Levitikus 11 - Khoekhoegowab New Translation 2020 (KKG20)

ǂÛhe ǁkhā ǀgoan tsî xamarin

1 ǃKhūb ge Moseb tsî Aronni tsîkha ge mîmā, 2 î kha Israelǁîna mîba, în ǃhūbaib ai hâ ûitsama xamarina xu 3 hoaragase ǀgorasa ǁkhorade ūhâ tsî ǁgaeǃgâ ra xamarin ǀguina ǂû. 4-6 Xawen ge ǃnain, ǃâun tsî ǃôan tsîna ǂû tide. ǁÎn ge ǃanuoǃnâse nî ǃgapaǀîhe; ǁîn ge ra ǁgaeǃgâ xawe ǀgorasa ǁkhorade ūhâ tama hâ. 7 Hāgūn ge hoaragase ǀgorasa ǁkhorade ūhâ, xawe ǁgaeǃgâ tama hâ, ǁnā-amagan ge ǃanuoǃnâse ǃgapaǀîhe tsî ǂûhe tide. 8 Tā ǁîn di ǁgan-i xa ǂû tamas ka io ǁîn di ǁō hâ sorode tsâǀkhā, ǁîn a ǃanuoǃnâ xuige.

9 Hoaraga ǁaun ǁgamgu ǃnâ hân hîa ǀgaregu tsî khōǂhawiroga ūhân hoana du ge a ǂû ǁkhā, 10 xawe ǁnān hîa ǁgamgu ǃnâ hân, xawe ǀgaregu tsî khōǂhawirogu tsîna ūhâ tamana du ge ǂû tide. 11 Tā ǁîna ǂû tamas ka io ǁîn di ǁō hâ sorode tsâǀkhā, ǁîn a ǃanuoǃnâ xuige. 12 Hoaraga xamarin ǁgamgu ǃnâ ra hân, xawe ǀgaregu tsî khōǂhawirogu tsîna ūhâ taman ge sadu ǃaroma a ǃanuoǃnâ.

13-19 ǁGaboga ūhâ anin hoan ǃnân ge sao ra anina ǂûhe tide: ǃAriǃkhān, ǀhonon, ǀaun, ǀauǃnôan; kai-anin, goraǃnôan; ǀamin; huri-anin, oefaran, reirǃnôan, ǀēdeharan, ǃuriǁkhain; ǁnūren; tamas ka io surutsiǃguben tsîna.

20 ǁGaboxa xoxon hoan ge a ǃanuoǃnâ, 21 xawe ǃae ra, ǀnūxa xoxon ose. 22 ǁÎn ge a ǂûhe ǁkhā: ǂHomǃnôan tsî ǀkhiniben tsîna. 23 Xawe nau ǁgaboxa tsî ǂhana ra xoxon hoan ge ǃanuoǃnâse nî ǃgapaǀîhe.

24-28 Sao ra ǀgurun di ǁō hâ sorode ga tsâǀkhā khoe-i hoa-i ge hoaraga tsēsa nî ǃanuoǃnâ: ǁKhoraxa ǀgurun hoan, ǀgorasa ǁkhorade ūhân tsî ǁgaeǃgâ ran ose. ǁKhātin ge hakaǂaixa ǀgurun hîa ǁkhorade ūhâ tamana a ǃanuoǃnâ. ǁÎn di ǁō hâ ǁgan-e ga tani khoe-i hoa-i ge ǁî-i sarana nî ǁā, xawe i ge ǁnāti ī khoe-e ǁnā tsēs hoasa a ǃanuoǃnâ.

29-30 Tsuxudurun, durun tsî ǂnobon tsîn hoan ge ǃanuoǃnâse nî ǃgapaǀîhe. 31 ǁÎn ge a ǃanuoǃnâ tsî ǁîn di ǁō hâ sorode ga tsâǀkhā-i hoa-i ge hoaraga tsēsa a ǃanuoǃnâ. 32 Xū-i hîa ga nē ǁō hâ duru-i tamas ka io ǂnobo-i xa ǁnā-aihe-i hoa-i ge a ǃanuoǃnâ, nēsi i ka hais, ǃnaos, saraǃâs, ǃhâuǃâs tamas ka io ǀnîǃnôa xūs hoasa. ǁÎ-i ge ǁgam-i ǃnâ nî ǀharihe, xawe i ge hoaraga tsēsa nî ǃanuoǃnâ tsî ǁnās khaoǃgâ ǀgui ǃanu-i ase nî ǃgapaǀîhe. 33 Nē duru-i tamas ka io ǂnobo-i ga ǂgoasū-i ǃnâ a ǁnā, os ge ǁnā sūs tsî ǁîs ǃnâ hâ ǂû-i tsîna a ǃanuoǃnâ. ǁNā sūs ge nî khôaǃāhe. 34 ǂÛ-i ǁnāti ī sūs ǃnâ hâ ǁgam-i ǀkha ra ǂnâ-aihe-i tsî āhe ǁkhā xū-i ǁnāti ī sūs ǃnâ hâ-i tsîn hoan ge ǃanuoǃnâse nî ǃgapaǀîhe. 35 Xū-i hîa-i ga ǁnāti ī ǁō hâ duru-i tamas ka io ǂnobo-i xa a ǁnā-aihe-i hoa-i, nēsi i ka ǁganom tamas ka io ǂgoaǁganom xawe, ǁî-i ge a ǃanuoǃnâ. ǁÎ-i ge nî khôaǃāhe tsî ǃanuoǃnâse nî ǃgapaǀîhe. 36 Xawe xoras tamas ka io tsaus ge ǃanus ase nî ǃgapaǀîhe ǁî-i ga ǁnāpa ǁnāǂgâ xawe; ǁî-i ǁō hâ soro-e ga tsâǀkhā khoe-i hoa-i a ǃanuoǃnâ hîa. 37 Duru-i tamas ka io ǂnobo-i ga ǃhanahe nîse ī ǃkhomn ai a ǁnā, xawen ge ǁnā ǃkhomna ǃanun ase nî ǃgapaǀîhe. 38 Xawe i ga ǁî-e ǁgam-i ǃnâ hâ ǃkhomn ǃnâ ǁnā, on ge ǁîna ǃanuoǃnâse nî ǃgapaǀîhe.

39 Mâ xamari-i tamas ka io ǀguru-i hîa i khoe-e ǂûsa mā-amhe hâ-i ga ǁō, o-i ge ǁî-i di ǁō hâ sorosa ga tsâǀkhā-e, hoaraga tsēsa nî ǃanuoǃnâ. 40 ǁÎ-i ǁgan-e ga ǂû tamas ka io tani khoe-i hoa-i ge ǁî-i sarana nî ǁā, xawe i ge hoaraga tsēsa nî ǃanuoǃnâ.

41 Tā ǂhana tamas ka io xoxose ī ûitsama xūn xa ǂû, 42 nēsin ga ǂhanas, hakaǀnūxas tamas ka io ǂguiǀnūxa xawe. 43 Tā ǁîn di ǀgui-e ǂûs ǀkha aitsama ǃanuoǃnâ kaisen. 44 Tita ge ǃKhūta sadu Elota, ǁnā-amaga du ge ǃanuse hâsa nî dītsâ, tita a ǃanu xui-ao. 45 Tita ge ǃKhūta sado Egipteb di khobosisa xu ge ǂgaeǂguiǂui ta, sadu Elo kai ta nîga. ǁNā-amaga ǃanu tita a ǃanu khami.

46 Nēgu ge ǁgaragu hîa ǀgurun tsî anin, ǁgammi ǃnâ ra hâ ûitsama xūn hoan tsî ǃhūb ai ra ǂhana tsî ǃgû xoxon ǃaroma hâga. 47 ǂŌrisa ǀgoras ge ǃanun tsî ǃanuoǃnân, tsî ǂûhe ǁkhā ûitsama xūn tsî ǂûhe ǁoan tsîn ǁaegu nî dīhe.