Sauli ge Filisteǁîn ǃoagu ra torodī
1 ǃNonadisi kurixab a hîab ge Saula ge gao-ao kai. Tsîb ge ǀgam kurikhab Israeli ǂama a gao-ao 2 hîa ǃnonaǀoadisi khoega Israela xu ge ǁhûiǂuibasen. ǀGamǀoadisigu ge ǁîb ǀkha Mikmas tawa, tsî ǃnâuxa ǀkharib Betels dib ǃnâ ge hâ i; tsî ǀguiǀoadisi gu ge ǁîb ôab Jonatanni ǀkha Gibeas, Benjaminni ǀkharib dis ǃnâ ge hâ i. ǃGau ge khoegab ge Saula omdi âgu ǁga ge sî-oa.
3 Jonatanni ge Filisteǁîn di toroǃnans ǂgaeǂgui-aoba Gebas tawa a ǃgam ǃkhaisan ge Filisteǁîn hoana ge ǁnâu. Ob ge Saula hoaraga ǃhūb ǃnâ xâiǁnâsa ge xâi kai, Hebreǁîgab torob ǃoa nî ǂgaikhâiga. 4 Israelǁaes hoas ge Sauli ge Filisteǁîn toroǃnans di ǃkhōdana-aoba a ǃgam tsîn ge Israelǁîna Filisteǁîn tawa ǁkhan kaisen ǃkhaisa a ǁnâu, o gu ge toroǃkhamaoga Sauli tawa Gilgals ǃnâ ge ǂgaiǀhaohe.
5 Filisteǁîgu ge Israeli ǃoagu gu nî ǃkhamga ge ǀhaoǀhaosen: ǃNonadisiǀoadisi torokunidi, ǃnaniǀoadisi hāǃgapi-aogu tsî huri-ammi di ǃhūb kōse ǂgui toroǃkhamaogu tsîn ǀkha. ǁÎgu ge ǃgû tsî Mikmas tawa Bet-Avens aiǂoas ǃnâ sī hâǃkhaiba ge ǂnaumâibasen. 6 Israelǁîn ge mû ǂōǂōsib ǃnân hâsa, ǁkhaeǂgāhen ge hâ i xui-ao, on ge ǁhoagu, ǃgam ǃkhaidi, ǃgareǀuigu, āgu tsî ǀkhaiǃnâ tsaugu ǃnâ sī ge gaugausen. 7 ǀNî Hebreǁîn ge Jordanǃāba ǃgâu tsî Gadǀkharib tsî Gileadǀkharib tsîkha ǃoa ge ǃgû.
Sauli ge ganupe Gilgals tawa ge hâ i tsî toroǂnubis ǁîb tawa hâs hoas ge kaise gere ǃao. 8 ǁÎb ge hû tsēdi kōse Samuela ge ǃâu, Samueli ge mîmā bi hâ i khami, xaweb ge Samuela Gilgals tawa hā tama ge i. Tsî khoegu ge ǁîba xu ǃgûbētsoatsoa, 9 ob ge Saula ǁîgu ǃoa ge mî: “Khauǁguibadi tsî ǂkhîbagusǁguibadi tsîna hā-ūba te.” Tsîb ge aitsama khauǁguibasa ge ǁguiba. 10 Tsî ǁguibatoab ra hîab ge Samuela ge hā, ob ge Saula ǁîba ǃoa ge ǂoa, ǁîbab nî tawedega. 11 Xaweb ge Samuela ge dî: “Tare-ets go dī?”
Ob ge Saula ge ǃeream: “Khoegu ge tita xu go ǃgûbētsoatsoa, satsa hāts nî tits go mî hâ i ǁaeb ai hā tama i tsî gu Filisteǁîga Mikmas tawa ra ǀhaoǀhaosen ǃkhaisa ta go mû, 12 o ta ge go ǂâi: ‘Filisteǁîgu ge nēsi Gilgals tawa ǃKhūba ta noxopa ǁguibasa ǁguiba tama hîa nî ǁgôaxaǃgâ te.’ O ta ge aitsama khauǁguibasa ǁguibas ǃoa go ǁgarihe.”
13 Ob ge Samuela Sauli ǃoa ge mî: “Gâresets ge go dī. ǃKhūb sa Elob di mîmāsats ge ǁnâuǀnam tama go i. ǃKhūb sa Elob di mîmās, ǁîb ge mā tsisats ga ǁnâuǀnam hâ, ob ge ǃKhūba sats tsî sa ôananôagub tsîna ǀamos kōse Israeli ǂama ga gao kai hâ. 14 Xawe nēsis ge gaosis âtsa hâhâ tide. ǃKhūb ge ǁîb ǂâis ǃoa hâ khoeba nî ôabasen. ǃKhūb ge ǁîba ǁaes âb ǂama gao-aose nî mâi, ǃKhūb ge mîmā tsinats go ǁnâuǀnam tama i amaga.”
15 Ob ge Samuela Gilgalsa xu Gebas, Benjaminni ǀkharib ǃnâ ǂnôas ǃoa ge ǃgû. Tsî Sauli ge khoegu ǁîb tawa hâga ǃgôa, o gu ge ge ǃnanikaidisi i. 16 Sauli tsî ǁîb ôab Jonatanni tsî ǁîkha di khoegu tsîn ge Gibeas Benjaminni ǀkharib dis ǃnâ ge hâ i, xawe Filisteǁîgu ge noxopa Mikmas tawa ge hâ i. 17 Filisteǁîn toroǃkhamaogu ge ǃnona ǃnandi ǃnâ Filisteǁîn di toroǂnubisa xu ǂkhôadī gu nîse ge ǃgûǂoa. ǀGui ǃnans ge ǀapasǀkhāb ǀkhāb ai, Ofras Sualǀkharib dis ǁga ge ǃgû. 18 ǀGamǁîs ge huriǂoasǀî Bet-Horons ǁga ge ī, tsî naus ge aiǂoasǀî Seboims ǃgoaǃnāb ai ra kōǁgôa ǀgapibǀî, ǃgaroǃhūb ǁga ge ǃgû.
19 ǀUrikuru-ao-i xare-i ge Israeli hoab ǃnâ ge ǀkhai i, Filisteǁîn ge Hebreǁîn nî gôagu tsî ǁhâigôagu tsîna dībasen ǃkhaisa ǂgao tama hâ i xui-ao. 20 ǁNā-amagan ge Israelǁîn hoana Filisteǁîn ǃoa ǀgui gere ǃgû, ǁîn di ǃhūǃgao-ūdadi kas, ǃkhā-ūxūn kas, ǃōdi kas, ǃgao-ūxūn kas hoasan nî ǀāǀābahese. 21 ǁÎn ge ǀgui ǂkhari marirosa ǃōde ǀāǀābahes ǃaroma gere matare tsî ǀgam marira ǃhūǃgao-ūdadi tsî pekhegu tsîna ǀāǀābahes ǃaroma. 22 ǁNā-amaga gu ge Filisteǁîn ǃoagu hâ torob ge tsoatsoa, o Sauli tsî Jonatanni tsîkha tawa hâ khoegu di ǀguib xaweba gôa-i kas, ǁhâigôa-i kas hoasa ge ūhâ tama hâ i. Sauli tsî ǁîb ôab Jonatanni tsîkha ǀguikha ge ǁîna ge ūhâ i.
23 Filisteǁîn ge ǀnî toroǃkhamaogu âna ǂōǃgâu-ams Mikmas dis ǁga ge sî, ǁîsa gu nî ǁkhaubase.
© Khoekhoegowab Elobmîs © Bible Society in Namibia, 2020.
