Barnabab tsî Saulub tsîkha ge ǁhûihe tsî ra sîhe
1 Antioxias tawa hâ kerkheb ǃnâ gu ge ǀnî kēbo-aogu tsî ǁkhāǁkhā-aogu tsîna ge hâ i. ǁÎgu ge: Barnabab, Simeonni, “ǂNūkhoeb” tis tsîna gere ǂgaiheb, Lusiub Sireneǁîb, Manaenni hîa Herodeb Antipab ǀkha ge kaikaiǀhaoheb tsî Saulub hâga. 2 Tsî ganupe gu ǁîga ǃKhūba ǂûtama* hâs tsî ǀgores ǃnâ ra ǀgoreǀî hîab ge ǃAnu Gagaba “Saulub tsî Barnabab tsîkha tita ǁîkha ūba hâ sîsenni ǃaroma khai re” ti ge mî. 3 Tsî ǂûtama hâs tsî ǀgoredi khaoǃgâ gu ge aoga ǁîkha ǃomga ǁgui-ai tsî ge sîǂui.
Barnabab tsî Saulub tsîkha Siprus ǃnâ
4 Tsî kha ge Saulub tsî Barnabab tsîkha ǃAnu Gagab xa sîhe hâse Seleukias tawa sī tsî ǁnāpa xu Sipruǃnāǃnuis ǁga ge ǃgâu. 5 Tsî Salamis tawa kha ge sī, o kha ge Jodeǁîn sinagogegu tawa Elob di ǃGâiǂhôasa gere aoǁnâ. Johaneb, Markub tis tsîna gere ǂgaiheb ge ǁîkha ǀkha ge hâ i, ǁîkha nî huise.
6 Tsî gu ge ǃnāǃnuisa ǃgûǃnâ tsî Pafos tawa ge sī. Nēpa gu ge ǂanǂansa Jodeǁî ǃgaidī-aob Bar-Jesu ti ǀon hâb ǀkha ge ǀhao, Jodeǁîb hîa kēbo-aob a ti gere mîba. 7 ǁÎb ge Sergiub Paulub, ǁnā ǃnāǃnuis di ǀkharisi mûǂamaob, gā-ai ge ib ǀkha ge ǀhōgu hâ i. Tsîb ge nē ǀkharisi mûǂamaoba Barnabab tsî Saulub hâkha ge ǂgai, Elob di mîsab gere ǁnâu ǂgao xui-ao. 8 Ob ge Elimab, ǃgaidī-aoba (ǁîb di ǀons ge Grikegowab ǃnâ ǁnāti gere ǂâibasen) ǁîkha ge mâǃoa, ǀkharisi mûǂamaobab ge ǂgomsa xu gere ǁkhaebē ǂgao xui-ao.
9 Ob ge Saulub, Paulub tis tsîna ǂansaba ǃAnu Gagab xa ǀoa hâse ǃgaidī-aoba ǃoa mûra ǃnâ kō, 10 tsî ge mî: “Sa gāxaǃnâ, ǀhôagao tsî ǂhanu-aisiba ra mâǃoa ǁGâuab* ôatse, mâǁaets ǃKhūb di amaba ǂhumib ǃnâ ǀkharaǀkharasa nî ǀû? 11 Ob ge ǃKhūba nēsi ǁkharab di ǃommi ǁîb diba sats ai nî ūhâ tsîts ge ǁaeroba ǂgī tsî xū-i xare-e mû tide.” ǁNātimîsib ge ǃkhaeba ge ǁgoe-aiǃâ bi tsîb ge ge mûǀû. Ob ge ge ǀnāǀnāma, ǃkhōǁôa tsî nî ǂgaeǂgui bi khoe-e ra ôase. 12 Tsî ǀkharisi mûǂamaob ge tare-i go ī ǃkhaisa mû, ob ge ǂgom tsî kaise ge buru ǃKhūb di ǁkhāǁkhādi xa.
Paulub ge Antioxias tsî Pisidias tsîra ǃnâ ra aoǁnâ
13 On ge Paulub tsî ǁîb ǀkha ge hâ ina Pafosa xu doe-oms ǀkha Pamfilias ǁga ǃgâu tsî Pergas tawa ge sī. Tsîb ge Johaneb Markuba ǁnāpa xu Jerusalems ǁga ge oa. 14 Xawe kha ge Barnabab tsî Paulub tsîkha Pergasa xu Antioxias, Pisidiab dis tawa ge sī. Tsî kha ge Sabbattsēs* ai sinagogeb ǃnâ ǂgâ tsî ge ǂnû. 15 Moseb ǂhanub* tsî kēbo-aogu di xoade xu i ge khomaihes khaoǃgâ gu ge sinagogeb di ǂgaeǂgui-aoga ǁîkha nēti ge haisiba: “ǃGâsakho, ǂgaoǂgaoǃnâs mî-e kho ga khoena ūhâba, o kho ǃhoa re.”
16 Ob ge Pauluba khâimâ tsî ǁîna ǃnōǃnōs ǃaroma ǃommi âba ūkhâi tsî ge mî: “Israelǁîdo tsî sadu hîa Eloba ra ǃaoǃgâdo, ǃgâise du ǃgâ te re.”
17 “Israelǁîn di Elob ge sada aboxana ge ǁhûi tsî ǁîna ge kai ǁae kai, ǃhaokhoesen ge Egipteb ǃnâ hâ i ǁaeb ǃnâ. Tsîb ge ǁîb di ǀgaisa ǁôab ǀkha ǁîna khobosisa xu ge ǂgaeǂguiǂui. 18 Tsî hakadisi kurigu di ǁaebab ge ǁîba ǁîn ǀkha ge ǃnūǃnâxa i ǁîn ge ǃgaroǃhūb ǃnâ hâ i ǁaeb ai. 19 Tsîb ge hû ǁaedi Kanaanǃhūb ǃnâ ge hâ ide hîkākā tsî ǁîn di ǃhūba Israelsa ǀumis ase ge mā. 20 Tsîn ge nēn hoana hakakaidisi tsî korodisi kurigu di ǁaeb ǃnâ ge ī. ǁNās khaoǃgâ gu ge ǀgoraǃgâ-aoga kēbo-aob Samueli nî hās kōse ge ǂgaeǂgui. 21 Tsî khoen ge gao-ao-e ǂgan, ob ge Eloba ǁîna Sauli, Kisi di ôab, Benjaminni ǃhaosa xu hâba ge mā, hakadisi kuriga ge ǂgaeǂguiba. 22 Xaweb ge Eloba ǁîba gao-aosisa xu ūǁnâ tsî Davidi hîab ge ǁîb xa nēti mîb ǀkha ge ǃkhōǃkhuni: ‘Isaib ôab Davidi ge kaise ti ǂgaob ǃoa hâ tsî mî ta ga xū-i hoa-e nî dī.’
23 “Tsî gao-aob Davidi suriba xus ge Elob ge Jesuba ǁnā mîmâisa ǃGâiǃōdī-aob Israelǁîn dib ase ǀkhī-ūsa. 24 Xawe ǁîb nî hās aiǃâb ge Johaneb ǁĀǁnâ-aoba hoaraga khoen Israeli ǃnâ hân nî ǁîn di tsū daoga xu ûib âna ǃKhūb ǃoa dawa tsî ǁāǁnâhe ǃkhaisa gere aoǁnâ. 25 ǁNā-amagab ge Johaneba ǁîb di sîǂuis sîsenni ǀkhab ge toa, o ‘Tita a Xristu ti du kha ǂâi hâ?’ ti ge dî gu. Tsîb ge ǃaruǀî ge mî: ‘Tātse, xaweb ge ǁîba ǃhaese nî hā, ǁîb di ǀkhapudi ǃhâuroga xores tsîna ta anu tamaba.’
26 “Sago, Abrahammi di ôago tsî sadu eloǃaoǃgâxa Jodeǁî tamado, sada hoada ǃoas ge nē mîs ǃgâiǃōsib disa ge sîhe. 27 Jerusalems di ǁanǂgāsaben tsî ǁîn di danaǂgaeǂgui-aogu tsîn ge Jesuba ge mûǂan tama hâ i, tsîn ge ǁkhāti Sabbattsēkorobe gere khomaihe kēbode ge ǁnâuǃā tama hâ i. Xawen ge ǁnā kēbodi nî dīǀoaǀoahese ǁîba ǁōb ǃoa ge ǀgoraǃgâ. 28 Tsî ǁîb ǃoagun ge ǀhapiǂgā-amūn nî xū-e ūhâ tama hâ i, xawen ge Pilatuba ǁîbab nî ǃgam ǃkhaisa ge ǂgan.
29 “Tsî kēbodi ǁîb di ǁōb xa hâdi ge dīǀoaǀoahes khaoǃgân ge ǁîba ǃgâuhaiba* xu ūǁnâ tsî ǀhobas ǃnâ ge ǁgui. 30 Xaweb ge Eloba ǁîba ǁōba xu ge ūkhâi. 31 Tsîb ge ǂgui tsēde ǁîb di saoǃgonaon ǁîb ǀkha ge Galileaba xu Jerusalems ǁga ǃgûn ai ge ǂhai. ǁÎn ge nēsi ǁîb xa khoen tawa ra ǃkhō-am.
32 “O khom ge nētsē tita tsî Barnabab hâkhoma nē ǃGâiǂhôasa sado ra hā-ūba. Elob ge sada di aboxaga mîmâiba hâ i mîmâis ge dīǀoaǀoahe ǃkhais, 33 Elob ge Jesuba ǁōba xu ûib ǃoa ūkhâis disa. Tsî i ge ǀgamǁî Psalms ǃnâ nēti xoasa:
“ ‘Sats ge a ti Ôa,
nētsē ta ge go sa Î kai.’
34 Elob ge Jesuba ǁōba xu ûib ǃoa, ǁkhawab ǁō tidese ūkhâis xa nēti Xoas ǃnâ ra mî:
‘Davidi di ǃanu tsî
ǂgomǂgomsa ǀkhaega ta nî mā du.’
35 Xawes ge ǁkhāti ǀnî Psalmsa kaise ǃgāsase ra xoa:
‘Sats ge mā-am tide sa ǃAnub nî ǀhobas ǃnâ ǁgao ǃkhaisa.’
36 Xawes ge nēsa Davidi xa mî tama hâ, ǁîb tsîn ge ǁkhāti ǁîb di aboxagu xa ǁkhōheba, ǁîb ge Elob di ǂâis ǃoab ge ǃoabatoa tsî ǁōs khaoǃgâ, ǁō tsî ge ǁkhōhe tsîs ge soros âba ǁgaoǁgaosiba mû xui-ao. 37 Tātsē, nēs ge ǀnî khoe-i Elob xa ge ǁōba xu a ūkhâihe tsîs ge soros â-e ǁgaoǁgaosiba mû tama i-i xa ra mî.
38 “O nēsi ǃgâise ǃgâ re ti ǃgâsado! Jesub ǃnâ-us ge ores tsî ǁoren ǀûbas di ǂhôas nî aoǁnâhesa. 39 Tsî ǁîb ǃnâ ra ǂgom-i hoa-i ge Elob ǀkha ǂhanu-ai kaihe hâ, xawe Moseb di ǂHanub ge ǁnāsa a ī ǁkhā kai ǁoa. 40 O ǂanbasen re, î di kēbode tā sadu ǀkha ī. Nēti xoahe hâ amaga:
41 “ ‘Kō, sa ǃhō-aodo,
burugâ î du ǁō!
Nētsē ta ra dī-i ge
sadu xa ǂgomhe tide xū-e
khoe-i xa du ka ǃhoabahe xawe!’ ”
42 Tsî Paulub tsî Barnabab tsîkha ge ǁnā tsē ǁnā sinagogeba xu ǂoa, on ge khoena ǁkhawa kha nî sao ra Sabbattsē oahā tsî nē xūn xa ǃhoase gere ǀkhoma kha. 43 Tsî sinagogeb ǀhaos ge toa, on ge ǂgui Jodeǁîn tsî eloǃaoǃgâxa Jodeǁî taman* hîa Jodeǁî ǂgoms ǃoa ge ǃhobasenna Paulub tsî Barnabab hâkha ge sao. O kha ge ǁîkha ǁîn ǁga “Elob di ǀkhommi ǃnâ ǂgomǂgomsase hâhâ re” ti ge ǂgan.
44 Tsî sao ra Sabbattsēn ge ǁaubexa hoaraga ǃās di khoena ge ǀhao ǃKhūb di mîsa nî ǁnâuse. 45 Tsî Jodeǁî ǂgaeǂgui-aogu ge nē kai ǂnubis di khoena gu ge mû, o surib xa ǀoa tsî Paulub gere mîna mâǃoa tsî ǁîba gere ǃkhāǃkhā.
46 O kha ge Paulub tsî Barnabab tsîkha ǁkhoase ge mî: “ǂGuros nē ǃGâiǂhôas Elob disa Jodeǁîdo nî māhe ǃkhais ge ge ǂhâbasa i. Xawe du ge sado ǀamo ûiba anu tamase ǃgôasen tsî ǁîsa ge ǂhara, o khom ge Jodeǁî taman ǃoa ra ǃgû. 47 Nētib ge ǃKhūba mîmā khom amaga:
“ ‘Jodeǁî taman di ǃnâse ta ge ge mâi tsi,
hoaraga ǃhūbaib nî orehese.’ ”
48 Tsîn ge Jodeǁî tamana nēsan ge ǁnâu, o ǃKhūba ǁîb di ǂhôas ǃaroma kaise ge koa; tsîn ge ǁnān ǀamo ûib ǃaroma ǂgaimâisana ǃKhūb ǃnâ ge ǂgom. 49 Tsîs ge ǃKhūb di ǃGâiǂhôasa hoaraga ǀkharib ǃnâ ge khoraǂuisen.
50 O gu ge Jodeǁî ǂgaeǂgui-aoga kaise ǀgapiǃgôasa tsî eloǃaoǃgâxa tarekhoedi tsî ǃās di ǂammâisagu tsîna Paulub tsî Barnabab tsîkha ǃoagu ge khâikhâiǃnâ, ǁîkhan nî ǃāsa xu ǁgariǂuise. 51 O kha ge ǁîn ǃoagu tsaraba ǂaidi âkha xu ǃgubuǁnâ tsî Ikoniums ǁga ge ǃgû. 52 Tsîn ge ǂgomsabena kai ǃgâiaǂgaob tsî ǃAnu Gagab tsîn xa ge ǀoa.
© Khoekhoegowab Elobmîs © Bible Society in Namibia, 2020.
