Israelǁîn ge ǀhomma xu ra ǂûmāhe
1 Hoaraga ǀhûhâsib Israelǁîn dib ge Elimsa xu dāǁnâ tsî Sinǃgaroǃhūb, Elims tsî Sinaib tsîn ǁaegu ǁgoeb tawa ge sī. Nēs ge ǀgamǁî ǁkhâb di disikoroǀas ai ge isa, Egipteba xun ge ǂoas khaoǃgâ. 2 ǁNā ǃgaroǃhūb ǃnân ge ǁîna ǁîn di ǂkhîoǃnâsiba Moseb tsî Aron hâkha ai gowaǂui, 3 tsî ǁîkha ǃoa ge mî: “ǃGâi-i ge ga hâ ǃKhūb ga Egipteb ǃnâ da hâ hîa ǃgam da hâsa. ǁNāpa da ge ǂnû tsî ǁgan-i tsî nau ǂûn tsîna ǂgao da ras kōse gere ǂû. Xawets ge ǁnāpa xu ǂgaeǂguiǂui da tsî nē ǃgaroǃhūb ǃnâ hā ra ǁō kai da.”
4 ǃKhūb ge Moseb ǃoa ge mî: “Nēsi ta ge hoadu ǃaroma ǂûna ǀnanub khami ǀhomma xu nî ǀapi kai. Khoen ge mâ tsēs hoasa ǃgûǂoa tsî tsēsa ǂâu hâ ǂûn ǀguina nî ǀhaoǀhaobasen. Nē ǀgaub ai ǀgui ta ge ǁîna a ǃâitsâ ǁkhā isen ti ǁgui-aide nî ǃkhōǀgaipe ǃkhaisa. 5 Xawe ǃnaniǁî tsēs ain ge ǁnaetisase ra ǀhaoǀhaohes xa ǀgam ǃnāra ǃnāsase ǀhaoǀhao tsî nî aiǂhomi.”
6 O kha ge Moseb tsî Aron hâkha hoaraga Israelǁîn ǃoa ge mî: “Nēǃoes ǃnâ du ge nî ǂan ǃKhūb ge Egipteba xu a ǃnoraǃnora du ǃkhaisa. 7 ǁGoaga du ge ǃKhūb di ǂkhaisiba sadu ǁaegu nî ǃgapaǀî, ǁîb go sadu ǂkhîoǃnâ domgu, ǁîb ǃoagu hâga ǁnâu xui-ao. Tare-i ǃaroma du sikhom, ǁîb di ǁgui-aidi ǀguide ra dī khom ǃoagu sadu ǂkhîoǃnâsiba ra gowaǂui?”
8 Ob ge Moseba ǃaruǀî ge mî: “ǃKhūb ge ǁnāb sado mâ ǃuis hoasa ǁgan-i tsî mâ ǁgoagas hoasa ǂâu hâ pere-e nî māba, ǁîb ge sadu di ǂkhîoǃnâsib, ǁîb ǃoagu du ge gowaǂuiba ǁnâu xui-ao. Sikhom ǃoagu tamas ge ǂkhîoǃnâ du rasa, xawe ǃKhūb ǃoagus ge.”
9 ǁNās khaoǃgâb ge Moseba Aronni ǃoa ge mî: “Hoaraga Israelǁîn di ǀhûhâsiba mîba, în ǃKhūb go ǁîn ǂkhîoǃnâsiba ǁnâu xuige ǁîb di ais aiǃâ hā mâ.” 10 Tsî Aronni ra hoaraga Israelǁîn di ǀhûhâsib ǀkha ǃhoa hîan ge khoena ǃgaroǃhūb ǀkhāb ai ge dabasen, tsî mû, ǁîn ge ǂkhai ra ǃnâb ǃKhūb di ǂkhaisib diba ǃâusa xub ra ǂoaxase ge mû. 11 Tsîb ge ǃKhūba Moseb ǃoa ge mî: 12 “Israelǁîn di ǂkhîoǃnâsiba ta ge go ǁnâu, o ta ge mâ ǃuis hoasa ǁgan-i tsî mâ ǁgoagas hoasa pere-e ǂû du nîse nî mā du. On ge ǁîna nî ǂanǃgâ tita ǃKhūta a ǁîn di Elo ǃkhaisa.”
13 ǃOes ǃnâ di ge ǂhoms di ǃhaude Israelǁîn ge ǂnaumâi hâ-i ǃkhaib hoaba ge ǀoa tsî ǁgoagab ge hoaraga ǃkhaiba ǀaub xa ge ǀâ i. 14 ǀAub ge bēs khaoǃgâb ge ǃgaroǃhūba, ǁgā tsammel-i, ǃkhoab khami ī-i xa ge ǃgū-aihe hâ i. 15 Israelǁîn ge mûn ge, o tare-i a ǃkhaisa ge ǀū i tsî ǁîǃnābe nēti gere dîgu: “Tare-e nē-e?”
Ob ge Moseba ǁîn ǃoa ge mî: “Nē-i ge pere-i ǃKhūb go ǂû du nîse mā du-e. 16 ǃKhūb ge mâ khoe-i hoa-i ǂhâba-i hâs kōse nî ǀhaoǀhaobasensa ge mîmā. Nēs ge ra ǂâibasen, mâ khoe-i omaris ǃnâ hâ-i hoa-i ge ǀgam literkha pere-e nî ǀhaoǀhaobasen.”
17 Israelǁîn ge mîmāhen ge khami ge dī. ǀNîn ǁîn din ge ǃnāsase tsî ǀnîna ǁkhawa ǀorose ge ǀhaoǀhaobasen. 18 Tsî mâ omaris di khoe-i hoa-i ge hakaǁîǃâs pere-i disa ǀhaoǀhaobasen, o i ge mâ-i hoa-e ǂâu hâse ge ūhâ i. ǁNān ǃnāsase ge ǀhaoǀhaon ge ǂâu hâse ǀgui ge ūhâ i tsî ǁnān ǀorose ge ǀhaoǀhaon tsîn ge tôasi tama ge hâ i. 19 Moseb ge ǁîna ǃaruǀî ge mîba: “Khoe-i xare-i ge nau tsēs ǃaroma ǁî-i ǂû-e ǂûǃgau tide.” 20 Xawen ge ǀnî khoena ǁîba ǃgâ tama i tsî ǂûna nau tsēs ǃaroma ge ǂûǃgau. On ge nē ǂûna nau ǁgoas ai ǂunigu xa ǀoahe tsî ge ǀō. Ob ge Moseba ǁîn ǀkha ge ǁaixa. 21 Mâ ǁgoas hoasa i ge mâ khoe-i hoa-e ǁî-e ǂâuba hâs kōse gere ǀhaoǀhaobasen. Xawe sores ga nau ǁgoa ǀgamtsoatsoa, o i ge ǃhūb ai ra ǃgau ǂû-i hoa-e gere tsuni.
22 ǃNaniǁî tsēs ain ge ǁnaetisase ra ǀhaoǀhaohes xa ǀgam ǃnāra ǃnāsase, haka litergu pere-e mâ khoe-i hoa-i ǃaroma nî ǀhaoǀhao. Tsî hoaraga ǂgaeǂgui-aogu ǀhûhâsib digu ge hā tsî Moseba a mîbao, 23 ob ge ǁîgu ǃoa ge mî: “ǃKhūb ge ǁaris a ǃanu Sabbattsē tsî ǁîb di ǃgôasib ǃoa nî khaihe ǃkhaisa ra mîmā. ǁAnǁan tamas ka io du ra sâi ǂgaon hoana nētsē ǀhaoǀhao re. Tsî ǂûǃgauhe ga ǂû-i hoa-i ge ǀhaoǀhaohe tsî nau tsēs ǃaroma nî sâuhe.” 24 Tsî Moseb ge ǁîna mîmā khamin ge nau ǁgoas kōse ǃgau ge ǂûna ge sâu, xawe-i ge ǀō tamas ka io ǂuni-i xare-e ge ūhâ tama hâ i. 25 Moseb ge ge mî: “Nētsē sadu pere-e ǂû, nē tsēs ǃKhūb ǃoa khaihe hâ Sabbattsē tsî du ǂnaumâi du hâ ǃkhaib ǃauga pere-e hō tide xuige. 26 ǃNani tsēde du ge pere-e nî ǀhaoǀhao, xawe hûǁî tsēs, Sabbattsēs ai i ge pere-e hōhe ǁkhā tide.”
27 ǀNîn Israelǁîn din ge hûǁî tsēs ai pere-en sī nî ǀhaoǀhaobasense ge ǂoa, xawen ge xū-i tsîna hō tama ge i. 28 Ob ge ǃKhūba Moseb ǃoa ge mî: “Mâtikō ǃnāde du tita ra mîmā tsî ǁgui-ai du xūna ǁnâuǀnam tamase nî hâ? 29 Tita ǃKhūta ge Sabbattsēsa ge ǂnûiǂgāba du, ǁnā-amaga ta ge ǃnaniǁî tsēs ai ǀgam tsēra di pere-e ra mā du. Hûǁî tsēs ai i ge khoe-i xare-e ǂoa tide tsî oms â-i ǃnâ ǀgui nî hâ.” 30 ǁNā-amagan ge khoena hûǁî tsēs ai sîsen-i xare-e ge dī tama hâ i.
31 Israelǁîn ge nē pere-e mana ti ge ǀonǂgai. ǁÎ-i ge ǂkhari, ǃuri ǃkhomro-i khami ī, tsî dani-i ǀkha amsa pere-i khami gere ǁkhoa. 32 Tsîb ge Moseba ge mî: “Nēs ge ǃKhūb ge mîmā ǀgausa: ‘ǀGam literkha mana-e ū, î sadu surib ǃaroma sâu. Nē ǀgaus aib ge sadu suriba nî mûǂan Egipteba xu ta ge ǂgaeǂguiǂui du, o ta mâti-ī ǂû-e ǃgaroǃhūb ǃnâ gere ǂûmā du ǃkhaisa.’ ” 33 Moseb ge ǃaruǀî Aronni ǃoa ge mî: “Xapa-e ū, î ǀgam literkha di mana-e ǁnāpa ǂgā, î sada di surib ǃaroma ǃKhūb di ǂans ǃnaka sâu.” 34 Tsî ǃKhūb ge Moseba mîmā khamib ge Aronna ǁî-e ū, tsî ǃGaeǀhaos ǂGaes ǂhanub ge hâǃnâ is aiǃâ ǁnāpa ge mâi. 35 Israelǁîn ge manaba hakadisi kuriga ǁanǃnân ge sī a ǃhūb, Kanaanni tawan nî sīs kōse gere ǂû. 36 (Xapa-i, manab gere ǀnōǃnâhe-i ge omer ti ge ǂansa i tsî ǁaubexa ǀgam literkha di kōsiba ge ūhâ i.)
© Khoekhoegowab Elobmîs © Bible Society in Namibia, 2020.
