ǃKhūb hās di mîmâis
1 ǀNamsabedo, nēs ge ǀgamǁî sîǂkhanis sado ta ra xoabasa tsî ta ge ǁîra hoara ǃnâ sadu ǂhauǃnâ ǂâisa ra ǂkhaiǂkhai. 2 ǁNā mîdi ǃanu kēbo-aogu xa aiǃâ gere ǃhoahedi tsî mîmās ǃKhūb tsî ǃGâiǃōdī-aob sadu dib tsî apostelga* xu hâsa du nî ǂâis ǃnâ ūhâ ǃkhaisa. 3 Î ǂguro nēsa ǂan, ǀuni tsēdi ain nî ǃhō-aona hāsa, ǃhō rase ǁîn di turagu ǂûgu ǃoa ûi 4 tsî nî mîna: “Mâpas kha mîmâis ǁîb hās disa hâ? Aboxagu ge ǁō tsēsa xun kom xūn hoana kurus di tsoatsoasa xun ge ī i khami ǀgui hâo.” 5 Xawen ge ǂanapega ra ǀuru ǂgao, ǀhommi ge hūgasa xu hâ i tsî ǃhūbaib ge ǁgamma xu kuruhe tsî ǁgammi ǃnâ hâ i ǃkhaisa, Elob di mîsa xu. 6 Tsîb ge ǃhūbai ge iba ǁgammi xa dâuǂamhe tsî ge kā, 7 xawe nēsi hâ ǀhommi tsî ǃhūbaib tsîkha ge ǁkhā mîsa xu ge ǁguibēhe tsî ǀaesa ra sâubahe, ǀgoraǃgâtsēs tsî hîkākāhes eloxoresa khoen dis kōse.
8 ǀNamsabedo, tā nē ǀgui ǃkhaisa ǀuru, ǀgui tsēs ǃKhūb tawa ǀoadisi kurigu khami ī tsî gu ǀoadisi kuriga ǀgui tsēs khami īsa. 9 ǃKhūb ge ǁîb di mîmâis ǀkha ǀhabe tama, ǀnîn ra ǂâi khami tsîb ge a ǃnūǃnâxaba du tsî khoe-i nî kāǁō ǃkhaisa ǂgao tama hâ, xawe hoan nî ǃhobasensa. 10 Xawes ge ǃKhūb di Tsēsa ǃnari-ao-i khami nî hā. ǀHomma kai ǂkhupib ǀkha ǃgû-ī tsîn ge hoana khauǃkhūhe tsî nî hîkākāhe. Tsîb ge ǃhūbaiba ǁîb ai hâ sîsengu hoagu ǀkha nî khauǃkhūhe. 11 Tsî nē xūn hoan ga hîkākāheo, tarebe khoeǃnôado nî ī? Sadu ge ǃanu tanisens tsî eloǃaoǃgâxasib ǃnâ nî ûi. 12 Elob hās di tsēsa du ǃâu hâ tsî ra ǃnoeaǂgaoba, ǁîs aib ǀhomma ǂhubiǂuihe tsî ǀaes xa nî hîkākāhes tsîn hoa xūna nî tsunisa. 13 Xawe da ge ǀasa ǀhommi tsî ǀasa ǃhūbaib tsîkha, hîab ǂhanu-aisiba ǁanǃnâ hâkha ǁîb di mîmâis ǃoa ra ǃâubasen.
14 ǁNā-amaga, ǀnamsabedo, nēna du ǃâu hâ ǁaeb ǃnâ ǀaexa, ǂnao-ose tsî ūose tsî Elob ǀkha ǂkhîb ǃnâ hōhesa. 15 Î du sada ǃKhūb di ǃnūǃnâxasiba ǃgâiǃōsib di ǃēs ase mû, Paulub sada di ǀnamsa ǃgâsab ge ǁkhāti ǁîb xab ge māhe hâ i gā-aisiba xu sado xoaba khami. 16 ǁÎb di sîǂkhanidi hoadi ǃnâb nē xūn xa ra ǃhoa. ǁÎdi ǃnân ge ǀnî xūna ǁnâuǃās ǃaroma a ǃgom, ǀū an tsî supuǂâixan tsîn ǂhanu tamase ra mîǃāna, ǁnās ǁkhās xase nau Xoadi tsîna ǁîn di hîkākās ǃoa.
17 ǁNā-amaga ǀnamsabedo, nēsa du ǀnai a ǂan amaga ǂanbasen, î du tā dīsās ǀkha ǂhanuo khoen xa ǂgaeǂhapuhe, î tā sadu ǁaposa mâǃkhaisa xu ǁnā, 18 xawe ǀomkhâi sada ǃKhūb tsî ǃGâiǃōdī-aob, Jesub Xristub di ǀkhommi tsî ǂans tsîra ǃnâ. Ab ǁîba ǂkhaisiba ūhâ nēsi tsî ǀamosib tsēs kōse. Amen.*
© Khoekhoegowab Elobmîs © Bible Society in Namibia, 2020.
