ ǁaesa ǁkhāǁkhā tsî ǃGâiǂhôasa ra aoǁnâba hîa gu ge danapristergu tsî Moseb ǂhanub* di ǁkhāǁkhā-aogu tsî ǂnomdomgu* tsîga ge hā, 2 tsî gu ge ǁîb ǃoa ge mî: “Mîba ge re, mâ ǁkhāsib ǀkhats nē xūna ra dī? Tari-e ǁnā ǁkhāsiba ge mā tsi?”

3 Ob ge ge ǃeream gu: “A ta tita tsîna xū-e dî go. Mîba te, 4 Johaneb di ǁāǁnâsa ǀhomma xus ra hā tamas ka io khoena xu?”

5 O gu ge ǁîǃnābe ge dîgutsoatsoa: “Tare-e ge nî mî? ‘ǀHomma xu’ ti ge ga mî, ob ge nî mî ‘O tare-i ǃaroma go ǁnâi Johaneba ge ǂgom tama hâ i?’ ti. 6 Xawe ge ga mî ‘Khoena xu’ os ge nē hoaraga ǁaesa nî ǀuiǁhom ge, Johaneb a kēbo-ao ǃkhaisan a ǂan amaga.” 7 O gu ge ge ǃeream: “ǀŪ ge a mâpa xus ra hā ǃkhaisa.”

8 Ob ge Jesuba ǁîgu ǃoa ge mî: “O ta tita tsîna mîba go tide, mâ ǁkhāsib ǀkha ta nēna ra dīsa.”

Draibeǃhanab di ǁamaǀkhupi-aogu xa hâ ǂkhōs*

(Mateub 21:33-46Markub 12:1-12)

9 ǃAruǀîb ge Jesuba nē ǂkhōsa khoena ge ǃhoaba: “Khoeba ge ge hâ i draibeǃhanaba ǂgā tsî ge ǁamaǀkhupi-aogu ai a ǀkhupiǂuiba, tsîb ge ǁnās khaoǃgâ ǂomxa ǁae-e ǁgâusa xu ge saribē. 10 Tsî draibena ǃgaos di ǁaeb ge ǀoa, ob ge ǃgāb âba ǁamaǀkhupi-aogu ǁga ge sî, ǁîb ǃâs hōǂgās disab ǁîgu tawa sī nî ūse. Xawe gu ge nē ǁamaǀkhupi-aoga ǃgāba ǂnau tsî ǀkhaiǃomse ge sî-oa. 11 ǀHonkhoeb ge ǁkhawa ǀnî ǃgāba ge sî, xawe gu ge nēb tsîna ǂnau, mîǁgaiǁgai tsî ǀkhaiǃomse ge sî-oa. 12 ǁKhawab ge ǃnonaǁî ǃgāba ge sî, o gu ge nē ǁamaǀkhupi-aoga ǁîb tsîna tsui tsî ge aoǂui. 13 Ob ge draibeǃhanab di ǀhonkhoeba ge mî: ‘Tare-e ta nî dī? Tita ge ti ǀnamǀnamsa ǀgôaba nî sî, amase gu kom ǁîba nî ǃaoǃgâo!’ 14 Xawe ǁamaǀkhupi-aogu ge mû bi gu geo, ǁîgu ǃnâ ‘Nēb ge ǀhonkhoeb ôaba. A ge ǃgam bi, os ge ǀumisa a sage di’ ti ge mî. 15 O gu ge draibeǃhanaba xu aoǂui bi tsî ge ǂnauǃan bi.

“Tare-eb ǁnâi draibeǃhanab di ǀhonkhoeba ǁîgu ǀkha nî dī?” tib ge Jesuba ge dî. 16 “ǁÎb ge hā tsî ǁnā ǁamaǀkhupi-aoga ǃgam tsî draibeǃhanaba ǀkhara ǁamaǀkhupi-aona nî mā.”

Tsî khoen ge nēsa a ǁnâu on ge “Tātsē, ǁnās ge ī tide” ti ge mî.

17 Ob ge Jesuba ǁîna kō tsî ge mî: “Tare-es ǁnâi nē Xoasa ra ǂâibasen?

“ ‘ǁNā ǀuib ǂnubi-aogu xa ge a ǂharaheb

ge ge danaǁhôaǀui kai.’

18 ǁNā ǀuib ai ga ǁnā-i hoa-i ge nî ǂkhū tsî ǁîb xa ga ǁnā-aihe-i hoa-i ge nî ǂkhūǂkhūhe.”

ǁGui-aimarina* matares xa hâ dîs

(Mateub 22:15-22Markub 12:13-17)

19 Moseb ǂhanub di ǁkhāǁkhā-aogu* tsî danapristergu tsîgu ge gere ǀapeǀhao, Jesuba ǃkhais ai ǃkhōsa, Jesub nē ǂkhōs ǀkha ǁîga gere ǂâibasen ǃkhaisa gu ge hōǃâ amaga, xawe gu ge ǁaesa gere ǃao. 20 ǁÎgu ge soa-e gere kō. Tsî gu ge ǂhanu-aidīsen gere ǃkhē-aoga ge sî, Jesuba gu dîdi ǀkha sī nî ǃnuise, î gu ǁîba danaǂgaeǂguis tsî Romeǁî ǂgaeǂgui-aob di ǁkhāsib ǃnâ māǁnâ. 21 Nē ǃkhē-aogu ge Jesub ǃoa ge mî: “ǁKhāǁkhā-aotse, sige ge mâtikōsets a ǂhauǃnâ ǃkhaisa a ǂan. Hoaraga khoenats ǀguitikōse ra mâi tsîts ǀkhā-e ǁhûi tama, xawets Elob daoba amab ǃnâ ra ǁkhāǁkhāsa. 22 Mîba ge re, ǂhanu i a Kaesara da nî ǁgui-aimarisa* matare ǃkhaisa, tamas ka io ǂhanu tama i hâ?”

23 Xaweb ge Jesuba ǁîgu di ǀgamaixasiba mû tsî ǁîgu ǃoa ge mî: 24 “Denarsa* ǁgau te. Tari-i di ai-īsib tsî ǂgaiǂamǀons tsîna ǁîs ai hâ?”

“Kaesari dis” ti gu ge ge ǃeream. 25 Ob ge Jesuba ǁîgu ǃoa ge mî: “O ǁnâi Kaesara ǁîb di-e mā tsî Eloba ǁîb di-e.”

26 ǁÎgu ge ǁaes mûǁae ǀgui mî-i xare-i ǀkha ge ǃkhō bi ǁoa i. Tsî gu ge nē ǃereamǀgaub xa burugâ hâse ge ǃnō.

ǁŌba xu khâis xa hâ dîs

(Mateub 22:23-33Markub 12:18-27)

27 ǀNî Sadusegu* hîa khoen ra ǁōba xu khâi ǃkhaisa gere ǂnoaǃoa gu ge Jesub tawa hā tsî ge mî. 28 “ǁKhāǁkhā-aotse, Moseb ge ge xoaba da: ‘ǀGôao aob ga ǁō, ob ge ǁîb di ǃgâsaba ǃoataras hîa go ǁōǃgauhesa ǃgame, ǀgôana hō tsî ǁîna ǃgâsaba nî kaikaiba.’ 29 Hû khoeǃgâgugu ge ge hâ i; hoagu xa a kaib ge ǃgame tsî ǀgôaose ge ǁō. 30 ǁKhātib ge ǀgamǁî ǃgâsab tsîna ǁîsa ūbasen tsî nē taras ǀkha ge ǃgame, 31 tsî ǁkhāti ǃnonaǁîb tsîna. Hoa hû ǃgâsagu ǀkhas ge ǁnāsa ge ī, hoagu ge ǀgôaose ge ǁō. 32 ǀUnis ais ge taras tsîna sī ge ǁō. 33 O mîba ge re ǁō hân khâis ǃnâ, tari-i di tara kais nî? Hoa hûgu kom ge ǃgame si hâ io.”

34 Ob ge Jesuba ǁîga ge ǃeream: “Nē ǁaeǃgâs ain ge khoena ra ǃgamegu, 35 xawe ǁnān, ǃgoaxaǁaeb tsî ǁōba xu khâis tsîna anu hâse ge hōhen ge ǁnāpa ǃaruǀî ǃgame tide. 36 ǁÎn ge ǀhomǃgān khami nî ī tsî ǁkhawa ǁō tide. ǁÎn ge a Elob ôa, ǁōba xun ge khâi amaga. 37 ǁŌ hân ge ûib ǃoa a khâi ǃkhaisab ge Moseba ge ǂhaiǂhai. ǂHubi ra ǁkhūhais di ǃnaeǃkhais ǃnâb ge ǃKhūba Abrahammi, Isaki tsî Jakob tsîgu di Elob ti ǂgaio. 38 Elob ge ǁō hân di Elo tamaba tsîb ge a ûitsaman di, hoan ra ǁîba ûiba xui-ao.”

39 ǀNî ǁkhāǁkhā-aogu Moseb ǂhanub digu ge ge mî: “ǃGâisets ge go ǃeream, ǁKhāǁkhā-aotse!” 40 Tsî gu ge ǃaruǀî ǁîba dî-e dîtsâ tama ge i.

Xristub* xa hâ dîs

(Mateub 22:41-46Markub 12:35-37)

41 Ob ge Jesuba ge dî gu: “Mâtin kha ǁîna Xristub a Davidi ôa ti ra mî? 42 Davidi ǂûb kom Psalmdi di ǂkhanis ǃnâ ra mîo,

“ ‘ǃKhūb ge ti ǃKhūb ǃoa ge mî:

ǂNû ti amǀkhāb ǁôab ai,

43 tita nî sa khākhoena sa ǂaiǃnaose dīs kōse.’

44 Davidi ge ‘ǃKhūb’ ti ra ǂgai bi; mâtib ǁnâi Xristuba nî Davidi ôa?”

Jesub ge Moseb ǂhanub di ǁkhāǁkhā-aogu ǃoagu ra ǃkhâikhom

(Mateub 23:1-36Markub 12:38-40)

45 Hoaraga ǁaes ǁîba ra ǃgâ hîab ge Jesuba ǁîb di ǁkhāǁkhāsabega* ge mîba: 46 “Moseb ǂhanub di ǁkhāǁkhā-aoga ǂanbasen re! ǁÎgu hîa gaxu saraga ǂgaeǂgā hâse ra ǃgûma, tsî ǁamaǂharuguǃkhaigu tawa khoen xa ǃgôasib ǃnâ tawedehes ǀguisa ǀnam, tsî sinagogegu* ǃnâ aisǀkhāb ai ǀgui ra ǂnû ǂgao tsî ǁâudīgu tawa ǂoaǂamsa ǂnûǃkhaide ǂhâba hâgu, 47 tao tamase ǃoataradi omde gāxaǃnâsib ǀkha ǀhana tsî mûhe nîse gaxu ǀgorede ra ǀgorega, ǁîgu kom kai ǀgoraǃgâsa anu hâo.”