Nehemiab ge tentommi, arki tsî altars tsîna ra sâu.
1 “Xoaǁguiga xu da ǂan ǃkhais ge kēbo-aob Jeremiab ge khoen hîa ge ǃhao ǃhūb ǃoa sîbēhena, ǀnai da go mî hâ i khami altarǀaes di ǃâ-en nî sâu ti mîmā hâ isa. 2 ǁKhāti da ǂans ge ǁîb ge ǁîna Elob di ǂhanuba ǁkhāǁkhā tsî ǃkhâikhomsa, in tā ǃhuniǀurib tsî ǀhaiǀurib ǀkha anu-anuhe hâ ǁgôa-elon hîan ǃhao ǃhūb ǃnâ nî mûn xa tā ǂgaeǂhapuhe. 3 ǁÎb ge ǁîna tātsēn ǂhanuba ǀuru tide ǃkhaisa ge ǂgan.
4 “ǁKhā xoaǁguigu ge Jeremiab ra elosi ǂgaeǂguis ǃnaka Tentommi tsî ǃGaeǀhaos ǂGaes tsîra ūsao tsî Moseb ge ǁîba xu Elob ge sida ǁaesa ǀumis ase mîmâiba ǃhūba kō, ǃhommi ai ǂoa ǃkhaisa ra mîba da. 5 Jeremiab ge ǃhommi tawa sī tsî kai ǁhoa-e hō tsî Tentommi, ǃGaeǀhaos ǂGaes tsî ǀanǀanaltars tsîna ǁnāpa sâu tsî dao-amsa ge ǃnau-am.
6 “ǀNî ǀhōsagu Jeremiab digu ge daoba gu nî ǃkhōmâi ti hâ ǂâis ǀkha ǁîba ge sao, xawe gu ge ǁhoasa ge hō ǁoa i. 7 Jeremiab ge ǁîgu ge tare-e dī ǃkhaisab ge ǂan, o ǁîga ǃgabe tsî ge mî: ‘Khoe-i xare-i ge Elob ǁîb khoena ǁkhawa ǀhaoǀhao tsî ǁîb ǀkhomma ǁgau tamas kōse nē ǃkhaisa ǂan tide. 8 ǁNā ǁaeb ǃnâb ge ǃKhūba mâpan nē xūna sâuhe hâ ǃkhaisa nî ǂhaiǂhai, tsîb ge ǃKhūb di ǂkhaisiba ǃâus ǃnâ Moseb ǁaeb ǃnân ge ǁgauhe hâ i khami tsî Salomob ge Tempeli nî ǀō-aisase khaihe ti ǂgan hâ i ǁaeb ais khami nî ǂhai.’
Salomob ge ǁâudīǀgaub
9 “ǁKhāti da ge nē gā-ai gao-aob Salomob ge Tempeli di ǀkhaeǂgāhes tawa dītoaheb geo, ǁguibasa dī ti ge mîbahe. 10 Tsî ǀgoreb ra hîas ge ǀaesa ǀhomma xu ǁgôaxa tsî aiǃâ i ge Moseb ge ǀgore, o īs ǁkhās khami ǁguibasa ge ǂhubiǂui. 11 Moseb ge ǁoreǁguibas ge ǂûhe tamas ge hâ i amaga ǀaes xa ǂhubiǂuihe ti ge mîǃā. 12 Salomob ge ǁkhaisa tsēde ge ǁâudī.
Nehemiab di ǂkhaniǀkhupiǁgâus
13 “ǁKhā xūn ge gaosi xoaǁguigu tsî ǂâiǂâisenǂkhanidi Nehemiab hîa ge ǂkhaniǀkhupiǁgâusa ǂnubib tsî Davidi xa ge xoahe ǂkhanin, gao-aogu di sîǂkhanidi, ǁguibadi xa ra ǃgûdi tsî ǁkhāti gao-aogu tsî kēbo-aogu xa hâna ge ǀhaoǀhao. 14 Judab tsîn ge ǁkhāti torob xa ǃaromahe hâse ge aoxūhe hâ i ǂkhanina ge ǀhaoǀhao tsî da ge ǁîn tsîna nēsis kōse ūhâ. 15 Nē ǂkhanidi xa du ga ǀguisa ǂhâba, o ǂanǂan da, î da sîba du.
ǁÂudīb ǃaroma hâ ǁkhauǂuis
16 “Nēsi da ǃAnusib di ǁÂudīb ǀkha ra tsoatsoa, o da ge sado ra xoaba tsî ra ǀapemā, î du sadu tsîna ǁîba ǁâudī. 17 Elob ge ǁîb di hoaraga ǁaesa ge sâu, tsîb ge sida, sida di ǃanu ǃhūb, gao-aosis, pristersis tsî tempelǃoabadi tsîna 18 ǁîb di ǂhanub ǃnâb mîmâi hâ khami ge mā-oa. ǁÎb ge ǂkhababa xu ge ore da tsî Tempela ǁkhawa ge ǃanuǃanu. ǁNās ǃaroma da ge ra ǂgom Elob ǀkhomxa da tsî ǃhūbaib di ǃhaodi hoade xu ǀhaoǀhao tsî ǁîb di ǃanu Tempeli ǃoa nî ǂgaeǂgui da ǃkhaisa.”
Xoa-aob di ǂgaeǂguiǂgās
19 Sireneǁîb Jasonni ge koro ǂkhanide Juda Makabaeub tsî ǁîb ǃgâsagu, ǃanuǃanuhes kai Tempeli dis tsî ǀkhaeǂgāhes altars dis tsîn xa ge xoa. 20 ǁÎb ge Antioxub Epifaneb tsî ǁîb ôab Eupatori hâkha ǀkha ge hâ i torogu tsîna xoaǃgāǃgā 21 tsî ǀhomma xu ge Judaǁî ǂgoms ǃaroma ge ǀgaisase gere ǃkhamn ǃoa hā aidi tsîn xa ge mîba da. Sida toroǃkhamaogu ge ǀoro gu ge i, xawe ǁîn di hoaraga ǃhūba hîkākā tsî ǀūbetoroǃkhamaoga ge sauruǂui. 22 ǁÎn ge hoaraga ǃhūbaib ǃnâ ǂanǂansa Tempela ǁkhawa ū-oa, Jerusalemsa ǃnoraǃnora tsî ǂhanugu hîa gere dībēhe ǂgaoga ǁkhawa ge ǂnûiǂgā. ǃKhūb ge ǁîna ǀkhom tsî ǁîn ǃoa ǃgâi i, xui-aon ge hoa xūna ge dī ǁkhā i.
23 Jasonni Sirenes dib ge koro ǂkhanidi ǃnâ xoa xūna ta ǀgui ǂkhanis ǃnâ nî ǃkhōǃnubuǃnubu ǃkhaisa ta ge nî dītsâ. 24 ǂGui ǃgôab di ǂōrisa ǃâdi tsî ǂguisib kuru-ūhe hâ xūn dib ge ǃnaeǃkhaide ra khomai ǂgao-i hoa-i ǃaroma ǃgomsib ase ī ǁkhā. 25 Xawe ta ge hoa khomai-aona ta nî supusupuba ǃkhaisa ge dîtsâ. ǁNān hîa ǁkhoab ǃaroma ra khomain ge ǁkhoaxasiba nî hō tsî ǀnîn hîa amaba ra ǁkhāǁkhāsenǂgā ǂgaon ge ǃgombahe tide. 26 Nēti ī ǃkhōǀhaosa xoas ge ǃgom, ǀgaisa sîsenna ǂhâba tsî ǁom ǁoa tsuxugu tsîna ǃkhōǂgā hâ. 27 ǃKharagaǃnâgu ǁkhoaga ūhâ khoen nî ǃgâiaǂgaoǃnâ ǁâudība aiǂhomis ǁkhās khami a ǃgom. Xawe ta ge ra ǃgâiaǂgao, ti khomai-aona ta nî ǂkhîǂkhîga nē ǃgomsib ǃnâ ǃkharusa. 28 Tita ge ǂōrisa ǃâde ǂguro xoa-aoba nî ǁnāxūba tsî ǃnaeǃkhaide ǃkhōǀhaos ǀguisa nî dītsâ. 29 Tita ge ǀasa om-i di omao tama hâ hîa omǀgaub xa nî ǂhansenta, xawe ta ge oms nî îsase mûsen ǃkhais xa ra ǂhansen ǂkhau-aos ǀguisa i. 30 ǃNaeǃkhaidi xoa-aob ge ǁîb di ǁkhāǁkhāǃâsa nî ǂan, tsî ǁîsa ǃgâise nî ǁguiǃā, 31 xawe ǂkhanisa ǃkhōǀhaos ǀguisa ra dī xoa-aogu ge ǃnubuse ǀgui xoa tsî gu nî ǂōrisa ǃâde xūǂui ǃkhais tsîna nî mā-amhe. 32 ǁNā-amaga age nēsi ǂgui xū-e khom tamase ti ǁgaeǂhôas ǀkha nî tsoatsoa. Gâsib ase i ge nî ī, aigowasa gaxugaxu tsî ǃnaeǃkhais ǀkhāsa ǃnubuǃnubusa.
© Khoekhoegowab Elobmîs © Bible Society in Namibia, 2020.
